Read KO E TOH TAPU KATOA TONGA KO SĒNESI 1 Bible Online

KO SĒNESI 1 - KO E TOH TAPU KATOA TONGA bible

KO SĒNESI 1

¹‘I he kamata‘anga na‘e fakatupu ‘e he ‘Otua ‘a e ngaahi langi mo māmani.[1]

²Pea na‘e maomaonganoa ‘a māmani mo lala;[2] pea na‘e fakapo‘uli ‘a e funga ‘o e loloto. Pea na‘e ‘ō‘ōfaki ‘e he Laumālie ‘o e ‘Otua[3] ki he fukahi vai.

³Pea folofola ‘a e ‘Otua, Ke maama mai: pea na‘e maama.

⁴Pea ‘afio ‘e he ‘Otua ki he maama, kuo lelei: pea na‘e vahe‘i ‘e he ‘Otua ‘a e maama mei he po‘uli.

⁵Pea na‘e fakahingoa ‘e he ‘Otua ‘a e maama ko e ‘Aho, pea ne fakahingoa ‘a e po‘uli ko e Pō. Pea na‘e efiafi, pea na‘e na‘e pongipongi; ko e ‘uluaki ‘aho ia.[4]

⁶Pea folofola ‘a e ‘Otua, Ke ai ha ‘atā ‘i he vaha‘a ‘o e ngaahi vai, mo vahe‘i ‘a e ngaahi vai mei he ngaahi vai.

⁷Pea na‘e ngaohi ‘e he ‘Otua ‘a e ‘atā, pea na‘a ne vahe‘i ai ‘a e ngaahi vai na‘e ‘i he lalo ‘atā mei he ngaahi vai na‘e mei ‘olunga ‘i he ‘atā: pea na‘e hoko ia.

⁸Pea na‘e fakahingoa ‘e he ‘Otua ‘a e ‘atā ko e Langi. Pea na‘e efiafi, pea na‘e pongipongi; ko hono ‘aho ua ia.

⁹Pea folofola ‘a e ‘Otua, Ke fakatahataha ‘a e ngaahi vai ‘oku ‘i he lalo langi ki ha potu pē taha, pea ke hā mai ‘a e mōmoa: pea na‘e hoko ia.

¹⁰Pea na‘e fakahingoa ‘e he ‘Otua ‘a e mōmoa ko e Fonua; pea ko e fakataha ‘o e ngaahi vai na‘a ne fakahingoa ko e tahi: pea na‘e ‘afio ki ai ‘a e ‘Otua, kuo lelei.

¹¹Pea na‘e folofola ‘e he ‘Otua, Ke fakatupu mai ‘e he fonua ‘a e me‘a laumata, ‘a e mohuku ‘oku ‘i ai hono tenga, ‘a e ‘akau fua, ‘a ia ‘oku takitaha ma‘ana hono fua, pea ‘i ai ha tenga — ke tu‘u ia ‘i he funga fonua: pea na‘e hoko ia.

¹²Pea na‘e ‘ohake ‘e he fonua ‘a e me‘a lau mata, ‘a e mohuku ‘oku ‘i ai hono tenga, ‘o takitaha ma‘ana, mo e ‘akau fua, ‘a ia ‘oku ‘i ai ha tenga, ‘o takitaha ma‘ana: pea na‘e ‘afio ‘a e ‘Otua, kuo lelei.

¹³Pea na‘e efiafi, pea na‘e pongipongi; ko hono ‘aho tolu ia.

¹⁴Pea folofola ‘a e ‘Otua, Ke ai ha ngaahi māma‘anga ‘i he ‘atā ‘o e langi mo vahe‘i ‘a e ‘aho mei he pō: pea ke tu‘u mo‘o ngaahi faka‘ilonga, pea mo‘o ngaahi kuonga, pea mo‘o ngaahi ‘aho mo ngaahi ta‘u:

¹⁵pea ke tu‘u mo‘o ngaahi māma‘anga ‘i he ‘atā ‘o e langi ke fakamaama ki māmani: pea na‘e hoko ia.

¹⁶Pea na‘e ngaohi ‘e he ‘Otua ‘a e ongo māma‘anga lalahi; ko e māma‘anga lahi ke pule ki he ‘aho mo māma‘anga si‘i[5] ke pule ki he pō,

¹⁷mo e ngaahi fetu‘u foki. Pea na‘e tuku kinautolu ‘e he ‘Otua ‘i he ‘atā ‘o e langi ke fakamaama ki māmani.

