Read KO E TOH TAPU KATOA TONGA KO SĒNESI 18 Bible Online

KO SĒNESI 18 - KO E TOH TAPU KATOA TONGA bible

KO SĒNESI 18

¹PEA hā kiate ia ‘a Sihova ‘i he ‘ulu ‘oke ‘o Mamilī, lolotonga ‘ene ta‘utu ‘i he mata tēniti ‘i he pupuha ‘o e ‘aho.

²Pea tāngaki hake ia ‘o vakai, tā ‘oku tutu‘u mai kiate ia ha tu‘unga tangata ‘e toko tolu: pea ‘i he‘ene mamata ki ai, na‘a ne lele mei he mata tēniti ke fakafetaulaki kiate kinautolu, pea ne tū‘ulutui ‘o punou ki he kelekele,

³mo ne pehē, ‘Ēī, ka ‘oku ke ‘ofa kiate au, ‘oua leva te ke mahu‘i meiate au ko e me‘avale kiate koe:

⁴ke ‘omi mu‘a ha hu‘a vai ke tafitafi ‘aki si‘omou va‘e,

⁵pea mou fakafiemālie ‘i he lolo ‘akau ni, ka u ‘omi ha me‘i me‘akai mo‘omou tokoni, ka mou toki me‘a; he ka ne ta‘e‘oua ia kuo mou afe mei ai kia kita me‘avale. Pea nau me‘a mai, Lelei; fai pē ‘a e me‘a ‘oku ke lau.

⁶Pea tofutu‘u ‘a ‘Epalahame ki he tēniti kia Sela, ‘o ne pehē, Vave ‘aki mai ha tatanga mahoa‘a ‘e tolu, ‘a e ‘elito‘i mahoa‘a, natu ia ‘o ngaohi keke ‘aki.

⁷Lele foki ‘a ‘Epalahame ki he fanga manu, ‘o ne puke ha kafi toutou mo lelei, pea ne ‘ange ki he siana, pea ne hanga ‘o ngaohi fakato‘oto‘o.

⁸Pea ne ‘omi ha pota mo ha hu‘akau mo e kafi kuo ne ngaohi, ‘o ne tuku ki honau ‘ao; ka ka tu‘u atu pē ia kiate kinautolu ‘i he lolo ‘akau lolotonga e fai ‘enau taumafa.

⁹Pea nau me‘a kiate ia, Kofa‘ā ho uaifi, ‘a Sela? Pea ne pehē, Ko ‘ena pē ‘i he tēniti.

¹⁰Pea me‘a ‘e ia, Te u mātu‘aki foki mai kiate koe ‘oka hoko hono taimi;[43] pea ‘e ai leva ha tama ‘a Sela ko ho uaifi. Pea fanongo ki ai ‘a Sela mei he mata tēniti, ‘a ia na‘e ‘i hono takafalu.

¹¹Pea ko ‘Epalahame mo Sela na‘a na mātutu‘a, ko e ongo me‘a kuo a‘u; pea ‘oku ‘ikai fai ‘e Sela ‘a e anga ‘o e fefine.

¹²Pea kata ‘a Sela ‘i hono loto, he‘ene pehē, Ko e pehē koā ke u ma‘u fiemālie, ka kuo fai e vaivai, pea motu‘a mo e tangata‘eiki foki?

¹³Pea folofola ‘a Sihova kia ‘Epalahame, Ko e hā na‘e kata ai ‘a Sela, ‘o ne pehē, ‘O teitei mo‘oni ha‘aku fanau, ka kuo u motu‘a?

¹⁴He ‘oku faingata‘a ha me‘a kia Sihova? Te u foki mai kiate koe ‘i hono taimi kuo tu‘utu‘uni ‘i he ta‘u kaha‘u, pea ‘e ma‘u ‘e Sela ha tama.

¹⁵Pea fakafisi ‘a Sela, ‘o ne pehē, Na‘e ‘ikai te u kata; he kuo ne manavahē. Pea ne me‘a mai, ‘Ā, na‘a ke kata pē.

¹⁶Pea hiki hake mei ai ‘a e tu‘unga me‘a, ‘o nau hanga ke ‘alu ki Sōtoma; pea hā‘ele ‘a ‘Epalahame mo kinautolu ke moimoi‘i kinautolu.

