Read KITAB SUCI ZABUR INJIL 1 PETRUS 2 Bible Online

1 PETRUS 2 - KITAB SUCI ZABUR INJIL bible

1 PETRUS 2

¹Keranaq nike, tetéh léman diriqde selapuq saq jahat; selapuq tipu muslihat dait segale macem kemunapikan, talon até, dait pitnah.

²Side harus jari maraq bebéaq saq baruq tebijeang saq tetep bedak siq susu saq murni dait saq rohani. Siq care nike side pade gen jari sayan beléq dait nerimaq keselametan.

³ Side tetu-tetu sampun ngeraseang mésaq bahwe Tuhan nike solah.

⁴Keranaq nike, silaq parek tipaq Tuhan, batu saq idup. Nike batu saq tetetéh siq manusie, laguq saq tepiléq dait beraji léq arepan Allah.

⁵Side pade batu-batu saq idup. Keranaq nike side pade tekadu éndah jari penganjeng gedéng rohani, dait side pade jari imam-imam suci, saq ngaturang kurban rohani saq nyenengang Allah langan Deside Isa Almasih.

⁶ Séngaq léq dalem Kitab Suci tetulis maraq niki, “Setetune Tiang noloq léq Sion sopoq batu saq utame, saq tepiléq dait beraji; dait dengan saq percaye léq Ie ndéq gen teperilaq.”

⁷ Batu nike beraji léq side pade saq percaye. Laguq léq dengan-dengan saq ndéq percaye, berlaku ayat-ayat Kitab Suci niki, “Batu saq ndéq tekadu siq tukang-tukang bangunan nike, sampun jari batu saq paling utame,”

⁸ dait, “Batu nike saq gen miaq dengan kedampes, batu saq miaq dengan geriq.” Ie pade kedampes lantaran ie pade ndéq taat léq Manik Allah. Maraq nike sampun tetentuang siq Allah mengenai ie pade.

⁹Laguq side pade bangse saq tepiléq, imam-imam saq ngelayanin raje, bangse saq suci, umat dowén Allah mésaq. Allah miléq side pade dait ngemanikang side pade sugul léman taoq saq peteng jari tame ojok cahaye-Ne saq menah tandur, siq maksut adéq side pade nyampéang berite mengenai karye-karye-Ne saq luar biase.

¹⁰ Laéq side pade ndéqne umat Allah, laguq mangkin side pade sampun jari umat Allah. Laéq side pade ndéq teperiak siq Allah, laguq mangkin side pade nerimaq belas kasihan-Ne.

¹¹Semeton senamian saq tiang kasihin! Side pade jari dengan pendateng dait musapir léq dunie niki. Keranaq nike tiang naséhatin side pade adéq ndaq turut keméléq tabiat manusie saq beperang ngelawan jiwe.

¹²Side pade harus bedowé kelakuan saq solah léq tengaq-tengaq dengan saq ndéq kenal Allah, sehingge lamun ie pade pitnah side pade teparan jari dengan jahat, ie pade bau serioq léman perbuatan side saq solah, sehingge ie pade gen mulieang Allah léq jelo kerauhan Tuhan.

¹³Lantaran Tuhan, side pade harus taat tipaq sebilang manusie saq jari penguase; tipaq raje saq jari penguase paling utame,

¹⁴atao tipaq pejabat pemréntah saq tepiléq siq raje jari ngukum dengan saq gawéq jahat dait hormatin dengan saq ngelaksaneang hal saq solah.

¹⁵Séngaq Allah kayun adéq siq perbuatan-perbuatan side saq solah side pade tungkem biwih dengan saq bodo.

¹⁶Side pade harus idup maraq dengan merdéke, laguq ndaq kadu kemerdékeande nike jari ngilipang kejahatan, laguq pade idup sebagé hambe Allah.

¹⁷Pade hormatin selapuq dengan, kasihin semeton-semetonde, takut tipaq Allah, dait hormatin raje.

¹⁸Semeton senamian saq jari hambe, pade tunduk léq majikande sehormat-hormatne; ndéqne cume tipaq ie pade saq tulus angenne dait gerasaq, laguq éndah tipaq ie pade saq kejem.

¹⁹Séngaq, nike rahmat Allah, lamun side pade lantaran sadar léq pekayunan Allah, sabar menderite lantaran perlakuan saq ndéq adil.

²⁰Séngaq napi pantes tepuji lamun side pade menderite hukuman saq seharusne side pade terimaq lantaran kesalaqan? Laguq lamun side pade menderite lantaran ngelaksaneang saq kenaq, nike aranne rahmat.

²¹Nike lantaranne Allah manikang side pade. Séngaq Almasih mésaq sampun menderite demi side pade, dait siq care nike Ie ngicanin side pade sopoq teladan saq harus side pade turut.

²² Ie nénten uwah piaq dose, dait tipu muslihat nénten uwah sugul léman cangkem-Ne.

²³ Sewaktu Ie tesumpaq senaq, Ie nénten bebales nyumpaq senaq. Sewaktu Ie menderite, Ie nénten ngancem; Ie cume nyerahang pelekare-Ne léq Allah, saq ngadilin secare adil.

²⁴ Almasih mésaq saq nanggung dose-dosente léq dalem rage-Ne léq atas kayuq salib, adéq ite saq sampun bébas léman kuase dose, idup bagi kebenaran. Leket-leket saq araq léq Almasih nike saq nyelahang side pade.

²⁵Laéq side pade maraq dombe saq sesat, laguq mangkin side pade sampun tulak tipaq Pengarat dait Pemeliharaq jiwende.