Read KITAB SUCI ZABUR INJIL 1 PETRUS 4 Bible Online

1 PETRUS 4 - KITAB SUCI ZABUR INJIL bible

1 PETRUS 4

¹Séngaq Almasih sampun menderite secare jasmani, side pade éndah harus kuatang diriq siq pikiran maraq nike. Séngaq dengan saq menderite secare jasmani, ie sampun engkah piaq dose.

²Keranaq nike, semasih araq waktu léq dunie niki side pade harus idup menurut pekayunan Allah, dait ndéqne menurut keméléq manusie.

³Léq waktu saq laéq, side pade sampun bégaq ngonéqne ngelaksaneang napi saq demen telaksaneang siq dengan-dengan saq ndéq kenal Allah. Léq waktu nike side pade idup turutang hawe napsu, bowos-bowosan, péste-péste jangke liwat bates, nginem-nginem dait nyembah berhale saq tebalaq.

⁴Mangkin dengan saq ndéq kenal Allah, bengaq bahwe side pade ndéq milu idup maraq ie pade dalem kehidupan saq bedose jangke liwat bates. Keranaq nike ie pade pitnah side pade.

⁵Laguq éraq ie pade harus bejawab tipaq Allah saq sampun siep ngadilin dengan saq idup dait saq ninggal.

⁶Nike lantaranne, Kabar Solah léman Allah sampun teberiteang éndah tipaq dengan-dengan ninggal. Maksutne adéq ie pade, saq sampun teadilin dalem keadaan jasmani -- maraq halne selapuq dengan gen teadilin -- siq roh bau idup menurut pekayunan Allah.

⁷Selapuq hal sampun gen tutuq, keranaq nike side pade harus nguasein diriq dait tenang, adéq side pade tao bedo'e.

⁸ Léq atas selapuq nike, hal saq paling utame: Side harus pacu-pacu saling kasihin sopoq kance saq lain, séngaq kasih segah dengan piaq dose malik.

⁹Side pade harus béng nyodoq sopoq dengan dait saq lainne léq balénde, ndaq ngerumun.

¹⁰Sebagé pengurus saq setie léman rahmat Allah, side pade sopoq-sopoq harus kadu paice saq sampun side pade terimaq jari kepentingan side bareng-bareng.

¹¹Lamun araq dengan saq ngeraos, ie harus ngeraos sebagé dengan saq nyampéang Manik Allah. Lamun araq sopoq hambe, ie harus ngelayanin siq kekuatan saq teicanin siq Allah léq ie, adéq léq dalem selapuq hal Allah temulieang langan Deside Isa Almasih. Ie saq bekuase dait patut temulieang selaéq-laéqne. Amin.

¹²Semeton senamian saq tiang kasihin, ndaq side pade bengaq siq siksaqan saq nimpe side pade sebagé ujian, maraqne sopoq hal saq luar biase telaksane léq side pade.

¹³Sebalikne, side pade harus seneng lantaran milu menderite bareng-bareng kance Almasih. Make éraq lamun kemuliean Almasih tenyatayang, side pade gen besukecite.

¹⁴Side pade bahagie lamun side pade tehine lantaran peséngan Almasih, séngaq Roh kemuliean, nike Roh Allah araq léq side.

¹⁵Keranaq nike, ndaq jangke araq sopoq dengan juaq léq antare side saq menderite lantaran ie tukang nyematéq, atao maling, atao dengan jahat, atao lantaran ie turut campur urusan dengan lain.

¹⁶Laguq lamun side pade menderite lantaran side pade pengiring Almasih, ndaq ilaq lantaran hal nike, laguq side pade harus mulieang Allah siq peséngan Almasih nike.

¹⁷Sampun dateng waktune Allah ngadilin dunie. Dait dengan-dengan saq tehususang bagi Allah saq gen teadilin bejulu. Jari, lamun Allah gen mulai léman ite, berembé jarine laun kance dengan-dengan saq ndéq percaye léq Kabar Solah léman Allah nike?

¹⁸ “Lamun dengan-dengan saq kenaq doang sengke teselametang, lebih-lebih saq gen telaksane léq dengan-dengan saq bedose dait saq ndéq kenal Tuhan.”

¹⁹Keranaq nike, dengan-dengan saq menderite lantaran pekayunan Allah, harus tetep gawéq saq solah dait nyerahang jiwe ie pade tipaq Penciptene saq setie.