Read KITAB SUCI ZABUR INJIL WAHYU 15 Bible Online

WAHYU 15 - KITAB SUCI ZABUR INJIL bible

WAHYU 15

¹Beterus tiang serioq léq langit sopoq tande saq lain, saq ajaip dait luar biase gati. Araq pituq malaékat kance pituq bencane saq penutuq. Nike saq penutuqne Allah numpahang murke-Ne.

²Sesampun nike, araq tiang serioq maraq ruen segare kace becampur api. Tiang serioq éndah dengan-dengan saq sampun menang ngelawan binatang nike, tetatone nike dait angke saq jari tande binatang nike. Dengan-dengan saq menang nike nganjeng léq sedin segare kace sambil negel kecapi saq teicanin siq Allah tipaq ie pade.

³ Dait ie pade nyanyiang nyanyian Musa, hambe Allah, dait nyanyian Anak Dombe. Suarene: “Ya Allah, Tuhan Saq Mahekuase, agung dait ajaip gati karye-karye Deside! Raje selapuq bangse, adil dait kenaq tindakan-tindakan Deside!

⁴ Sai saq nénten takut léq Deside, ya Tuhan? Sai saq nénten kayun mulieang peséngan Deside? Deside doang saq suci. Selapuq bangse gen parek nyembah Deside lantaran keadilan Deside sampun tenyatayang tipaq selapuq dengan.”

⁵ Sesampun nike tiang serioq Gedéng Suci Allah léq sorge kebukaq, dait Kémah Tuhan araq léq dalemne.

⁶Terus kepituq malaékat kance kepituq bencane nike sugul léman Gedéng Suci Allah. Kelambi ie pade léman lénen saq bersi dait putéq ngempor. Dait ie pade kadu tutup dade saq tepiaq léman emas.

⁷Beterus salaq sopoq léman empat mahluk nike ngicanin tipaq kepituq malaékat nike pituq cawan emas saq penoq siq murke Allah, -- nike Allah saq idup selaéq-laéqne.

⁸ Make Gedéng Suci Allah nike penoq siq pendet kemuliean dait kuase Allah. Dait sengonéq kepituq bencane saq tejauq siq kepituq malaékat nike ndéqman tutuq, ndéq araq sopoq dengan juaq saq bau tame ojok dalem Gedéng Suci Allah.