Read KITAB SUCI ZABUR INJIL WAHYU 22 Bible Online

WAHYU 22 - KITAB SUCI ZABUR INJIL bible

WAHYU 22

¹ Tiang éndah tepetitoqang siq malaékat nike kokoq aiq kehidupan. Kokoq nike menéng maraq kristal dait ngélék léman tahte Allah dait tahte Anak Dombe nike,

² léq tengaq-tengaq langan kote nike. Léq sedi kokoq nike, léq sebilang sedine araq lolo-lolo kehidupan, saq bebuaq due olas kali setaun, sekali sebulan. Daunne tekadu jari nyelahang bangse-bangse.

³ Léq dalem kote nike ndéq araq napi juaq saq kene siq kutuk Allah. Tahte Allah dait tahte Anak Dombe nike gen araq léq dalem kote nike. Hambe-hambe-Ne gen ibadah tipaq Ie,

⁴dait serioq penjarupan-Ne. Peséngan-Ne gen tetulis léq telakar ie pade.

⁵ Ie pade ndéq gen merluang dilah atao cahaye jelo, séngaq kelem ndéq araq malik, dait Tuhan Allah mésaq gen menahin ie pade. Make ie pade gen mréntah jari raje selaéq-laéqne.

⁶Terus malaékat nike bebase léq tiang, “Manik-manik niki kenaq dait bau tepercaye. Tuhan Allah saq ngicanin Roh-Ne tipaq nabi-nabi, sampun ngutus malaékat-Ne jari nyatayang tipaq hambe-hambe-Ne napi saq harus becat telaksane.”

⁷“Setetune Tiang gen becat dateng! Bahagie dengan saq taat léq pesen-pesen nubuat dalem kitab niki!”

⁸Tiang, Yahya, sampun dengah dait serioq selapuqne niki. Sesampun tiang engkah serioq dait dengah ie, tiang nyungkur léq julun malaékat saq sampun nyatayang selapuqne nike tipaq tiang, dait tiang gen nyembah ie,

⁹laguq ie bebase léq tiang, “Ndaq! Ndaq nyembah tiang! Pade sembah Allah! Séngaq tiang éndah hambe pade maraq side, dait maraq semeton-semetonde pare nabi dait selapuq dengan saq taat léq pesen-pesen dalem kitab niki!”

¹⁰Terus ie bebase malik, “Ndaq rahasieang pesen-pesen nubuat léq dalem kitab niki, séngaq sampun rapet waktune selapuqne niki gen telaksane.

¹¹ Dengan saq jahat, alurang terus gawéq jahat; dengan saq najis, alurang najisang diriqne; dengan saq kenaq, alurang terus ngelaksaneang kebenaran, dait dengan saq idup husus bagi Allah, alurang terus idup husus bagi Allah.”

¹² “Setetune ndéqne ngonéq malik Tiang gen becat dateng dait jauq pahale jari bales sebilang dengan menurut perbuatanne.

¹³ Tiang niki saq penembéq dait saq penutuq; Tiang Tuhan léman Penembéq jangke Penutuq.”

¹⁴ Bahagie dengan saq popoq jubahne jangke bersi sehingge ie pade bedowé hak ngelorang buaq léman lolo kehidupan dait tame ojok dalem kote nike langan jebak beléqne.

¹⁵Laguq dengan-dengan saq ngelaksaneang hal-hal saq ékék, tukang-tukang séhér, dengan-dengan saq gawéq perbuatan saq cabul, saq nyematéq, saq nyembah berhale, dait dengan-dengan saq beduste, siq ucapan-ucapan atao siq perbuatan, selapuq dengan nike taoqne léq luah kote nike.

¹⁶ “Tiang, Isa, sampun ngirim malaékat Tiang tipaq side pade, adéq ie ngebéng kesaksian mengenai selapuq hal-hal niki jari kepentingan jemaah-jemaah. Tiang niki keturunan Daud; Tiang bintang timuq saq menah tandur nike.”

¹⁷ Roh Allah dait Pengantén Nine nike bebase, “Silaq!” Sebilang dengan saq dengah niki éndah harus ngucapang, “Silaq!”. Sai saq bedak, ie harus dateng! Dait sai saq melét, ie harus bait aiq kehidupan nike secare cume-cume.

¹⁸ Tipaq sebilang dengan saq dengah pesen-pesen nubuat léq dalem kitab niki, tiang, Yahya ngebéng kesaksian: “Lamun sopoq dengan ngeromboqang sopoq hal léq pesen-pesen nubuat niki, make Allah gen ngeromboqang tipaq ie bencane-bencane saq tetulis léq dalem kitab niki.

¹⁹Dait lamun sopoq dengan ngurangin sopoq hal léman pesen-pesen nubuat niki, make Allah éndah gen ngurangin bagianne maraq saq tetulis léq dalem kitab niki -- nike bagian léman lolo kehidupan dait léman kote suci nike.”

²⁰Ie saq ngicanin kesaksian mengenai selapuqne niki bemanik, “Kenaq, Tiang gen becat dateng!” Amin! Silaq rauh, Junjungan Saq Mulie Deside Isa!

²¹Rahmat Junjungan Saq Mulie Deside Isa araq bareng kance side selapuq! Amin.