Read KO E TOH TAPU KATOA TONGA KO SĒNESI 17 Bible Online

KO SĒNESI 17 - KO E TOH TAPU KATOA TONGA bible

KO SĒNESI 17

¹PEA ‘i he faifai pea a‘u ‘a ‘Epalame ki hono hivangofulu mā hiva ta‘u, pea hā ‘a Sihova kia ‘Epalame, ‘o ne folofola kiate ia, ‘o pehē, Ko e ‘Otua au ko SĀTAI: ke ke taka ofi mai mo ke haohaoa.

²Pea te u fakaai ‘eta fuakava, pea te u ngaohi koe ke lahi, ko e lahi ‘i he lahi ange fau.

³Pea tō fo‘ohifo ‘a ‘Epalame: pea folofola ‘a e ‘Otua kiate ia, ‘o pehē,

⁴Ko e me‘a kiate au, ‘oku ‘i ai ‘eta fuakava mo koe, pea te ke hoko ko e tupu‘anga ‘o ha fuifui pule‘anga.

⁵Pea ‘e ‘ikai kei ui ho hingoa ko ‘Epalame [ko Tupu-‘anga-‘oku-‘eiki], ka ko ho hingoa ko ‘Epalahame [ko Tupu‘anga-‘o-ha tokolahi];[41] he kuo u tu‘utu‘uni koe ko e tupu‘anga ‘o ha fuifui pule‘anga.

⁶‘Io, te u ngaohi koe ke fai fanau ‘aupito ‘aupito, pea ke ke hoko ko e ngaahi pule‘anga; pea ‘e tupu meiate koe ha ngaahi tu‘i.

⁷Pea te u fakapapau ‘eku fuakava mo koe, pea mo ho hako ‘amui, ‘o laui to‘utangata, ko e fuakava ta‘engata, Ke u nofo ko e ‘Otua kiate koe, pea ki ho hako ‘amui.

⁸Pea te u ‘atu kiate koe, pea ki ho hako ‘amui, ‘a e fonua ‘oku ke nofo muli ai, ‘io, ‘a Kēnani kātoa, ko ho tofi‘a tukufakaholo: pea te u nofo ko honau ‘Otua.

⁹Pea folofola ‘a e ‘Otua kia ‘Epalahame, Pea ko e me‘a kiate koe, te ke tauhi ‘eta fuakava, ‘e koe mo ho hako ‘amui, ‘o laui to‘utangata.

¹⁰Ko eni ‘eku me‘a te mau tauhi, ko e fuakava ‘a‘aku mo kimoutolu mo ho hako ‘amui, ‘ilonga ha‘amou fānau tangata ‘e kamu.

¹¹Te mou kamu ‘a e kili ‘o homou ‘ao; pea ko e faka‘ilonga ia ‘o e fuakava ‘a‘aku mo kimoutolu.

¹²Ka a‘u ki hono ‘aho valu, ka ko ha‘amou fānau tangata, pea ‘e kamu, ‘o laui to‘utangata; pe ko ha tupu ‘i ho ‘api, pe ko ha taha ‘oku ‘ikai ko ho hako, ka ko e fakatau ‘aki ha pa‘anga mei ha muli.

¹³Kuo pau pē ke kamu ‘a ia ‘oku tupu ‘i ho ‘api, pea mo ia ‘oku fakatau ‘aki ho‘o pa‘anga; koe‘uhi ke tu‘u ‘eta fuakava ‘i homou kakano, ko e fuakava ta‘engata.

¹⁴Pea ko e tama tangata, ‘a ia ne ‘ikai kamu ‘a e kili ‘o hono ‘ao, ‘io, ‘e motuhi ‘a e toko taha ko ia mei hono kakai; kuo ne maumau ‘a e fuakava mo au.

¹⁵Pea folofola ‘a e ‘Otua kia ‘Epalahame, Ko e me‘a ki ho uaifi ko Sēlai, ‘e ‘ikai toe ui‘aki ‘a e hingoa ko Sēlai, ka ko Sela hono hingoa [ko Fefine-pilinisesi].

¹⁶Pea te u tāpuaki‘i ia, pea te u tuku foki ke ke ma‘u ha foha ‘iate ia, ‘io, te u tāpuaki‘i ia, pea te ne hoko ko e ngaahi pule‘anga; ‘e tupu meiate ia ha ngaahi tu‘i ‘o ha ngaahi kakai.

¹⁷Pea tō fo‘ohifo ‘a ‘Epalahame, ‘o ne kata; ‘o ne pehē ‘i hono loto, ‘E ma‘u fānau koā ‘e ha fu‘u teau ta‘u? Pe fā‘ele koā ‘a Sela ko ha fu‘u hivangofulu ta‘u?

¹⁸Pea lea ‘a ‘Epalahame ki he ‘Otua, Taumaiā ke ‘oua na‘a ngalo ‘a ‘Isime‘eli mei he ‘Afiona.

¹⁹Pea folofola ‘a e ‘Otua, ‘Ā, ‘e fā‘ele‘i mo‘oni ‘e ho uaifi ko Sela hao foha, pea te ke fakahingoa ia ko ‘Aisake;[42] pea te u fakapapau mo ia ‘eku fuakava, ko e fuakava ke tukufakaholo foki ki hono hako ‘amui.

²⁰Pea ko e me‘a kia ‘Isime‘eli, kuo ongo mai ho‘o hū: ko eni, kuo u tāpuaki‘i ia, pea kuo u tu‘utu‘uni ke ne fanafanau, ‘o hoko ‘o lahi ‘aupito ‘aupito, pea ‘e tupu meiate ia ha hou‘eiki ‘e toko hongofulu mā ua; ‘io, te u ngaohi ia ko e pule‘anga lahi.

²¹Ka ko e fuakava mo au te u fakapapau ia mo ‘Aisake, ‘a ia ‘e fā‘ele‘i kiate koe ‘e Sela ‘i he taimi ko eni ‘i he ta‘u kaha‘u.

²²Pea ‘osi ai ‘ena fefolofolai mo ia, pea hā‘ele hake ‘a e ‘Otua meia ‘Epalahame.

²³Pea hanga ‘a ‘Epalahame ‘o ne kamu ‘a hono foha ko ‘Isime‘eli; pea ‘ilonga ha kakai tangata ‘i hono ‘api, pe ko e tupu ai, pe ko e ma‘u fakatau ‘aki ‘ene pa‘anga, na‘a ne kamu‘i kinautolu ‘i he ‘aho pē ko ia, ‘a e kili ‘o honau ‘ao, ‘o hangē ko ‘ena fefolofolai mo e ‘Otua.

²⁴Pea na‘e fe‘unga ‘a ‘Epalahame mo hono hivangofulu mā hiva ta‘u, ‘i he fai ‘a e kamu ‘o e kili ‘o hono ‘ao.

²⁵Pea na‘e hongofulu mā tolu ta‘u ‘a hono foha ko ‘Isime‘eli ‘i he fai ‘o hono kamu ‘i he kili ‘o hono ‘ao.

²⁶Ko e ‘aho pē ko ia na‘e kamu ai ‘a ‘Epalahame mo hono foha ko ‘Isime‘eli;

²⁷kae‘uma‘ā ko e kakai tangata kotoa pē ‘o hono ‘api; pe ko e tupu ai, pe ko e ma‘u fakatau ‘aki ‘a ‘ene pa‘anga mei he muli, na‘a nau kamu fakataha mo ia.