Read KO E TOH TAPU KATOA TONGA KO SĒNESI 11 Bible Online

KO SĒNESI 11 - KO E TOH TAPU KATOA TONGA bible

KO SĒNESI 11

¹PEA na‘e ngutu taha pē ‘a e fonua kotoa, mo lea taha.

²Pea ‘i he faifai pea nau fononga mei hahake, pea nau ‘ilo ha toafa ‘i he fonua ko Saina; ‘o nau nofo ai.

³Pea nau fepehē‘aki; ‘Ē, tau ngaohi maka ‘umea mu‘a, ‘o mātu‘aki ta‘o ke moho. Pea nau maka ‘aki ‘a e maka ‘umea, mo nau lahe ‘aki ‘a e kelepulu.

⁴Pea nau pehē, ‘Ē, tau langa mu‘a ha‘atau kolo, mo ha taua ke tau ki langi, pea tau ‘ai ke ‘iloa hotau hingoa, na‘a tau movete ‘i he funga ‘o māmani.

⁵Pea hā‘ele hifo ‘a Sihova ke ‘afio‘i ‘a e kolo mo e taua na‘e langa ‘e he ha‘a ‘Ātama.

⁶Pea folofola ‘a Sihova: Vakai, ko e kakai pē taha kinautolu, pea lea taha; pea ko ‘enau kamata pē ē; pea ka hili ‘eni tala‘ehai ‘e mata‘ofi kinautolu mei ha me‘a ange te nau fakakaukau ke fai.

⁷‘Ē, tau ō hifo mu‘a, ‘o veuveuki ‘enau lea ke ‘oua te nau fe‘iloaki lea.

⁸Pea na‘e veteki kinautolu ‘e Sihova mei he potu ko ia ke nofo‘i ‘a e fonua kotoa; pea na‘a nau tuku ‘a e langa ‘o e kolo.

⁹Ko hono ‘uhinga ia na‘e fakahingoa ai ia ko Pēpeli (ko Maveuveu);[33] koe‘uhi ko e potu ia na‘e veuveuki ai ‘e Sihova ‘a e lea ‘a māmani, pea ko e potu ia na‘e vetekina mei ai ‘a e kakai ‘e Sihova ke nofo‘i ‘a e fonua kotoa.

¹⁰Ko e tohi eni ‘o e hako ‘o Semi: Kuo fe‘unga ‘a Semi mo e ta‘u ‘e teau pea ne ma‘u ha foha ko ‘Afakisate ‘i hono ua ‘o e ta‘u hili ‘a e Lōmaki;

¹¹pea mo‘ui atu ‘a Semi hili ‘ene ma‘u ‘a ‘Afakisate ko e ta‘u ‘e nimangeau, pea ne ma‘u mo ha ngaahi foha mo ha ngaahi ‘ōfefine.

¹²Pea ko ‘Afakisate ne mo‘ui ia ko e ta‘u ‘e teau mo e ta‘u ‘e tolungofulu mā nima, pea ne ma‘u ha foha ko Sala:

¹³pea mo‘ui atu ‘a ‘Afakisate hili ‘ene ma‘u ‘a Sala ko e ta‘u ‘e fāngeau mo e ta‘u ‘e tolu; pea ne ma‘u mo ha ngaahi foha mo ha ngaahi ‘ōfefine.

¹⁴Pea ko Sala ne mo‘ui ia ko e ta‘u ‘e teau mo e ta‘u ‘e tolungofulu, pea ne ma‘u ha foha ko Hepelū;

¹⁵pea mo‘ui atu ‘a Sala hili ‘ene ma‘u ‘a Hepelū ko e ta‘u ‘e tolungeau mo e ta‘u ‘e tolu; pea ne ma‘u mo ha ngaahi foha mo ha ngaahi ‘ōfefine.

¹⁶Pea kuo mo‘ui ‘a Hepelū ko e ta‘u ‘e teau mo e ta‘u ‘e tolungofulu mā fā, pea ne ma‘u ha foha ko Pēleki;

¹⁷pea mo‘ui atu ‘a Hepelū hili ‘ene ma‘u ‘a Pēleki ko e ta‘u ‘e uangeau mo e ta‘u ‘e fitungofulu; pea ne ma‘u mo ha ngaahi foha mo ha ngaahi ‘ōfefine.

