Read KO E TOH TAPU KATOA TONGA KO SĒNESI 16 Bible Online

KO SĒNESI 16 - KO E TOH TAPU KATOA TONGA bible

KO SĒNESI 16

¹PEA ko Sēlai ko e uaifi ‘o ‘Epalame na‘e ‘ikai ha‘ane tama kiate ia: ka na‘e ai ‘ene kaunanga ko e fefine ‘Isipite, pea ko hono hingoa ko Heka‘ā.

²Pea lea ‘a Sēlai kia ‘Epalame, ‘Eni, vakai kuo ta‘ofi au ‘e Sihova mei he fanau; ke ke ‘alu ki he‘eku kaunanga, hei‘ilo te u fanau ‘iate ia. Pea tuitala ‘a ‘Epalame ki he lea ‘a Sēlai.

³Pea ‘ave ‘e Sēlai, ko e uaifi ‘o ‘Epalame, ‘a Heka‘ā ko e fefine ‘Isipite ko ‘ene kaunanga, ‘o ne tuku ia kia ‘Epalame ko hono husepāniti ko ‘ene fokonofo: ko hono ‘osi ia ‘o e hongofulu ta‘u ‘o e nofo ‘a ‘Epalame ‘i he fonua ko Kēnani.

⁴Pea ne ‘alu kia Heka‘ā, pea feitama ia: pea ‘i he vakai ‘a e fefine kuo ne feitama, na‘a ne ta‘etoka‘i ‘ene fine‘eiki.

⁵Pea lea ‘a Sēlai kia ‘Epalame, Ke ‘eke mai kiate koe hoku tautekovia,[38] Na‘a ku ‘atu ‘iate au ‘eku kaunanga ki ho fatafata, pea ‘i he‘ene vakai kuo ne feitama, pea ne ta‘etoka‘i au: ‘e fakamaau ‘e Sihova ‘eta me‘a.

⁶Pea pehē ‘e ‘Epalame kia Sēlai, Ko ena ho‘o kaunanga ke ke fa‘iteliha ki ai: fai pē ho loto kiate ia. Pea ‘i he hanga ‘e Sēlai ‘o fai hono fakavaivai‘i, na‘a ne hola meiate ia.

⁷Pea ‘ilo ‘a e fefine ‘e he ‘Āngelo ‘a Sihova ‘i ha matavai ‘i he toafa, ‘a e vai ko ia ‘oku ‘i he hala ki Sua.

⁸Pea ne me‘a mai ki ai, ‘E Heka‘ā, ko e kaunanga ‘a Sēlai, ko ho‘o ha‘u mei fē? pea ko ho‘o faka‘a‘au ki fē? Pea ne pehē, Ko ‘eku hola meia Sēlai, ko ‘eku fine‘eiki.

⁹Pea me‘a kiate ia ‘e he ‘Āngelo ‘a Sihova, Foki pē ki ho‘o fine‘eiki, pea fakavaivai‘i koe kiate ia.

¹⁰Pea toe me‘a kiate ia ‘e he ‘Āngelo ‘a Sihova, Te u mātu‘aki fakatokolahi ho hako; ‘io, ‘e ‘ikai malau ko ‘ene tokolahi.

¹¹Pea me‘a ange foki ‘e he ‘Āngelo ‘a Sihova kiate ia, Ko eni kuo ke feitama, pea te ke fanau‘i ha tama tangata; pea te ke fakahingoa ia ko ‘Isime‘eli [ko Ongo‘i-‘e-he-‘Otua], koe‘uhi ne ongo‘i ‘e Sihova ‘a ho‘o mamahi.

¹²Pea ‘e hoko ia ko e tangata faka-e-‘asi-kaivao; ‘e ala hono nima ki he kakai kotoa pē, pea ala ‘a e nima ‘o e kakai kotoa pē kiate ia; pea te ne ma‘u hono nofo‘anga ‘i he potu hahake ‘o hono kāinga kotoa pē.[39]

¹³Pea ‘ai ‘e he fefine ha huafa ‘o Sihova ‘a ia kuo ne folofola kiate ia, ‘o pehē, KO ‘ELA-LO‘I koe [ko e ‘Otua Hā Mai], he‘ene pehē, He ‘oku ou kei ‘i heni ‘o sio hili ‘eku sio![40]

¹⁴Ko hono ‘uhinga ia na‘e hingoa ai ‘a e vaikeli ko Pea-lehai-Lo‘ai [ko Vai-sio-kae-mo‘ui-pē]. Ko ena ia ‘i he vaha‘a ‘o Kētesi mo Pēleti.

¹⁵Pea na‘e fanau‘i ‘e Heka‘ā kia ‘Epalame ha tama tangata; pea fakahingoa ‘e ‘Epalame ‘a hono foha ne fā‘ele‘i ‘e Heka‘ā ko ‘Isime‘eli.

¹⁶Pea na‘e fe‘unga ‘a ‘Epalame mo hono valungofulu mā ono ta‘u ‘i he fanau‘i ‘o ‘Isime‘eli ‘e Heka‘ā kiate ia.