Read KO E TOH TAPU KATOA TONGA KO SĒNESI 13 Bible Online

KO SĒNESI 13 - KO E TOH TAPU KATOA TONGA bible

KO SĒNESI 13

¹PEA ‘alu hake ‘a ‘Epalame mei ‘Isipite ki he feitu‘u ko Tonga, ‘a ia mo hono uaifi mo ‘ene me‘a kotoa pē; pea na‘e ō mo ia foki ‘a Lote.

²Pea na‘e moū ‘aupito ‘a ‘Epalame ‘i he fanga manu, pea ‘i he siliva mo e koula.

³Pea ne hikihiki holo mei Tonga, ‘o ne a‘u ki Pēteli, ki he potu na‘e tu‘u ai hono tēniti ‘i mu‘a, ‘i he vaha‘a ‘o Pēteli mo ‘Ai,

⁴‘a e potu na‘e tu‘u ai ‘a e ‘ōlita ne ne ngaohi ‘i he kamata anga: pea na‘e fai ai ‘e ‘Epalame ‘ene lotu ‘i he huafa ‘o Sihova.

⁵Pea ko Lote foki ‘a ia na‘e ‘alu ‘ia ‘Epalame, na‘a ne sipi‘ia mo pulu‘ia mo tēniti‘ia.

⁶Pea na‘e ‘ikai utangi kinaua ‘e he fonua, ke na nofo fakataha; he ko ‘ena koloa na‘e lahi, ko ia na‘e ‘ikai te na lava ke nofo fakataha.

⁷Pea na‘e faifai pea kē ‘a e kau tauhi manu ‘a ‘Epalame mo e kau tauhi manu ‘a Lote; ko ha‘a Kēnani foki mo ha‘a Pēlisi na‘e nofo ‘i he fonua ‘i he kuonga ko ia.

⁸Pea lea ‘a ‘Epalame kia Lote, ‘Ā, ‘oua na‘a ta kē kitaua, pe ko ‘eta kau tauhi manu; he ‘oku ta kāinga.

⁹‘Ikai ko ena ‘a e fonua kotoa ke ke fa‘iteliha ki ai? Ta māvae mu‘a mo au: kapau te ke fakato‘ohema koe, pea u to‘omata‘u au; pea kapau te ke fakato‘omata‘u, pea te u fakato‘ohema.

¹⁰Pea tāngaki hake ‘a Lote, ‘o ne vakai ki he Seakale ‘o Soatani, ‘o fakapehē atu ki Soa, tā ‘oku mohu vai hono kotoa (kuo te‘eki maumau ‘e Sihova ‘a Sōtoma mo Komola); ‘io, na‘e hangē ko e ngouetapu ‘a Sihova,[35] pe hangē ko e fonua ko ‘Isipite.

¹¹Pea fili ‘e Lote mo‘ona ‘a e Seakale ‘o Soatani, pea na‘e hiki ‘a Lote ki hahake, ‘o na māvae.

¹²Ko ‘Epalame na‘a ne nofo ‘i he fonua ko Kēnani, ka ka nofo ‘a Lote ‘i he ngaahi kolo ‘o e seakale, pea ne hikihiki tēniti ‘o a‘u ki Sōtoma.

¹³Ka ko e kakai Sōtoma ko e fa‘ahinga na‘e kovi mo fai angahala ‘aupito kia Sihova.

¹⁴Pea folofola ‘a Sihova kia ‘Epalame, hili ‘a e mahu‘i ‘a Lote meiate ia, Siini! Tāngaki hake, ‘o sio mei he potu ‘oku ke ‘i ai ki he tokelau mo e tonga mo hahake mo hihifo:

¹⁵he ko e fonua kotoa ‘oku ke sio ki ai te u ‘atu mo‘ou, pea mo ho hako ‘o ta‘engata.

¹⁶Pea te u ngaohi ho hako ke hangē ko e efu ‘o e fonua: ‘io, ka toki lava ‘e ha taha ke lau ‘a e efu ‘o e fonua, pea ‘e toki malau ho hako foki.

¹⁷Tu‘u, pea foli ‘a e fonua, ‘a hono lōloa mo hono māukupu; he te u ‘atu ia mo‘ou.

¹⁸Pea hikihiki tēniti ai ‘e ‘Epalame, ‘o ne ha‘u ‘o nofo ‘i he ‘ulu ‘oke ‘o Mamilī ‘a ia ‘oku ‘i Hepeloni; ‘o ne langa ai ha ‘ōlita kia Sihova.