Read KITAB SUCI ZABUR INJIL 2 PETRUS 3 Bible Online

2 PETRUS 3 - KITAB SUCI ZABUR INJIL bible

2 PETRUS 3

¹Semeton senamian saq tiang kasihin! Niki surat tiang saq kedue tipaq side. Léq dalem kedue surat niki, tiang berusahe ngidupang pikiran-pikirande saq murni.

²Tiang anjurang adéq side pade inget léq ucapan-ucapan saq laéq tesampéang siq nabi-nabi Allah, dait léq préntah léman Junjungan Saq Mulie dait Juruselamette, saq tesampéang tipaq side langan rasul-rasul.

³ Saq terutame harus side pade nenaoq, bahwe léq jelo-jelo penutuq gen dateng tukang-tukang oloq, nike dengan-dengan saq idup menurut hawe napsune.

⁴Maraq niki basen ie pade, “Mbé janji mengenai kerauhan-Ne nike? Bapaq-bapaq leluhurte sampun ninggal, laguq selapuq-lapuqne masih pade doang maraq waktu dunie niki tecipteang!”

⁵ Ie pade sediah ndéq mélé ngaku bahwe laéq Allah cipteang langit dait gumi siq manik-Ne. Gumi Ie cipteang léman aiq, dait siq aiq;

⁶ dait siq aiq éndah -- nike aiq léman belabur saq beléq -- dunie saq laéq nike temusnahang.

⁷Laguq langit dait gumi saq araq mangkin niki tepeliharaq siq Manik Allah, éraq nike éndah temusnahang siq api. Mangkin langit dait gumi masih tepeliharaq jangke dateng jelone dengan-dengan saq ndéq kenal Tuhan tehukum dait tebinaseang.

⁸ Laguq semeton-semeton tiang saq tiang kasihin, ndaq side lupaq léq sopoq hal niki, bahwe bagi Tuhan, sejelo ndéq araq bédene kance siyu taun -- dait siyu taun pade maraq sejelo.

⁹Tuhan nénten lupaq ngicanin napi saq sampun Ie janjiqang timaq araq saq beranggepan maraq nike. Sebalikne, Ie sabar léq side pade, séngaq Ie nénten kayun sopoq dengan juaq saq binase. Allah kayun adéq selapuq dengan betobat léman dose-dosene.

¹⁰ Laguq jelo kerauhan Tuhan gen rauh maraq maling. Léq jelo nike, langit gen musnah siq suare saq dahsyat, dait selapuq saq araq léq langit gen bis julat, dait gumi kance selapuq saq araq léq dalemne gen musnah.

¹¹Jari, lamun selapuqne nike gen teancurang siq care saq maraq nike, berembé sepatutne side pade harus idup suci dait soléh,

¹²side pade saq kenyeke ngantih dait miaq kerauhan jelo Allah sayan becat. Séngaq léq jelo nike langit gen bis julat, dait selapuq saq araq léq dunie gen anyong lantaran panasne.

¹³ Laguq ite ngantih napi saq sampun tejanjiqang siq Allah, nike langit saq baru dait gumi saq baru, léq derike taoqne kebenaran.

¹⁴Keranaq nike, semeton senamian saq tiang kasihin, sementare side pade ngantih jelo nike, pade berusahe pacu-pacu jari idup suci dait ndéq bedowé cacat cele léq arepan Allah, dalem perdaméan kance Ie.

¹⁵Anggep kesabaran Tuhante jari kesempatan saq teicanin tipaq side adéq bau selamet. Paulus, semetonte saq ite kasihin, sampun nulis saq maraq nike éndah tipaq side pade. Ie nulis hal nike siq kebijaksanean saq teicanin siq Allah tipaq ie.

¹⁶Léq dalem selapuq suratne, Paulus tetep nulis mengenai hal nike. Mule araq pire hal saq sengke tepahamin léq dalem surat-suratne nike. Dait hal nike saq teputer-balik siq dengan-dengan saq ndéq taoq napi-napi dait saq ndéq teguq imanne. Hal nike ndéq miaq bengaq, séngaq bagian-bagian saq lain léman Kitab Suci tepiaq maraq nike éndah siq ie pade. Napi saq ie pade laksaneang nike cume datengang kebinasean tipaq diriqne mésaq.

¹⁷Laguq side pade, semeton senamian saq tiang kasihin, side pade sampun nenaoq mengenai hal nike. Keranaq nike, waspade adéq ndaq jangke side pade teoros ojok dalem kesesatan dengan-dengan saq ndéq kenal hukum, sehingge keyakinan side pade telang.

¹⁸Side pade harus sayan kuat léq dalem rahmat dait dalem hal kenal kance Deside Isa Almasih, Junjungante Saq Mulie dait Juruselamette. Bagi Ie kemuliean dait kehormatan, mangkin dait jangke selaéq-laéqne! Amin.