Read KITAB SUCI ZABUR INJIL WAHYU 16 Bible Online

WAHYU 16 - KITAB SUCI ZABUR INJIL bible

WAHYU 16

¹Terus tiang dengah suare saq beléq léman dalem Gedéng Suci Allah bemanik tipaq kepituq malaékat nike, “Silaq lumbar dait tumpahang isi kepituq cawan murke Allah nike ojok gumi!”

² Malaékat saq penembéq lumbar, dait numpahang isi cawanne ojok gumi. Make tiwoq budun-budun saq nakutang dait bahaye léq selapuq dengan saq bedowé tande binatang nike, dait léq dengan-dengan saq nyembah tetatone.

³Sesampun nike malaékat kedue numpahang isi cawanne ojok segare. Make aiq segare jari daraq, maraq daraq dengan ninggal, dait maté éndah selapuq mahluk saq idup léq dalem segare.

⁴ Beterus malaékat saq ketelu numpahang isi cawanne ojok kokoq-kokoq dait ojok pengembulan-pengembulan aiq, make selapuq aiqne jari daraq.

⁵Tiang dengah malaékat saq bekuase léq aiq nike bebase, “Hukuman saq Deside turunang nike adil, Deside saq Mahesuci, Allah saq araq, dait saq sampun araq!

⁶Séngaq ie pade sampun numpahang daraq dengan-dengan saq tehususang bagi Allah dait daraq nabi-nabi; mangkin Deside ngicanin ie pade nginem daraq. Mule hal nike patut umaq ie pade!”

⁷Terus tiang dengah suare léman méje taoq kurban, “Ya Allah, Tuhan Saq Mahekuase, kenaq dait adil selapuq keputusan Deside!”

⁸Sesampun nike malaékat keempat numpahang isi cawanne ojok jelo, make jelo éndah teijinang ngotongang manusie siq api.

⁹Manusie tekotongang siq panas jelo saq keras nike, dait ie pade ngutuk peséngan Allah, saq bekuase léq bencane-bencane nike. Timaq maraq nike, ie pade ndéq mélé tobat léman dose-dose ie pade dait ndéq mélé mulieang Allah.

¹⁰ Terus malaékat kelime numpahang isi cawanne ojok tahte binatang nike. Make selapuq kerajaan binatang nike jari peteng, dait manusie ngakoq élaqne mésaq lantaran sakitan.

¹¹Terus ie pade ngutuk Allah léq sorge lantaran ie pade sakitan dait lantaran budun-budun ie pade. Laguq ie pade ndéq mélé éndah tobat léman perbuatan-perbuatan ie pade saq jahat.

¹² Sesampun nike malaékat keenem numpahang isi cawanne ojok kokoq Eprat saq beléq nike. Make kokoq nike gero sehingge raje-raje léman timuq bau liwat.

¹³Terus tiang serioq telu roh jahat saq ruene maraq lépang. Sopoq-sopoq lépang nike sugul léman biwih nage, léman biwih binatang, dait léman biwih nabi palsu.

¹⁴Ie pade roh-roh sétan saq miaq keajaipan-keajaipan. Ketelu roh nike lalo ojok selapuq raje léq seantéro dunie dait ngumpulang ie pade jari betempur léq jelo saq beléq, nike jelo Allah Saq Mahekuase.

¹⁵ “Pade dengahang! Tiang dateng maraq maling! Bahagie dengan saq tetep bejage-jage dait jagaq kelambine, sehingge ie ndéq lampaq bekelombas dait jari ilaq léq julun dengan luwéq!”

¹⁶ Beterus roh-roh nike ngumpulang raje-raje nike léq sopoq taoq saq dalem base Ibrani aranne Harmagedon.

¹⁷Sesampun nike malaékat kepituq numpahang isi cawanne ojok awang-awang. Make kedengahan suare saq beléq léman tahte léq Gedéng Suci Allah, “Sampun inggas!”

¹⁸ Terus araq kisap saling samber dait suare guntur saq begeruduk dait lindur saq beléq. Ndéq uwah araq lindur saq maraq nike léman manusie tecipteang. Niki lindur saq paling beléq!

¹⁹ Kote saq beléq nike towéq jari telu bagian, dait kote-kote bangse-bangse saq lain ancur. Terus Allah iling léq Babel saq beléq nike. Make Allah ngicanin ie nginem anggur léman cawan anggur murke-Ne.

²⁰ Selapuq pulao telang, dait selapuq gunung éndah musnah.

²¹ Ujan és saq beléq, saq sopoq-sopoq beratne séket kilo, geriq léman langit nimpe dengan-dengan. Make ie pade ngutuk Allah lantaran bencane ujan és saq beléq gati nike.