Read KO E TOH TAPU KATOA TONGA KO SĒNESI 15 Bible Online

KO SĒNESI 15 - KO E TOH TAPU KATOA TONGA bible

KO SĒNESI 15

¹HILI ‘a e ngaahi me‘a ko ia na‘e hoko ‘a e folofola ‘a Sihova kia ‘Epalame ‘i ha vīsone, ‘o pehē, ‘Epalame, ‘oua na‘a ke manavasi‘i: ko au ko ho‘o pā, ‘e lahi ‘aupito ho‘o totongi.[36]

²Pea pehē ‘e ‘Epalame ‘Ēī Sihova, ko e hā te ke ‘omi? he ko ‘eku hiki pa‘a eni, pea ko e matāpule ‘o hoku ‘api ko e tama Tāmasikusi[37] ko ‘Eliesa.

³Na‘e pehē foki ‘e ‘Epalame, Ko eni kuo ‘ikai te ke ‘omi haku hako: pea vakai ko e tokotaha ‘i hoku kau nofo‘anga te ne ‘ea kiate au.

⁴Pea ‘iloange na‘e hoko kiate ia ‘a e folofola ‘a Sihova, ‘o pehē, ‘Oku ‘ikai ko eni ia te ne ‘ea kiate koe; kaekehe, ko e tokotaha ‘e ha‘u mei ho mānava, ko ia ia te ne ‘ea kiate koe.

⁵Pea ne taki ia kitu‘a, ‘o ne me‘a mai, Hanga hake ā ki langi, pea lau ‘a e ngaahi fetu‘u pe te ke lava hono lau: pea ne folofola kiate ia, ‘E pehē ho hako.

⁶Pea ne tui kia Sihova: pea ne lau ia ma‘ane mā‘oni‘oni.

⁷Pea ne folofola kiate ia, Ko Sihova au, ko au na‘a ku ‘omi koe mei ‘Ua ‘o e kau Kalitia ke ‘atu ‘a e fonua ni mo‘ao tofi‘a.

⁸Pea pehē ‘e ia, ‘Ēī Sihova, te u ‘ilo ‘i he hā te u ma‘u ia?

⁹Pea ne folofola mai, ‘Omi ma‘aku ha pulu fefine ‘oku tolu ta‘u, mo ha kosi fefine ‘oku tolu ta‘u, mo ha sipi tangata ‘oku tolu ta‘u, mo ha kulukulu mo ha lupe mui.

¹⁰Pea ne ‘omi ma‘a ‘Ene ‘Afio ‘a e ngaahi me‘a ko ia kotoa; pea ne fahi ua kinautolu, ‘o tuku fakafeangai ‘a e ngaahi fa‘ahi; ka ko e ongo manupuna na‘e ‘ikai te ne fahi‘i.

¹¹Pea ‘i he hifo mai ‘a e fanga manupuna ke kai ‘a e ngaahi konga manu, na‘e fakahe‘e kinautolu ‘e ‘Epalame.

¹²Pea ‘i he hifo ‘a e la‘ā na‘e tō ha mohe ma‘u kia ‘Epalame; pea ‘iloange na‘a ne vavana, he hoko ha po‘uli kehe kiate ia.

¹³Pea ne folofola kia ‘Epalame, Ke ke mātu‘aki ‘ilo ‘e nofo muli ‘a ho hako ‘i ha fonua ‘oku ‘ikai ‘onautolu; pea te nau ngāue ki he kakai ko ia; ‘a ia te nau ngaohikovi‘i kinautolu ‘o fāngeau ta‘u:

¹⁴ko ia foki ko e kakai te nau ngāue ki ai te u fakamāu‘i ia ‘e au, pea hili ia te nau ‘alu atu mo e koloa lahi.

¹⁵Ka ko koe te ke ‘alu fiemālie pē ki ho‘o ngaahi kui, ‘e tanu koe kuo ke toulekeleka ‘aupito.

¹⁶Pea ‘i hono fā ‘o e to‘utangata te nau foki mai: he kuo te‘eki ke lato ‘a e kovi ‘a e ha‘a ‘Āmoli.

¹⁷Pea faifai pea tō ‘a e la‘ā, pea po‘uli matolu; pea ‘iloange ko ha ‘ōvani ‘oku kohu mo ha ulo‘i afi ‘oku hā‘ele atu ‘i he vaha‘a ‘o e ngaahi konga manu ko ia.

¹⁸‘I he taimi ko ia na‘e fai fuakava ‘e Sihova mo ‘Epalame, ‘o pehē, Kuo u ‘atu ki ho hako ‘a e fonua, ko eni, mei he vaitafe ‘o ‘Isipite ‘o a‘u ki he vaitafe lahi ko ‘Eufaletesi;

¹⁹‘a e ha‘a Keini, mo e ha‘a Kēnasi, mo e ha‘a Katemoni,

²⁰mo e ha‘a Heti, mo e ha‘a Pēlisi, mo e ha‘a Lifaimi,

²¹mo e ha‘a ‘Āmoli, mo e ha‘a Kēnani, mo e ha‘a Kilikesa, mo e ha‘a Siepusi.