Read KITAB SUCI ZABUR INJIL WAHYU 6 Bible Online

WAHYU 6 - KITAB SUCI ZABUR INJIL bible

WAHYU 6

¹Sesampun nike tiang serioq Anak Dombe nike bukaq ségel saq penembéq léq antare kepituq ségel nike. Terus tiang dengah sopoq léq antare keempat mahluk nike bebase, “Silaq!” Suare mahluk nike maraq suare guntur.

² Make tiang serioq, terus penggitan sopoq jaran putéq. Penunggangne negel sopoq panaq, dait ie teicanin sopoq mahkote. Terus ie maju sebagé pemenang jari ngerebut kemenangan.

³Beterus Anak Dombe nike bukaq ségel saq kedue, dait tiang dengah mahluk saq kedue bebase, “Silaq!”

⁴ Terus sopoq jaran saq lain sugul malik. Jaran nike béaq warnene. Penunggangne teicanin kuase jari bait damé sejahtere léman gumi, adéq manusie saling matéq. Make ie teicanin sopoq kléwang saq beléq.

⁵ Beterus Anak Dombe nike bukaq ségel saq ketelu. Dait tiang dengah mahluk saq ketelu bebase, “Silaq!” Make tiang serioq, terus penggitan sopoq jaran bideng. Penunggangne negel sepasang dacin léq imene.

⁶Dait tiang dengah maraq araq suare léq tengaq-tengaq keempat mahluk nike bebase, “Sekilo gandum saq solah, ajine maraq upaq sejelo, dait telu kilo gandum jenis saq lain ajine maraq upaq sejelo éndah. Laguq ndaq nyédaq minyak dait anggur nike!”

⁷Beterus Anak Dombe nike bukaq ségel saq keempat. Dait tiang dengah mahluk saq keempat bebase, “Silaq!”

⁸ Tiang serioq, terus penggitan sopoq jaran saq ijo kuning. Aran penunggangne Maut dait alam maut milu bareng kance ie. Deduaqne teicanin kuase jari nyematéq seperempat bagian gumi siq kléwang, siq kelapahan, siq wabah penyakit dait siq binatang-binatang buas saq araq léq gumi.

⁹Sesampun nike Anak Dombe nike bukaq ségel saq kelime. Make tiang serioq léq bawaq méje taoq kurban, araq jiwe-jiwe dengan-dengan saq ninggal tematéq lantaran Manik Allah dait lantaran kesaksian ie pade.

¹⁰Ie pade bekuih siq suare saq beléq, “Ya Tuhan Saq Mahekuase, saq suci dait kenaq! Pire ngonéq malik baruq Deside ngadilin penduduk gumi dait ngukum ie pade lantaran sampun nyematéq tiang pade?”

¹¹Ie pade sopoq-sopoq teicanin sopoq jubah saq putéq. Terus ie pade tesuruq mentelah semendaq, jangke sampun cukup jumlah batur-batur seperjuangan dait semeton-semeton ie pade saq gen tematéq maraq ie pade.

¹² Terus tiang serioq Anak Dombe nike bukaq ségel saq keenem. Araq lindur saq beléq gati. Jelo jari bideng maraq kéréng bideng saq kasar, dait bulan jari béaq maraq daraq.

¹³ Bintang-bintang roroq léman langit ojok gumi maraq buaq are saq masih odaq roroq léman lolone sewaktu tegerik siq angin pusut.

¹⁴ Langit keset maraq kertas tegulung, dait selapuq gunung dait pulao tegésér léman taoqne.

¹⁵ Terus raje-raje dunie, pare pembeléq, panglime-panglime, dengan-dengan sugih dait dengan-dengan bekuase, dait dengan-dengan saq lainne, hambe dait dengan merdéke, selapuqne nyeboq léq dalem goe-goe dait léq selak-selak batu gunung.

¹⁶ Tipaq gunung-gunung dait batu-batu nike ie pade bekuih, “Silaq endet tiang pade! Seboq tiang pade léman arepan Ie saq melinggih léq atas tahte, dait léman murke Anak Dombe nike!

¹⁷ Séngaq jelo murke saq dahsyat sampun dateng, sai saq bau tahen?”