Read KITAB SUCI ZABUR INJIL 1 PETRUS 3 Bible Online

1 PETRUS 3 - KITAB SUCI ZABUR INJIL bible

1 PETRUS 3

¹ Maraq nike éndah side pade, senine-senine harus tunduk tipaq semame adéq lamun léq antare ie pade araq saq ndéq percaye léq Manik Allah, kelakuande bau miaq ie pade jari percaye dait ndéq perlu side pade bebase napi-napi léq ie pade,

²séngaq ie pade serioq idupde saq soléh dait murni.

³ Ndaq keingesande cume keingesan saq penggitan léman luah, maraq misal ngengadu potongan bulu saq macem-macem ruene, ngengadu periasan emas, atao kelambi saq mahel-mahel.

⁴Sebalikne, keingesande harus dateng léman dalem batin, budi pekerti saq lemah lembut dait tenang; nike keingesan saq kekel saq mahel ajine léq arepan Allah.

⁵Maraq niki entane dengan-dengan nine saq soléh léq jaman laéq, ie pade saq beharep léq Allah peringes diriqne siq care tunduk léq semame ie pade.

⁶ Maraq nike éndah Sarah, ie taat léq Ibrahim dait nyebut ie majikanne. Mangkin side éndah jari bije-bije Sarah, lamun side pade ngelaksaneang hal-hal saq solah dait ndéq takut léq napi juaq.

⁷ Dait side pade éndah, semame-semame, side pade harus idup bijaksane tipaq seninende, dait siq kesadaran bahwe ie pade kaum saq lemah. Lantaran bareng-bareng kance ie, side nerimaq rahmat Allah, nike kehidupan. Siq care nike ndéq araq saq halangin do'ende.

⁸Ahirne, side pade harus sopoq angen, saling sayang, saling kasihin kance selapuq semeton, lemah lembut, dait rendah até.

⁹Ndaq bales kejahatan siq kejahatan, atao sumpaq senaq tebales siq sumpaq senaq; sebalikne side harus bales perbuatan-perbuatan nike siq tunasang berkah léman Allah. Séngaq jari hal nike Allah ngemanikang side pade adéq side pade nerimaq berkah léman Ie.

¹⁰ Séngaq léq dalem Kitab Suci tetulis: “Dengan saq mélé nikmatin idup dait mélé ngalamin jelo-jelo saq solah, harus jagaq biwihne adéqne ndéq ngeraosang hal-hal saq jahat, dait ndéqne ngucapang hal-hal saq duste.

¹¹Ie harus jaoqang diriqne léman hal-hal saq jahat dait ngelaksaneang saq solah; ie harus pacu-pacu bejuang jari mauq perdaméan.

¹²Séngaq Tuhan tetep merhatiang dengan-dengan saq kenaq, dait Tuhan tetep mirengang do'e-do'e ie pade saq nunas tulung; laguq Tuhan ngelawan dengan-dengan saq gawéq jahat.”

¹³Sai saq mélé gawéq jahat léq side, lamun side pade rajin ngelaksaneang hal saq solah?

¹⁴ Laguq timaq side pade harus menderite lantaran ngelaksaneang hal-hal saq solah, side pade bahagie! Ndaq takut léq sai juaq, dait ndaq kuatir.

¹⁵Laguq léq dalem aténde, side pade harus ngebéng penghormatan saq husus tipaq Almasih sebagé Junjungan Saq Mulie. Dait side pade harus tetep siep bejawab tipaq sebilang dengan saq beketuan mengenai pengharepan saq araq léq side.

¹⁶Laguq laksaneang hal nike secare lemah lembut dait hormat dait até nurani saq murni, adéq lamun side pade tepitnah lantaran side pade idup soléh léq dalem Almasih, make dengan saq pitnah nike gen jari ilaq mésaq.

¹⁷Solahan menderite lantaran ngelaksaneang saq solah -- lamun nike pekayunan Allah -- ketimbang menderite lantaran gawéq saq jahat.

¹⁸Séngaq Almasih mésaq ninggal cume sekali doang, jari selaéq-laéqne lantaran dose manusie -- Ie saq ndéq salaq, ninggal demi dengan saq salaq. Almasih ngelaksaneang hal nike adéq Ie bau bimbing side tipaq Allah. Ie tematéq léq dalem keadaan-Ne sebagé manusie, laguq teidupang malik menurut Roh.

¹⁹Dait dalem keadaan Roh nike, Ie lumbar beriteang Kabar Solah léman Allah tipaq roh-roh saq araq léq dalem bui:

²⁰ Nike roh dengan-dengan saq ndéq taat léq Allah léq jaman Nuh. Léq waktu nike siq sabar Allah ngantos ie pade betobat sengonéq Nuh miaq kapal. Cume dengan-dengan saq araq léq dalem kapal doang -- selapuqne baluq dengan -- saq teselametang léman belabur beléq nike.

²¹Peristiwe nike jari perumpamean léman baptisan saq mangkin niki nyelametang side pade. Baptisan niki ndéqne sopoq upacare jari persiq awak léman selapuq saq kotor-kotor, laguq jari petunasan tipaq Allah adéq Ie ngicanin até nurani saq murni. Baptisan nike nyelametang side pade séngaq Deside Isa Almasih sampun idup malik léman ninggal,

²²dait sampun taék ojok sorge serte melinggih léq sedi kanan Allah. Selapuq malaékat, selapuq penguase dait selapuq kekuatan takluk léq Ie.