¹⁸Pea ke pule ki he ‘aho mo e pō, pea ke vahe‘i ‘a e maama mei he po‘uli. Pea na‘e ‘afio ki ai ‘a e ‘Otua, kuo lelei.

¹⁹Pea na‘e efiafi, pea na‘e pongipongi; ko hono ‘aho fā ia.

²⁰Pea folofola ‘a e ‘Otua, Ke ngaue ‘a e ngaahi vai ‘i he me‘a mo‘ui ‘oku ngaolo, pea ke puna ‘a e manupuna ‘i he funga fonua mo e mata ‘o e langi.

²¹Pea na‘e fakatupu ‘e he ‘Otua ‘a e fa‘ahinga tanini lalahi, mo e me‘a mo‘ui kotoa pē ‘oku totolo, ‘a ia ‘oku ngāue ai ‘a e ngaahi vai, ‘o takitaha ‘i hono fa‘ahinga; pea mo e manupuna ‘oku kapakau, ‘o fakafa‘ahinga: pea na‘e ‘afio ki ai ‘a e ‘Otua, kuo lelei.

²²Pea na‘e tāpuaki‘i kinautolu ‘e he ‘Otua, ‘o pehē, Mou fua, mo fakatokolahi, mo fakafonu ‘a e ngaahi tahi, pea ke tokolahi ‘a e manupuna ‘i he fonua.

²³Pea na‘e efiafi, pea na‘e pongipongi; ko hono ‘aho nima ia.

²⁴Pea folofola ‘a e ‘Otua, Ke ‘ohake ‘e he fonua ‘a e me‘a mo‘ui, ‘o fakafa‘ahinga; ‘a e manu lalata, mo e manu totolo, mo e manu kaivao, ‘o takitaha ma‘ana: pea na‘e hoko ia.

²⁵Pea na‘e ngaohi ‘e he ‘Otua ‘a e manu kaivao, ‘o fakafa‘ahinga pē, mo e manu lalata ‘o fakafa‘ahinga, mo e me‘a kotoa pē ‘oku totolo ‘i he kelekele, ‘o fakafa‘ahinga: pea ‘afio ki ai ‘a e ‘Otua, kuo lelei.

²⁶Pea folofola ‘a e ‘Otua, Tau ngaohi tangata ‘i hotau ‘īmisi, ‘o fa‘ifa‘itaki ki hotau anga: pea ke nau pule ki he ika ‘o e tahi, mo e manupuna ‘o e ‘atā, mo e manu lalata, ‘io, mo ‘uta kātoa; pea mo e fa‘ahinga totolo ‘oku totolo ‘i he funga fonua.

²⁷Pea na‘e fakatupu ‘e he ‘Otua ‘a e tangata ‘i he ‘īmisi ‘o‘ona, ‘io, ‘i he ‘īmisi ‘o e ‘Otua na‘a ne fakatupu ia; na‘a ne fakatupu ‘a kinaua ko e tangata mo e fefine.

²⁸Pea na‘e tāpuaki‘i ‘a kinaua ‘e he ‘Otua, pea na‘e folofola kiate kinaua ‘e he ‘Otua, ‘o pehē, Mo fakatupu, mo fakatokolahi, mo fakafonu ‘a māmani, pea ikuna ia: pea mo pule ki he ika ‘o e tahi, mo e manupuna ‘o e langi, pea mo e me‘a mo‘ui kotoa pē ‘oku totolo ‘i he fonua.

²⁹Pea folofola ‘a e ‘Otua, Ko eni kuo u ‘atu kiate kimoutolu ‘a e mohuku kotoa pē ‘oku ‘i ai hono tenga ‘i he funga ‘o māmani kātoa, pea mo e ‘akau fuli pē ‘a ia ‘oku ‘i ai ha fua‘i ‘akau mo hono tenga: ko ho‘omou me‘akai ia.

³⁰Pea ki he manu kotoa pē ‘o ‘uta, mo e manupuna kotoa pē ‘o e ‘atā, pea ki he me‘a kotoa pē ‘oku totolo ‘i he fonua, ‘a ‘ia ‘oku ‘i ai ha‘ane mo‘ui, kuo u ‘atu ki ai ‘a e fa‘ahinga mohuku kehekehe ma‘anau me‘akai: pea na‘e hoko ia.

³¹Pea na‘e ‘afio ‘a e ‘Otua ki he me‘a kotoa pē kuo ne ngaohi, pea tā kuo lelei ‘aupito. Pea na‘e efiafi, pea na‘e pongipongi; ko hono ‘aho ono ia.