Read KITAB SUCI ZABUR INJIL 3 YAHYA 1 Bible Online

3 YAHYA 1 - KITAB SUCI ZABUR INJIL bible

3 YAHYA 1

¹ Tipaq Gayus saq tiang kasihin léq dalem kebenaran, léman tiang pemimpin jemaah.

²Tiang bedo'e semoge side tetep séhat dait ndéq araq saq kurang léq side, pade maraq jiwende éndah séhat.

³Tiang seneng gati sewaktu pire dengan semeton dateng dait ngebéng kesaksian tipaq tiang berembé setiene side léq kebenaran, séngaq mule side tetep idup menurut kebenaran.

⁴Ndéq araq saq miaq tiang lebih besukecite, selain dengah kabar bahwe bije-bije tiang idup menurut kebenaran.

⁵Semeton tiang saq tiang kasihin, side setie gati léq pegawéan saq side laksaneang tipaq semeton-semeton saq lain; malahan saq ndéqman side kenal éndah.

⁶Ie pade sampun ngebéng kesaksian léq julun jemaah mengenai kasihde. Tulung ie pade adéqne bau ngelanjutang kelampan ie pade dait siq care nike nyenengang Allah,

⁷séngaq léq dalem kelampan jari ngelayanin Almasih, ie pade ndéq nerimaq bantuan napi juaq léman dengan-dengan saq ndéq kenal kance Allah.

⁸Keranaq nike ite harus nulung semeton-semeton saq maraq nike, adéq ite milu léq dalem usahe ie pade jari beriteang kebenaran.

⁹Tiang sampun nulis surat saq singket tipaq jemaah, laguq Diotrepes saq melét jari dengan saq paling utame léq dalem jemaah, ndéqne mélé ngakuq tiang pade.

¹⁰Laun lamun tiang dateng, gen tiang ingetang selapuq hal saq sampun ie laksaneang, nike mengenai hal-hal jahat dait duste saq ie ucapang mengenai tiang pade! Laguq selapuqne nike ndéqman cukup tipaq ie. Léq waktu semeton-semeton nike dateng, ie ndéq mélé nerimaq ie pade. Malahan ie balaq dengan-dengan saq mélé nerimaq semeton-semeton nike, dait ie suruq dengan-dengan nike sugul léman jemaah!

¹¹Semeton senamian saq tiang kasihin, ndaq tiru napi saq jahat, laguq tiru napi saq solah. Dengan saq ngelaksaneang saq solah, asalne léman Allah. Dait dengan saq piaq jahat, ndéqne uwah serioq Allah.

¹²Mengenai Demetrius, selapuq dengan ngebéng kesaksian saq solah, malahan kebenaran nike mésaq ngebéng kesaksian saq maraq nike. Tiang pade éndah ngebéng kesaksian saq solah, dait napi saq tiang pade sampéang bau tesaduq.

¹³Luwéq gati saq perlu tiang sampéang léq side, laguq solahan lamun tiang ndéq kadu surat.

¹⁴Tiang beharep becat bedait kance side dait bau ngeraos langsung.

¹⁵Damé sejahtere araq bareng kance side! Salam léman sahabat-sahabatde. Sampéang salam tiang tipaq sahabat-sahabatte sopoq-sopoq.