Read KO E TOH TAPU KATOA TONGA KO SĒNESI 19 Bible Online

KO SĒNESI 19 - KO E TOH TAPU KATOA TONGA bible

KO SĒNESI 19

¹PEA omi ‘a e ongo ‘āngelo ki Sōtoma kuo efiafi, ‘oku lolotonga ta‘utu ‘a Lote ‘i he matanikolo ‘o Sōtoma: pea ‘i he mamata ki ai ‘a Lote na‘a ne tu‘u ke fakafetaulaki kiate kinaua; pea ne tū‘ulutui ‘o punou ki he kelekele;

²‘o ne pehē, Fakamolemole, hou‘eiki, ka mo afe mai mu‘a ki he fale ‘o‘ota ko e me‘avale kiate kimoua, ‘o mo tatoka ai ‘apō, mo tafitafi homo va‘e; ka mo toki uhu, ‘o fai homo fononga. Pea na me‘a mai, ‘Ikai, ka te ma mohe pē ‘i he mala‘e.

³Ka ka ta‘ofi ‘a kinaua ‘e ia; ko ia na‘a na afe ki ai, ‘o hū ki hono fale; pea ne fai ha kātoanga ma‘anaua ‘o ne ta‘o mā ta‘elēvani, ‘o nau tokoni.

⁴Ka ‘i he te‘eki ke na toka, na‘e kāpui ‘a e fale ‘e he kakai tangata ‘o e kolo, ‘a e kau tangata Sōtoma, ‘o fai mei he talavou ki he motu‘a, ‘a e kakai kotoa mei he ngaahi feitu‘u:

⁵pea nau kalanga kia Lote, ‘o nau pehē ange, Kofa‘ā ‘a e ongo tangata na‘e hū atu ‘aneefiafi? fei mo ‘omi kiate kimautolu ke mau fe‘iloaki mo kinaua.

⁶Pea hū atu ‘a Lote ki he matafale kiate kinautolu, pea ne tāpuni ‘a e matapā mei hono tu‘a,

⁷mo ne pehē, Si‘i kāinga, ‘oua te mou fai ta‘etaau.

⁸Ko eni, ‘oku ai hoku ongo ‘ōfefine ‘a ia ‘oku te‘eki ke na ‘ilo ha tangata, ka u ‘omi mu‘a kinaua kiate kimoutolu, pea mou fa‘iteliha ki ai; kehe pē ke ‘oua te mou fai ha me‘a ki he ongo tangata ni he ka ne ta‘e‘oua ‘a e malu ‘o hoku fale ‘oku na hū mei ai.

⁹Pea nau pehē, Tu‘u ki hē. Pea nau pehē foki, Na‘e ha‘u ‘a e siana ni ko e ‘āunofo mai, pea ‘oku ne fie nofo ko e fakamaau? Sā! ‘e kovi ange ‘emau ngaohi koe ‘iate kinaua: pea nau teke‘i mālohi atu ‘a e tangata, ‘a Lote, ‘o nau ‘unu‘unu atu ke hae ‘a e matapā.

¹⁰Pea ala atu ‘a e ongo tangata, ‘o na fakahū mai ‘a Lote ki fale, ‘o na tāpuni ‘a e matapā.

¹¹Pea na ‘ai ke popongi ‘a e kau tangata na‘e ‘i he matafale, ‘a e iiki mo e lalahi: pea nau fiu‘a kumi ki he matapā.

¹²Pea me‘a ‘a e ongo ‘āngelo kia Lote, ‘Oku ‘i ai ‘i heni hao kavenga? ha‘o fānau tangata pe fānau fefine; ‘io, mo hai fua ‘oku ‘iate koe ‘i he kolo ni, ‘omi kitua‘ā mei he potu ni:

¹³he ‘oku ma teu faka‘auha ‘a e feitu‘u ni, koe‘uhi ko e me‘a lahi ‘a e tangi meiate kinautolu kuo a‘u ki he ‘ao ‘o Sihova; pea kuo fekau mai kimaua ‘e Sihova ke faka‘auha ia.

¹⁴Pea hū kitu‘a ‘a Lote, ‘o ne lea ki hono kavenga ‘i he‘ene fānau fefine, ‘o ne pehē, Mou tutu‘u, ‘o mahu‘i mei he potu ni; he ‘oku teu faka‘auha ‘e Sihova ‘a e kolo. Ka na‘e hangē ko ha‘ane fakahua kiate kinautolu.

¹⁵Pea pongipongi hake leva, pea fakavave ‘a Lote ‘e he ongo ‘āngelo, he‘ena pehē, Tu‘u, ‘ave ho uaifi mo ho ongo ‘ōfefine ‘oku ‘i heni; na‘a ke mole ‘i he tu‘utāmaki ‘o e kolo.

¹⁶Ka ka uatei pē ia; ko ia na‘e hanga ‘a e ongo tangata, ‘o na puke hono nima, mo e nima ‘o hono uaifi, mo e nima ‘o hono ongo ‘ōfefine; ko e me‘a ‘i he fai fakaalaala ‘a Sihova kiate ia: ‘o nau taki ia, ‘o tuku ki he tua‘ā kolo.

¹⁷Pea kuo na ‘omi leva kinautolu kitua‘ā, pea ne me‘a mai. Hola telia ho‘o mo‘ui; ‘oua te ke kilo kimui, pea ‘oua ‘e momo‘i tu‘u lolotonga ho‘o ‘i he Seakale: hola pē ki he mo‘unga na‘a ke mole.

