Read KO E TOH TAPU KATOA TONGA KO SĒNESI 14 Bible Online

KO SĒNESI 14 - KO E TOH TAPU KATOA TONGA bible

KO SĒNESI 14

¹TOKUA ‘i he kuonga ‘o ‘Amilafeli ko e Tu‘i Saina, mo ‘Alioke ko e Tu‘i ‘Ēlasa, mo Kotololokoma ko e Tu‘i Lami, mo Tītale ko e Tu‘i Koimi,

²na‘e tau ‘a kinautolu ni mo Pela ko e Tu‘i Sōtoma, mo Pīlesa ko e Tu‘i Komola, mo Sīnape ko e Tu‘i ‘Ātima, mo Sēmepa ko e Tu‘i Sipoimi, mo e tu‘i ‘o Pela ‘a ia ko Soa.

³Na‘e fakakautaha ‘a kinautolu ni, ‘o nau omi ki he talalo ko Sītimi, ‘a ia ko e Tahi Māsima.

⁴Ko e ta‘u ‘e hongofulu mā ua na‘a nau nofo kia Kotololokoma, ka ‘i hono hongofulu mā tolu ‘o e ta‘u na‘a nau tu‘u.

⁵Pea ‘i hono hongofulu mā fā ‘o e ta‘u na‘e omi ‘a Kotololokoma mo e ngaahi tu‘i na‘e kau mo ia, ‘o nau haha ‘a e Lifaimi ‘i ‘Asiteloti Ka‘anaimi, mo e ha‘a Susi ‘i Hami, mo e ha‘a ‘Emi ‘i Save Kiliataimi.

⁶Kae‘uma‘ā ‘a ha‘a Holi ‘i honau mo‘unga ko Seia, ‘o a‘u atu ki ‘Eli-Pēlana ‘a ia ‘oku ‘i he ve‘e toafa.

⁷Pea nau foki hake ai, ‘o nau a‘u ki ‘Eni-misipate, ‘a ia kuo Kētesi; pea nau haha ‘a e fonua kotoa ‘o ha‘a ‘Amaleki; pea mo ha‘a ‘Āmoli, ‘a ia na‘a nau nofo ‘i Hasasoni Tamali.

⁸Pea ō atu ‘a e Tu‘i Sōtoma mo e Tu‘i Komola mo e Tu‘i ‘Ātima mo e Tu‘i Sipoimi mo e tui ‘o Pela, ‘a ia kuo Soa, pea nau fakatē ‘enau tau kiate kinautolu ‘i he talalo ko Sītimi.

⁹‘io, kia Kotololokoma ko e Tu‘i ‘Īlami, mo Tītale ko e Tu‘i Koimi, mo ‘Amilafeli ko e Tu‘i Saina, pea mo ‘Alioke ko e Tu‘i ‘Ēlasa; ko e tu‘i ‘e toko fā ki he tu‘i ‘e toko nima.

¹⁰Pea ko e talalo ko Sītimi na‘e lahi ai ‘a e toka‘anga kelepulu; pea feholaki ‘a e ongo tu‘i ‘o Sōtoma mo Komola, ‘o na tō ai; pea ‘ilonga ha toe na‘e hola ki he mo‘unga.

¹¹Pea nau fetuku ‘a e koloa ‘o Sōtoma mo Komola, mo ‘enau me‘akai, pea nau ‘alu.

¹²Na‘a nau ‘ave foki ‘ā Lote ko e foha ‘o e tokoua ‘o ‘Epalame, pea mo ‘ene koloa, pea nau ‘alu mo kinautolu: he kuo ne nofo fonua ‘i Sōtoma.

¹³Pea ha‘u ha tokotaha na‘e hao mai, ‘o ne faka‘ilo kia ‘Epalame ko e matāpule Hepelū, he na‘e ‘apitanga ia ‘i he ‘ulu ‘oke ‘o Mamilī, ‘a ia ko ha matāpule ‘Āmoli, ko e tokoua ‘o ‘Esikoli mo e tokoua foki ‘o ‘Āneli: pea ko kinautolu na‘e ai ‘enau taliti mo ‘Epalame.

¹⁴Pea ‘i he fanongo ‘e ‘Epalame kuo taki pōpula hono tokoua, na‘a ne fakateholo atu mo ‘ene kau tau, ko e kakai tonu ‘o hono ‘api, ko e toko tolungeau mo e toko hongofulu mā valu, pea ne tuli ‘o a‘u ki Tani.

¹⁵Pea ne vahevahe ‘ene tau, ‘o ne ‘ohofi po‘uli kinautolu, ‘e ia mo ‘ene kau tamaio‘eiki; pea ne taa‘i kinautolu, ‘o ne tuli ‘o a‘u ki Hopa, ‘a ia ‘oku tu‘u ki he tokelau ‘o Tāmasikusi.

¹⁶Pea ne foki mai mo ia ‘a e koloa kotoa, kae‘uma‘ā ‘a Lote ko hono tokoua, pea ne toe ‘omi ‘ene koloa, mo e kau fefine foki, mo e kakai.

¹⁷Pea ‘alu atu ‘a e Tu‘i Sōtoma ke fakafetaulaki kiate ia ‘i he‘ene foki mai mei he taa‘i ‘o Kotololokoma mo e ngaahi tu‘i na‘e kau mo ia; pea ne a‘u ki he talalo ko Save, ‘a ia ko e Talalo ‘a Tu‘i.

¹⁸Pea ko Melekiseteki ko e Tu‘i Salema, na‘a ne ‘alu atu mo ia ‘a e mā mo e uaine, pea ko e taula‘eiki ia ‘o e ‘Otua Taupotu.

¹⁹Pea ne tāpuaki‘i ia, ‘o ne pehē, Ke fakamonū‘ia ‘a ‘Epalame ‘e he ‘Otua Taupotu, ko ‘ene me‘a ‘a Langi mo Māmani.

²⁰Pea mālō mu‘a mo e ‘Otua Taupotu kuo ne tuku ho ngaahi fili ke ke fa‘iteliha ai. Pea ne ‘atu hono ‘inasi ko e vahe hongofulu ‘o e me‘a kotoa pē.

²¹Pea me‘a ‘e he Tu‘i Sōtoma kia ‘Epalame, Tuku mai ‘a e kakai pē, ka ke ma‘u ‘e koe ‘a e koloa.

²²Pea pehē ‘e ‘Epalame ki he Tu‘i Sōtoma, Na‘a ku hiki hoku nima kia Sihova ko e ‘Otua Taupotu, ‘a ia ko ‘ene me‘a ‘a Langi mo Māmani;

²³‘Ilo ‘e ‘au ‘o kapau te u to‘o ha tu‘oni filo pe tau sū ‘i he me‘a ‘oku ‘a‘au, na‘a ‘iloange te ke lau, Ko au kuo koloa‘ia ai ‘a ‘Epalame.

²⁴Ngata pē ‘i he me‘a kuo kai ‘e he kau siana ni; ‘io, mo e ‘inasi ‘o e tu‘unga me‘a na‘a mau ō mo au, ‘a ‘Āneli mo ‘Esikoli mo Mamilī; ko kinautolu te nau to‘o honau ‘inasi.