Read KITAB SUCI ZABUR INJIL 1 YAHYA 2 Bible Online

1 YAHYA 2 - KITAB SUCI ZABUR INJIL bible

1 YAHYA 2

¹Bije-bije tiang! Tiang tulis surat niki tipaq side pade adéqde ndéq piaq dose. Laguq lamun araq saq piaq dose, make ite bedowé sopoq perantare léq arepan Bapa, nike Deside Isa Almasih saq adil.

²Dait langan Ie, ite bau tedaméang léman selapuq dose-dosente, dait ndéqne umaq dose-dosente doang, laguq éndah umaq dose-dose seantéro dunie.

³Niki tandene bahwe ite kenal kance Allah, nike lamun ite taat léq préntah-préntah-Ne.

⁴Dengan saq bebase, “Tiang kenal Allah,” laguq ndéq taat léq préntah-préntah-Ne, dengan nike penduste, dait kebenaran ndéq araq léq dalem aténe.

⁵Laguq dengan saq taat léq Manik Allah, make kasih tipaq Allah sempurne gati léq dengan nike. Siq care nike ite nenaoq bahwe ite idup léq dalem Allah.

⁶Sai-sai saq bebase bahwe ie idup léq dalem Allah, ie harus idup pade maraq care Almasih idup.

⁷ Semeton senamian saq tiang kasihin! Saq tiang tulis niki ndéqne préntah saq baru. Niki préntah saq laéq saq sampun tesampéang ojok side sewaktu side baruq percaye léq Almasih. Nike Manik léman Allah saq sendéqmanne sampun side pade dengah.

⁸Timaqne maraq nike, préntah saq tiang tulis niki baru éndah. Séngaq kebenaranne nyate léq dalem Almasih dait léq diriq side pade. Séngaq peteng kenyeke telang dait cahaye saq kenaq mulai besinar.

⁹Dengan saq bebase bahwe ie araq léq dalem cahaye laguq dengan nike masih meriq léq semetonne, make dengan nike masih araq léq dalem peteng jangke mangkin.

¹⁰Dengan saq ngasihin semetonne, ie idup léq dalem cahaye, sehingge léq ie ndéq araq hal-hal saq miaq dengan lain jari sesat.

¹¹Laguq dengan saq meriq léq semetonne, ie araq léq dalem peteng. Ie idup léq dalem peteng, dait ndéq nenaoq ojok mbé aningne, séngaq peteng nike miaq penentengne jari bute.

¹²Tiang nulis tipaq side, hai kanak-kanak, séngaq dosende sampun teampunin lantaran peséngan Almasih.

¹³Tiang nulis tipaq side, hai bapaq-bapaq, séngaq side sampun kenal kance Ie saq sampun araq léman penembéqne. Tiang nulis tipaq side, dengan-dengan bajang, séngaq side pade sampun ngalahang Si Jahat.

¹⁴Tiang nulis tipaq side, hai kanak-kanak, séngaq side pade kenal kance Bapa. Tiang nulis tipaq side, hai bapaq-bapaq, séngaq side pade sampun kenal kance Ie, saq sampun araq léman penembéqne. Tiang nulis tipaq side, hai dengan-dengan bajang, séngaq side pade kuat dait Manik Allah araq léq dalem aténde, dait side pade sampun ngalahang Si Jahat.

¹⁵Ndaq side ngasihin dunie niki, atao napi juaq saq araq léq dalem dunie niki. Lamun side pade ngasihin dunie, make kasih tipaq Bapa ndéq araq léq side pade.

¹⁶Séngaq selapuq saq araq léq dalem dunie niki -- keméléq tabiat manusie dait saq temelétang siq penenteng dait kesombongan idup -- selapuqne nike hal-hal saq asalne ndéqne léman Bapa, laguq léman dunie.

¹⁷Dunie dait selapuq keméléqne kenyeke telang. Laguq dengan saq turut pekayunan Allah, tetep idup jangke selaéq-laéqne.

¹⁸Bije-bije tiang, niki jaman ahir! Sendéqmanne sampun tebadaq tipaq side bahwe penentang Almasih gen dateng; dait mangkin sampun araq luwéq dengan saq nentang Almasih. Nike tandene bahwe ahir jaman sampun rapet.

¹⁹Mule ie pade dengan-dengan saq asalne léman ite, laguq ie pade ndéqne bagian léman ite, séngaq lamun ie pade léman ite, pasti ie pade tetep bareng-bareng kance ite. Laguq ie pade bilin ite, adéqne nyate bahwe ie pade selapuq mule ndéqne bagian léman ite.

²⁰Laguq side pade sampun nerimaq paice léman saq Mahesuci, dait side pade selapuq sampun nenaoq.

²¹Jari, tiang nulis niki tipaq side pade ndéqne lantaran side pade ndéq kenal kebenaran, laguq malahan lantaran side pade sampun kenal hal nike, dait side pade éndah nenaoq bahwe ndéq araq duste saq asalne léman kebenaran.

²²Sai saq beduste nike? Saq beduste nike dengan saq nilas bahwe Deside Isa nike Almasih. Dengan nike penentang Almasih, ie ndéq ngakuq Bapa dait Bije saq asalne léman Allah.

²³Dengan saq ndéq ngakuq Bije saq asalne léman Allah, artine ndéq nerimaq Bapa éndah. Dait dengan saq ngakuq Bije saq asalne léman Allah, artine nerimaq Bapa éndah.

²⁴Keranaq nike, berite saq sampun side pade dengah léman penembéq, harus side pade jagaq pacu-pacu léq dalem aténde. Lamun berite nike side pade perhatiang pacu-pacu, side pade gen tetep idup léq dalem Bije saq asalne léman Allah dait Bapa.

²⁵Dait hal niki saq tejanjiqang siq Almasih tipaq ite; idup sejati dait kekel.

²⁶Tiang tulis niki tipaq side mengenai dengan-dengan saq kenyeke berusahe nyesatang side pade.

²⁷Laguq mengenai side pade, Almasih sampun curahang Roh-Ne tipaq side pade. Dait sengonéq Roh-Ne araq léq side pade, ndéq perlu araq dengan lain ngajah side pade. Séngaq Roh-Ne ngajah side pade mengenai selapuq hal; dait napi saq Ie ajahang nike kenaq, ndéqne duste. Keranaq nike, side pade harus taat léq napi saq teajahang siq Roh nike, dait side pade harus tetep idup léq dalem Almasih.

²⁸Jari, bije-bije tiang, pade tetep idup léq dalem Almasih, adéq éraq sewaktu Ie rauh, ite parek tipaq Almasih siq keyakinan saq pasti dait ndéq nyeboq lantaran ilaq.

²⁹Side pade sampun nenaoq bahwe Almasih nike kenaq. Keranaq nike side pade harus nenaoq éndah bahwe sebilang dengan saq idup menurut kebenaran, ie asalne léman Allah.