Read KITAB SUCI ZABUR INJIL WAHYU 10 Bible Online

WAHYU 10 - KITAB SUCI ZABUR INJIL bible

WAHYU 10

¹Terus tiang serioq sopoq malaékat perkase saq lain turun léman sorge. Ie tekerubung siq awan, dait sopoq sabuk bidedari ngelingkerin ulune. Muene becahaye maraq jelo dait naéne maraq teken api.

²Léq imene araq sopoq gulungan kitab kodéq saq kebukaq. Naé kananne ngicaq segare, dait naé kirine léq darat.

³Terus ie bekuih siq suare saq beléq maraq suare singe-singe saq ngeraq. Sesampun malaékat nike bekuih, kepituq guntur bejawab siq suare saq beléq.

⁴Sesampun kepituq guntur nike besuare, tiang mélé nulis hal nike, laguq tiang dengah suare léman sorge, “Rahasieang napi saq tesampéang siq pituq guntur nike; ndaq tulis hal nike!”

⁵ Terus malaékat saq tiang serioq nganjeng léq segare dait léq darat nike ngangkat imene saq kanan ojok langit.

⁶Ie besumpah siq peséngan Allah saq idup selaéq-laéqne, saq cipteang langit, gumi dait segare dait selapuq saq araq léq dalemne. Basen malaékat nike, “Ndéq gen tetunde malik waktune!

⁷Laguq sewaktu malaékat kepituq niup terompétne, Allah gen ngelaksaneang rencane rahasie-Ne, maraq saq sampun Ie sampéang tipaq hambe-hambe-Ne, nike pare nabi.”

⁸ Beterus suare saq sampun tiang dengah léman sorge nike bebase malik léq tiang, “Silaq lumbar bait gulungan kitab saq kebukaq léq ime malaékat saq nganjeng léq segare dait léq darat nike.”

⁹Beterus tiang lalo ojok malaékat nike dait tunas adéq ie ngicanin tiang gulungan kitab nike. Malaékat nike bebase, “Silaq bait dait kelorang niki. Léq dalem tiande ie gen jari pait, laguq léq dalem biwihde ie manis maraq madulani.”

¹⁰Tiang bait gulungan kitab nike léman imene, terus tiang kelor. Léq biwih rasene maraq madulani, laguq sesampun tiang belet ie, léq dalem tian ie jari pait.

¹¹Beterus ie bebase léq tiang, “Sampéang karing sekali nubuat tipaq luwéq bangse, kaum, base, dait raje.”