¹⁸Pea kuo mo‘ui ‘a Pēleki ko e ta‘u ‘e teau mo e ta‘u ‘e tolungofulu, pea ne ma‘u ha foha ko Le‘u:

¹⁹pea mo‘ui atu ‘a Pēleki hili ene ma‘u ‘a Le‘u ko e ta‘u ‘e uangeau mo e ta‘u ‘e hiva, pea ne ma‘u mo ha ngaahi foha mo ha ngaahi ‘ōfefine.

²⁰Pea kuo mo‘ui ‘a Le‘u ko e ta‘u ‘e teau mo e ta‘u ‘e tolungofulu mā ua, pea ne ma‘u ha foha ko Sēluki:

²¹pea mo‘ui atu ‘a Le‘u hili ‘ene ma‘u ‘a Sēluki ko e ta‘u ‘e uangeau mo e ta‘u ‘e fitu pea ne ma‘u mo ha ngaahi foha mo ha ngaahi ‘ōfefine.

²²Pea kuo mo‘ui ‘a Sēluki ko e ta‘u ‘e teau mo e ta‘u ‘e tolungofulu, pea ne ma‘u ha foha ko Nēhoa:

²³pea mo‘ui atu ‘a Sēluki hili ‘ene ma‘u ‘a Nēhoa ko e ta‘u ‘e uangeau; pea ne ma‘u mo ha ngaahi foha mo ha ngaahi ‘ōfefine.

²⁴Pea kuo mo‘ui ‘a Nēhoa ko e ta‘u ‘e fitungofulu mā hiva pea ne ma‘u ha foha ko Tela;

²⁵pea mo‘ui atu ‘a Nēhoa hili ‘ene ma‘u ‘a Tela ko e ta‘u ‘e teau mo e ta‘u ‘e hongofulu mā hiva; pea ne ma‘u mo ha ngaahi foha mo ha ngaahi ‘ōfefine.

²⁶Pea kuo mo‘ui ‘a Tela ko e ta‘u ‘e fitungofulu pea ai ‘ene fānau, ko ‘Epalame, mo Nēhoa, pea mo Hēlani.

²⁷Ko e tohi eni ‘o e hako ‘o Tela. Na‘e ma‘u fānau ‘a Tela, ko ‘Epalame, mo Nēhoa, mo Hēlani; pea ma‘u ‘e Hēlani ha foha ko Lote.

²⁸Pea na‘e motu‘a pekia ‘a Hēlani ‘ia Tela ko ‘ene tamai ‘i he fonua na‘e fanau‘i ai ia, ‘a ia ko ‘Ua ‘o e kau Kalitia.

²⁹Pea na‘e fakauaifi ‘a ‘Epalame mo Nēhoa: ko e hingoa ‘o e uaifi ‘o ‘Epalame ko Sēlai; pea ko e hingoa ‘o e uaifi ‘o Nēhoa ko Milika; ko e ‘ōfefine ia ‘o Hēlani, ‘a ia ko e tamai ‘a Milika, mo e tamai ‘a ‘Īsika.

³⁰Pea ko Sēlai na‘e pa‘a; na‘e ‘ikai ha‘ane tama.

³¹Pea ‘ave ‘e Tela ‘a hono foha ko ‘Epalame, mo hono mokopuna ko Lote, ko e foha ‘o Hēlani, pea mo Sēlai ko hono ‘ōfefine he ko e uaifi ‘o hono foha ko ‘Epalame; pea na‘a nau ‘alu fakataha mei ‘Ua ‘o e kau Kalitia ko ‘enau fononga ki he fonua ko Kēnani; pea nau a‘u ki Kālana ‘o nofo ai.

³²Pea ko e motu‘a ‘o Tela ko e ta‘u ‘e uangeau mo e ta‘u ‘e nima; pea pekia ‘a Tela ‘i Kālana.