¹⁸Pea lea ‘a Lote kiate kinaua, ‘Ēī, ‘oua mu‘a ‘e pehē:

¹⁹ko eni, ta‘e‘alo‘aloa kuo ke ‘ofa ‘ia kita me‘avale, pea kuo ke fai ha fu‘u ‘ofa lahi ‘i he fakahaofi ‘o ‘eku mo‘ui pea tala‘ehai te u lava ke hola ki he mo‘unga, pea na‘a ma‘u au ‘e he tu‘utāmaki pea u mate.

²⁰Me‘a ange ko e kolo ko ē, ‘e vave ha‘aku hola ki ai, kae‘uma‘ā ko e ki‘i me‘a: ka u hola mu‘a ki he potu ko ia (‘ikai ko e ki‘i me‘a pē?) kae hao ‘eku mo‘ui.

²¹Pea ne me‘a kiate ia, Ko eni, kuo u toka‘i koe ‘i he me‘a ni foki, pea ‘e ‘ikai te u maumau‘i ‘a e kolo ko ia kuo ke lea ki ai.

²²Fai vave, hola ki he potu ko ia; he ‘oku ‘ikai te u fa‘a fai ha me‘a kae‘oua ke ke a‘u ki ai. Ko hono ‘uhinga ia na‘e ui ‘a e kolo ko ia ko Soa [ko Ki‘i-me‘a].[45]

²³Kuo hopo ‘a e la‘ā ki māmani ‘i he a‘u ‘a Lote ki Soa.

²⁴Pea na‘e toki faka‘uha ‘e Sihova ki Sōtoma mo Komola ‘a e maka vela mo e afi mei He‘ene ‘Afio, ‘io, mei langi;

²⁵pea ne maumau‘i ‘a e ngaahi kolo ko ia mo e Seakale kātoa, mo kinautolu kotoa pē na‘e nofo ‘i he ngaahi kolo ko ia, mo e ngaahi fua ‘o e kelekele.

²⁶Ka ka fakatōtōmui ‘a hono uaifi ‘iate ia, ‘o ne fakasio ki mui, pea ne hoko ko e pou māsima.

²⁷Pea na‘e uhu hengihengi ‘a ‘Epalahame ki he potu na‘a ne tu‘u ai ‘i he ‘ao ‘o Sihova;

²⁸pea ne hanga ki he feitu‘u ‘o Sōtoma mo Komola mo e seakale kotoa, ‘o ne fakasio atu, tā ‘oku kohu hake ‘a e fonua ko ia ‘o hangē ko e fu‘u fōnise.

²⁹Ko ia ‘i he faka‘auha ‘e he ‘Otua ‘a e ngaahi kolo ‘o e Seakale, na‘a ne manatu kia ‘Epalahame, pea ne fakapuna ‘a Lote mei he uhouhonga ‘o e tu‘utāmaki, lolotonga ‘ene laiki ‘a e ngaahi kolo na‘a ne nofo ai.

³⁰Pea ‘alu hake ‘a Lote mei Soa, pea ne nofo ‘i he mo‘unga, ‘a ia mo hono ongo ‘ōfefine he na‘a ne manavahē ke nofo ‘i Soa; ko ia na‘a ne nofo ‘i ha ‘ana mo hono ongo ‘ōfefine.

³¹Pea lea ‘a e ta‘okete ki he tehina, Ko ‘eta tamai kuo motu‘a, pea tala‘ehai ‘oku ‘i ai ha tangata ‘i he fonua[46] ke ha‘u kiate kitaua ‘o hangē ko e anga ‘o māmani:

³²ha‘u, ta fakainu uaine ‘a ‘eta tamai, pea ta mohe mo ia, ke ta fakaili ha hako ‘o ‘eta tamai.

³³Pea na fakainu uaine ena tamai ‘i he pō ko ia: pea ‘alu ki ai ‘a e ta‘okete, ‘o mohe mo ‘ene tamai; pea na‘e ‘ikai te ne ‘ilo ‘ene tokoto mai mo ‘ene tu‘u atu.

³⁴Pea ‘i he ‘aho ‘e taha, na‘e pehē ‘a e ta‘okete ki he tehina, Ko eni, ne u mohe ‘anepō mo ‘eku tamai: ta fakainu uaine kiate ia ‘apō foki; pea ke ‘alu koe ki ai ‘o mohe mo ia, ka ta fakaili ha hako ‘o ‘eta tamai.

³⁵Pea na fakainu uaine ‘a ‘ena tamai ‘i he pō ko ia foki; pea tu‘u atu ‘a e tehina ‘o mohe mo ia; pea na‘e ‘ikai te ne ‘ilo ‘ene tokoto mai mo ‘ene tu‘u atu.

³⁶Ko ia na‘e fakatou feitama ‘a e ongo ‘ōfefine ‘o Lote ki he‘ena tamai.

³⁷Pea fā‘ele ‘a e ta‘okete, ko e tama; pea ne fakahingoa ia ko Moape;[47] ko e tupu‘anga ia ‘o ha‘a Moape ‘o onopooni.

³⁸Pea fā‘ele mo e tehina, ko e tama; pea ne fakahingoa ko Pēnami:[48] ko e tupu‘anga ia ‘o e ha‘a ‘Āmoni ‘o onopooni.