Read KITAB SUCI ZABUR INJIL WAHYU 13 Bible Online

WAHYU 13 - KITAB SUCI ZABUR INJIL bible

WAHYU 13

¹ Beterus tiang serioq sopoq binatang sugul léman segare. Ie bedowé sepulu tanggéq dait pituq otak. Léq sebilang tanggéqne araq sopoq mahkote, dait léq sebilang otakne tetulis sopoq aran penghinean tipaq Allah.

² Binatang saq tiang serioq nike ruene maraq macan tutul, dait naéne maraq naé beruang, biwihne maraq biwih singe. Terus binatang nike tebéng siq nage nike kekuatanne mésaq, dait tahtene, dait kekuaseanne saq beléq.

³Sopoq léman kepituq otak binatang nike ruene maraq bakat saq sampun parah gati, laguq bakat nike sampun selah. Seantéro gumi jari takjub terus turut binatang nike.

⁴Dait ie pade nyembah nage nike séngaq ie sampun ngebéng kekuaseanne tipaq binatang nike. Dait ie pade nyembah binatang nike éndah. Basen ie pade, “Ndéq araq saq pade kance binatang niki! Ndéq araq saq bau perang ngelawan ie!”

⁵ Binatang nike teicanin biwih saq sombong gati dait menghine Allah. Ie teijinang mréntah petang dase due bulan ngonéqne.

⁶Terus ie mulai menghine Allah, dait peséngan Allah. Maraq nike éndah taoq Allah meneng, dait selapuq saq araq léq sorge éndah tehine.

⁷ Ie teijinang éndah ngelawan dengan-dengan saq tehususang bagi Allah dait ngalahang ie pade. Dait kekuasean léq selapuq suku, kaum, base, dait bangse teserahang léq ie.

⁸ Binatang nike gen tesembah siq selapuq dengan saq idup léq gumi, kecuali dengan-dengan saq aranne sampun tetulis sendéqman dunie tecipteang, léq dalem kitab kehidupan dowén Anak Dombe saq sampun tesembeléh.

⁹Keranaq nike, lamun side pade bedowé kentok jari dedengah, dengahang berite niki:

¹⁰ “Dengan saq harus tetahen, pasti gen tetahen. Dait dengan saq harus tematéq kadu kléwang, pasti gen tematéq kadu kléwang. Keranaq nike dengan-dengan saq tehususang bagi Allah harus tabah dait setie.”

¹¹Terus tiang serioq sopoq binatang lain sugul léman gumi. Ie bedowé due tanggéq maraq tanggéq anak dombe. Suarene maraq suare nage.

¹²Léq julu binatang saq penembéq nike ie kadu kekuaseanne saq beléq saq temauq léman binatang nike éndah. Seantéro gumi dait selapuq saq araq léq dalemne, ie paksaq nyembah binatang saq penembéq nike, saq sampun selah léman bakatne saq parah.

¹³Binatang saq kedue nike ngaraqang tande-tande saq ajaip. Léq julun selapuq dengan ie miaq api turun léman langit ojok gumi.

¹⁴Dait selapuq dengan saq idup léq gumi tesesatang siq tande-tande saq ie piaq léq julun binatang saq penembéq nike. Dait ie pade selapuq ie suruq miaq sopoq tetato léman binatang saq sampun bakat siq kléwang laguq tetep idup.

¹⁵Binatang saq kedue nike tebéng kuase jari ngebéng nyawe tipaq tetato nike, sehingge tetato nike tao ngeraos, dait nyematéq selapuq dengan saq ndéq mélé nyembah ie.

¹⁶Selapuq dengan, beléq dait kodéq, sugih dait miskin, hambe dait dengan merdéke, tepaksaq siq binatang nike jari nerimaq tande léq ime kanan ie pade atao léq telakar ie pade.

¹⁷Ndéq araq sopoq dengan juaq saq bau beli atao jual barang selain léman ie pade saq ngengadu tande nike, nike aran binatang nike mésaq, atao angke saq nyatayang aran nike.

¹⁸Léq dalem hal niki perlu araq hikmat. Dengan saq bijaksane tao ngerékéng angke binatang nike, séngaq angke nike aran sopoq manusie. Angkene nike enem ratus enem dase enem.