Read KITAB SUCI ZABUR INJIL WAHYU 1 Bible Online

WAHYU 1 - KITAB SUCI ZABUR INJIL bible

WAHYU 1

¹Isi kitab niki mengenai wahyu saq teicanin siq Allah tipaq Deside Isa Almasih. Adéq Almasih nyatayang hal nike tipaq hambe-hambe-Ne, nike hal-hal saq harus becat telaksane. Beterus Ie ngutus malaékat-Ne tipaq Yahya, hambe-Ne, jari jelasang hal-hal nike.

²Yahya sampun besaksi mengenai Manik Allah dait mengenai kesaksian saq teicanin siq Deside Isa Almasih, nike selapuq saq sampun ie serioq.

³Bahagie dengan saq baceang dait dengan saq dengahang berite nubuat kitab niki dait taat léq napi saq tetulis léq dalemne. Séngaq ndéqne ngonéq malik selapuqne niki gen telaksane.

⁴ Tipaq kepituq jemaah léq daérah Asia Kodéq. Umaq side pade rahmat dait sejahtere léman Ie saq araq mangkin, saq sampun araq léq jaman laéq, dait saq masih araq léq waktu saq gen dateng. Léman tiang, Yahya dait léman kepituq roh saq araq léq arepan tahte Allah,

⁵ dait léman Deside Isa Almasih, saksi saq setie. Ie saq penembéq teidupang malik léman ninggal dait Ie penguase raje-raje dunie. Bagi Deside Isa saq ngasihin ite, dait siq ninggal-Ne Ie bébasang ite léman dose-dosente

⁶ dait jariang ite sopoq kerajaan dait imam-imam, saq ngelayanin Allah, Bapa-Ne. Bagi Ie kemuliean dait kuase jangke selaéq-laéqne. Amin!

⁷ Pade serioq Ie rauh léq dalem awan! Selapuq dengan gen serioq Ie, termasuk éndah ie pade saq sampun galah Ie. Selapuq bangse léq gumi gen éroq aséq lantaran Ie. Tetu, nike pasti! Amin!

⁸ “Tiang niki saq penembéq dait saq penutuq, Manik Allah, Tuhan saq araq, saq sampun araq, dait saq araq selaéq-laéqne, Saq Mahekuase.”

⁹Tiang Yahya, semetonde saq senasip kance side pade léq dalem kesusahan, dalem kerajaan dait léq dalem ketekunan jari ngantos kerauhan Deside Isa. Tiang tetetéh ojok Pulao Patmos lantaran tiang beriteang Manik Allah dait kesaksian Deside Isa.

¹⁰Léq jelo Tuhan, tiang tekuasein siq Roh Allah, terus tiang dengah suare saq beléq -- maraq suare terompét -- kedengahan léq mudi tiang.

¹¹Basen suare nike, “Tulis léq dalem sopoq kitab napi saq side serioq, dait kirim tipaq pituq jemaah niki: Epesus, Smirna, Pergamus, Tiatira, Sardis, Piladelpia, dait Laodikia.”

¹²Tiang ngéngat andang mudi jari serioq sai nike saq ngeraos tipaq tiang. Terus tiang serioq pituq naé dilah saq tepiaq léman emas.

¹³ Léq tengaq-tengaq naé-naé dilah nike nganjeng sopoq dengan saq penggitan maraq Bije Manusie. Ie ngadu jubah saq bélone jangke cokor-Ne. Léq dade-Ne Ie ngadu tutup dade emas.

¹⁴ Sirah dait bulu-Ne putéq maraq bulu dombe, putéqne maraq salju. Penyermin-Ne nyale maraq api.

¹⁵ Cokor-Ne nyale maraq tembage saq tetunuq. Suare-Ne maraq belabur saq beléq gati.

¹⁶Gading-Ne saq kanan negel pituq bintang, dait léman cangkem-Ne sugul sopoq kléwang bemangan due saq merang gati. Penjarupan-Ne besinar maraq jelo léq waktu tengari.

¹⁷ Waktu tiang serioq Ie, tiang nyungkur léq arepan-Ne maraq dengan maté. Laguq Ie noloq gading-Ne saq kanan léq atas tiang beterus bemanik, “Ndaq takut! Tiang saq penembéq dait saq penutuq.

¹⁸Tiang niki saq idup! Tiang sampun ninggal, laguq silaq serioq; Tiang idup jangke selaéq-laéqne. Tiang bekuase léq kematéan, dait léq dunie dengan maté.

¹⁹Keranaq nike, tulis hal-hal saq side serioq, nike hal-hal saq araq mangkin niki, dait hal-hal saq gen telaksane éraq.

²⁰Niki rahasie léman pituq bintang saq side serioq léq ime kanan Tiang, dait léman pituq naé dilah emas nike: Pituq bintang nike pare malaékat kepituq jemaah, dait pituq naé dilah nike kepituq jemaah nike.”