¹⁷Pea folofola ‘a Sihova, Koe‘uma‘ā ha‘aku fufū meia ‘Epalahame ‘a e me‘a ‘oku ou teu fai;

¹⁸ka kuo pau ‘e hoko ‘a ‘Epalahame ko e pule‘anga lahi mo kaukaua, pea ‘e monū‘ia ‘iate ia ‘a e ngaahi pule‘anga kotoa pē ‘o māmani.[44]

¹⁹He kuo u fili ia koe‘uhi ā ke ne fekau ‘ene fānau mo hono ‘api ‘amui, ke nau tauhi ‘a e ‘alunga ‘o Sihova, mo nau faitotonu mo tauhi tu‘utu‘uni, koe‘uhi kae ‘omi ‘e Sihova kia ‘Epalahame ‘a e me‘a kuo ne tala‘ofa kiate ia.

²⁰Ko ia na‘e folofola ‘e Sihova, Ko e tangi ‘a Sōtoma mo Komola, seuke! ko e me‘a lahi, pea ko ‘enau angahala ko e me‘a mamafa ‘aupito;

²¹ka u ‘alu hifo mu‘a, ‘o vakai ā, pe kuo pehē fau ‘enau fai, ‘o hangē ko e tangi kuo ongo mai; pea ka ‘ikai, pea u ‘ilo.

²²Pea afe atu ‘a e ongo tangata, ‘o na laka atu ki Sōtoma: ka ka tu‘u ai pē ‘a ‘Epalahame ‘i he ‘ao ‘o Sihova.

²³Pea ‘unu‘unu atu ‘a ‘Epalahame, ‘o ne pehē, ‘Oku pehē koā? te ke faka‘auha ‘a e mā‘oni‘oni fakataha mo e angahala?

²⁴Na‘a ‘oku ‘i ai ha toko nimangofulu mā‘oni‘oni ‘i he kolo ko ia: pea te ke faka‘auha pē, ‘o ‘ikai te ke fakamolemole ‘a e feitu‘u koe‘uhi ko e toko nimangofulu‘i mā‘oni‘oni ‘oku ‘i ai?

²⁵Molekemama‘o ‘a e fai ‘e he ‘Afiona ha me‘a pehē, ‘a e tāmate‘i ‘a e mā‘oni‘oni fakataha mo e angahala, ‘io, ke fakatatau ‘a e mā‘oni‘oni mo e angahala: molekemama‘o ha‘o fai pehē: ‘o ‘ikai faitotonu koā ‘a e Tu‘i fakamaau ‘o māmani kātoa?

²⁶Pea folofola ‘a Sihova, Kapau te u ‘ilo ‘i Sōtoma ha toko nimangofulu mā‘oni‘oni ‘i he kolo kotoa, pea te u fakamolemole ‘a e feitu‘u kātoa koe‘uhi ko kinautolu.

²⁷Pea toe lea ‘a ‘Epalahame, ‘o pehē, ‘Ā, ko eni kuo te ala‘aki ke fakatau folofola ki he ‘Afiona, ‘a kita efu mo efuefu:

²⁸na‘a ‘oku toe toko nima mōno toko nimangofulu‘i mā‘oni‘oni: te ke faka‘auha koā hono kotoa ‘o e kolo koe‘uhi ko ha toko nima? Pea ne folofola mai, ‘E ‘ikai te u faka‘auha ia ‘o kapau te u ‘ilo ‘i ai ha toko fāngofulu mā nima.

²⁹Pea fai atu pē ‘ene fakatau folofola, ‘o pehē, Na‘a ko e toko fāngofulu pē ‘e ma‘u ‘i ai. Pea ne me‘a mai, ‘E ‘ikai te u fai telia ‘a e toko fāngofulu ko ia.

³⁰Pea pehē ‘e ia, ‘Ā, ke ‘oua ‘e tuputāmaki ‘a e ‘Afiona ka u toe lea. Na‘a ko e toko tolungofulu pē ‘e ma‘u ‘i ai. Pea ne me‘a mai, ‘E ‘ikai te u fai ‘o kapau te u ‘ilo ‘i ai ha toko tolungofulu.

³¹Pea pehē ‘e ia, Ko eni kuo te ala‘aki ke fakatau folofola ki he ‘Afiona: na‘a ‘ilo ‘i ai ha toko uofulu pē. Pea ne me‘a mai, ‘E ‘ikai te u faka‘auha ia telia ‘a e toko uofulu ko ia.

³²Pea ne pehē, ‘Ā, ke ‘oua na‘a tuputāmaki ‘a e ‘Afiona, ka u lea tātu‘otaha pē eni. Na‘a ko e toko hongofulu pē ‘e ma‘u ai. Pea folofola mai ia, ‘E ‘ikai te u faka‘auha ia telia ‘a e toko hongofulu ko ia.

³³Pea hā‘ele hake ‘a Sihova ‘i he ‘osi ‘ena fefolofolai mo ‘Epalahame; pea foki ‘a ‘Epalahame ki hono feitu‘u.