Read KITAB SUCI ZABUR INJIL 1 YAHYA 5 Bible Online

1 YAHYA 5 - KITAB SUCI ZABUR INJIL bible

1 YAHYA 5

¹Sebilang dengan saq percaye bahwe Deside Isa nike Almasih, dengan nike asalne léman Allah. Sai-sai saq ngasihin Allah, make ie éndah ngasihin dengan saq asalne léman Allah.

²Siq care niki ite nenaoq bahwe ite ngasihin bije-bije saq asalne léman Allah: Ite ngasihin Allah dait taat léq préntah-préntah-Ne.

³ Séngaq, kasih tipaq Allah artine: Bahwe ite taat léq préntah-préntah-Ne. Dait préntah-préntah-Ne nike ndéqne berat umaq ite,

⁴séngaq sai saq asalne léman Allah, ie ngalahang dunie. Niki kemenangan saq ngalahang dunie, nike imante.

⁵Sai saq bau ngalahang dunie, selain dengan saq percaye bahwe Deside Isa nike Bije saq asalne léman Allah?

⁶Niki Ie saq rauh ojok dunie siq aiq dait daraq, nike Deside Isa Almasih; ndéqne siq aiq doang, laguq éndah siq daraq. Dait Roh Allah mésaq saq ngicanin kesaksian bahwe nike kenaq, séngaq Roh nike kebenaran.

⁷Séngaq araq telu saksi léq dalem sorge: Bapa, Manik dait Roh Suci; dait ketelune nike sopoq.

⁸Dait araq telu saq jari saksi léq gumi: Roh, aiq dait daraq, ketelune nike sopoq.

⁹Ite percaye léq kesaksian manusie, laguq kesaksian Allah kuatan malik. Dait nike kesaksian saq sampun teicanin siq Allah mengenai Bije-Ne.

¹⁰Keranaq nike, dengan saq percaye léq Bije saq asalne léman Allah, sampun nerimaq kesaksian nike léq dalem aténe; laguq dengan saq ndéq percaye tipaq Allah, sampun anggep bahwe Allah beduste, séngaq ie ndéq percaye napi saq temanikang siq Allah mengenai Bije-Ne.

¹¹ Niki kesaksian nike: Allah sampun ngicanin ite idup sejati dait kekel, dait idup nike araq léq dalem Bije-Ne.

¹²Dengan saq bedowé Bije saq asalne léman Allah, bedowé idup nike; dait dengan saq ndéq bedowé Bije saq asalne léman Allah nike, ndéq bedowé idup nike.

¹³Tiang nulis tipaq side pade, adéq side pade saq percaye tipaq Bije saq asalne léman Allah, nenaoq bahwe side pade sampun bedowé idup sejati dait kekel.

¹⁴Dait ite parek tipaq Allah siq keyakinan saq pasti, séngaq ite yakin Ie ngabulang do'ente, lamun ite tunas sopoq hal saq sesuai kance pekayunan-Ne.

¹⁵Lamun ite nenaoq bahwe Ie mirengang ite dait napi saq ite tunas, make ite éndah nenaoq bahwe ite sampun nerimaq selapuq hal saq sampun ite tunas léman Ie.

¹⁶Lamun side pade serioq salaq sopoq semeton seiman piaq dose saq ndéq datengang kematéan, side pade harus bedo'e tipaq Allah; dait Allah gen ngicanin ie idup nike. Hal niki berlaku tipaq ie pade saq dosene ndéq datengang kematéan. Laguq araq dose saq datengang kematéan. Mengenai hal nike tiang ndéq badaq bahwe side pade harus bedo'e tipaq Allah.

¹⁷Selapuq kejahatan nike dose, laguq araq dose saq ndéq datengang kematéan.

¹⁸Ite nenaoq bahwe selapuq dengan saq asalne léman Allah, ndéq terus-terusan piaq dose, séngaq Bije saq asalne léman Allah ngelindungin ie, dait Si Jahat ndéq bau piaq napi-napi léq ie.

¹⁹Ite nenaoq bahwe ite dowén Allah, dait seantéro dunie niki araq léq bawaq kekuasean Si Jahat.

²⁰Ite nenaoq bahwe Bije saq asalne léman Allah sampun rauh dait sampun ngicanin ite pengertian, adéq ite kenal kance Allah saq kenaq. Ite idup léq dalem Allah saq kenaq dait léq dalem Bije-Ne, Deside Isa Almasih. Ie Allah saq kenaq, dait idup sejati dait kekel.

²¹Bije-bije tiang, jaoqang diriqde léman berhale-berhale!