Read KITAB SUCI ZABUR INJIL WAHYU 18 Bible Online

WAHYU 18 - KITAB SUCI ZABUR INJIL bible

WAHYU 18

¹Sesampun nike tiang serioq sopoq malaékat saq lain turun léman sorge. Ie bedowé kekuasean saq beléq, dait kemulieanne miaq selapuq gumi jari menah.

² Siq suare saq beléq, ie bekuih, “Sampun runtuh! Babel beléq sampun runtuh! Mangkin ie jari taoq ndot sétan-sétan dait roh-roh jahat. Léq dalemne idup segale macem kedit saq najis dait saq temeriq siq dengan.

³ Séngaq selapuq bangse sampun nginem anggur napsu perbuatanne saq cabul. Raje-raje dunie gawéq perbuatan saq cabul kance ie, dait pedagang-pedagang léq gumi jari sugih siq napsune saq ndéq bau teandek.”

⁴ Terus tiang dengah suare saq lain léman sorge, “Pade sugul, umat Tiang! Sugul léman dalemne! Ndaq side pade turut dose-dosene, dait milu nanggung hukumanne!

⁵ Séngaq dosene betumpuk-tumpuk jangke dateng langit, dait Allah éndah iling léq kejahatanne.

⁶ Perlakuang ie maraq ie sampun perlakuang side pade; bales ie due kali lipet selapuq saq sampun ie laksaneang. Isiqang cawanne siq ineman saq due kali kerasan léman ineman saq ie sadangang umaq side pade.

⁷ Béng ie penderitean dait dukecite saq pade luwéqne kance kemuliean dait keméwahan saq ie béng tipaq diriqne mésaq. Séngaq ie tetep doang bebase léq diriqne, ‘Tiang niki ratu saq mréntah! Tiang ndéq bebalu; tiang ndéq gen ngalamin kesedihan!’

⁸Lantaran nike, make dalem sejelo doang ie gen tetimpe siq bahle -- penyakit, kesedihan, dait kelapahan. Dait ie gen tekotongang siq api, séngaq Tuhan Allah bekuase hakimin ie.”

⁹ Raje-raje dunie saq milu léq dalem perbuatan-perbuatan saq cabul dait idup léq dalem napsu dengan nine nike, gen tangisin dait éroq aséq léq kote nike lamun ie pade serioq pendet nyempuq léman api saq ngotongang ie.

¹⁰Ie pade gen nganjeng léman jaoq séngaq ie pade takut kene siq penderiteanne. Basen ie pade, “Aduh, celake gati kote saq kesohor niki -- kote Babel saq kuat! Dalem sejam doang hukumande sampun telaksaneang!”

¹¹ Pare pedagang léq gumi éndah nangis dait bedukecite lantaran dengan nine nike, séngaq ndéq araq sopoq dengan juaq saq bau malik beli barang-barang dagangan ie pade.

¹² Ndéq araq saq beli emas, perak, permate, dait mutiare ie pade; lakar lénen, lakar warne lempok lomaq, sutre dait lakar warne béaq toaq; segale macem kayuq saq sengéh ambune, barang-barang léman gading gajah dait léman kayuq-kayuq saq mahel-mahel, léman tembage, besi, dait pualam;

¹³léndong kayuq manis, ragi-ragian, sesengéhan, mur, dait menyan; anggur dait minyak, tepung dait gandum; sampi dait dombe, jaran dait keréte, hambe-hambe, malahan nyawe manusie.

¹⁴Pedagang-pedagang nike bebase léq dengan nine nike, “Selapuq saq side melétang sampun ndéq araq malik, dait selapuq saq solah dait méwah sampun telang. Side ndéq gen ndait ie malik!”

¹⁵ Pare pedagang saq sampun jari sugih lantaran bedagang léq kote nike gen nganjeng léman jaoq, séngaq ie pade takut kene siq penderiteanne. Ie pade gen nangis dait éroq aséq,

¹⁶terus bebase, “Aduh, celake gati kote saq kesohor niki! Biasene ie ngengadu kelambi lénen, lakar warne lempok lomaq dait lakar warne béaq toaq; biasene ie penoq siq periasan emas, permate, dait mutiare!

¹⁷ Laguq dalem sejam doang ie sampun kélangan selapuq kesugihanne nike!” Selapuq kapten kapal, penumpang, dait anak buah kapal, dait selapuq dengan saq pemétaqne léq segare, nganjeng léman jaoq.

¹⁸ Dait bekuih sewaktu ie pade serioq pendet nyempuq léman api saq julatang kote nike. Ie pade bekuih, “Ndéq uwah araq kote lain maraq kote saq beléq niki!”

¹⁹ Make ie pade sawur awu-awu léq ulu ie pade jari tande dukecite, terus nangis dait éroq aséq bekuih-kuih, “Aduh, celake gati kote saq beléq niki! Kesugihanne sampun miaq selapuq dengan saq bedowé kapal-kapal léq segare jari sugih! Laguq dalem sejam doang, ie sampun kélangan selapuq-lapuqne!”

²⁰ Hai sorge, pade besukecite lantaran keancuran kote nike! Hai dengan-dengan saq tehususang bagi Allah, rasul-rasul, dait nabi-nabi, pade besukecite! Séngaq Allah sampun ngukum ie jari pembalesan léq napi saq sampun ie laksaneang tipaq side pade!

²¹ Sesampun nike, sopoq malaékat saq perkase ngangkat sopoq batu -- saq beléqne maraq batu gilingan saq beléq terus tesaut ojok segare, dait bebase, “Maraq niki entane kote Babel saq kesohor nike gen tesaut sehingge ndéq gen tedait malik.

²² Suare kecapi, penyanyi-penyanyi, dait peniup-peniup suling dait terompét ndéq gen kedengahan malik léq dalemde, ndéq gen tedait éndah sopoq dengan saq ahli léq bidang kesenian léq derike, dait suare batu penggilingan éndah ndéq gen kedengahan malik.

²³Dengan ndéq gen serioq malik cahaye dilah léq dalemde; dait ndéq gen kedengahan éndah suare dengan begawé ngawinang léq derike. Pedagang-pedagang nike dengan-dengan saq paling tehormatin léq gumi, dait siq ilmu-ilmu séhérde side nipu selapuq bangse léq dunie!”

²⁴ Babel tehukum séngaq léq dalem kote nike sampun kendaitan daraq nabi-nabi, daraq dengan-dengan saq tehususang bagi Allah, dait daraq selapuq dengan saq sampun tematéq léq gumi.