Read KO E TOH TAPU KATOA TONGA KO SĒNESI 2 Bible Online

KO SĒNESI 2 - KO E TOH TAPU KATOA TONGA bible

KO SĒNESI 2

¹Pea ko eni kuo ‘osi ‘a e ngaahi langi mo māmani, mo honau ngaahi hōsitē.

²Pea na‘e faka‘osi ‘e he ‘Otua ‘i hono ‘aho fitu ‘a e ngāue na‘a ne fai; pea ne mālōlō ‘i hono ‘aho fitu mei he ngāue kehekehe na‘a ne fai.

³Pea na‘e tāpuaki‘i ‘e he ‘Otua ‘a e ‘aho ko hono fitu, mo ne tapui ia: koe‘uhi ko ia ia na‘a ne mālōlō ai mei he‘ene ngāue kotoa pē, ‘io, mei he fakatupu me‘a mo ngaohi me‘a ‘e he ‘Otua.

⁴Ko e tohi eni ‘o e hako ‘o langi mo māmani, ‘o kamata mei hono fakatupu, mei he ‘aho na‘e ngaohi ai ‘e Sihova ‘Elohimi ‘a māmani mo e langi.

⁵Pea kuo te‘eki ke ‘i he fonua ‘a e ngaahi ‘akau kehekehe ‘o e ngoue, pea kuo te‘eki ke tupu ‘a e mohuku kehekehe ‘o e ngoue; koe‘uhi kuo te‘eki ke faka‘uha ki he fonua ‘e Sihova ‘Elohimi, mo e ‘ikai ha tangata ke ngoue‘i ‘a e kelekele.

⁶Pea na‘e ‘alu hake ‘a e mao[6] mei māmani, ‘o fakaviviku ‘a e funga kelekele kotoa.

⁷Pea na‘e ngaohi ‘e Sihova ‘Elohimi ‘a e tangata[7] mei he efu ‘o e kelekele,[8] ‘o ne hō ki hono ava‘i ihu ‘a e mānava mo‘ui; pea na‘e hoko ‘a e tangata ko e kakano mo‘ui.

⁸Pea na‘e tō ‘e Sihova ‘Elohimi ha ngouetapu ‘i ‘Īteni, ‘i hahake; pea ne tuku ai ‘a e tangata kuo ne ngaohi.

⁹Pea na‘e fakatupu ‘e Sihova ‘Elohimi mei he kelekele ‘a e ‘akau kehekehe na‘e hā faka‘ofo‘ofa, pea lelei ki he kai; kae‘uma‘ā ‘a e ‘Akau ‘o e Mo‘ui ‘i he loto ngoue, mo e ‘Akau ‘o e ‘Ilo-‘o-e-lelei-mo-e-kovi.

¹⁰Pea na‘e ‘i ai ha vaitafe na‘e tupu ‘i ‘Īteni ke fakaviviku ‘a e ngoue; pea ‘i he‘ene hū kitua‘ā ne mavahevahe ko e matavai ‘e fā.

¹¹Ko e hingoa ‘o e ‘uluaki ko Pīsoni: ko ia ia ‘oku ne takatakai ki hono kotoa ‘o e fonua ko Havila, ‘a e potu ‘oku ‘i ai ‘a e koula;

¹²pea ‘oku lelei ‘a e koula ‘o e fonua ko ia: ‘oku ‘i ai ‘a e mata‘itofe mo e maka ‘onike.

¹³Pea ko e hingoa ‘o hono ua ‘o e vaitafe ko Kīhoni: ko ia ia ‘oku ‘alu takatakai ki hono kotoa ‘o e fonua ko Kusa.[9]

¹⁴Pea ko e hingoa ‘o hono tolu ‘o e vaitafe ko Hitikeli: ko ia ia ‘oku ‘alu ‘i he tafafonua ‘o ‘Āsilia. Pea ko e vaitafe ko hono fā ko ‘Eufaletesi ia.

¹⁵Pea na‘e ‘ave ‘a e tangata ‘e Sihova ‘Elohimi, ‘o ne tuku ia ‘i he ngouetapu ‘o ‘Īteni ke ngoue‘i mo tauhi ia.

¹⁶Pea na‘e tu‘utu‘uni ‘e Sihova ‘Elohimi ki he tangata, ‘o pehē, ‘E lelei ‘aupito ho‘o kai mei he ngaahi ‘akau kehekehe ‘o e ngoue;

¹⁷ka ko e ‘Akau ‘o e ‘Ilo-‘o-e-lelei-mo-e-kovi ‘e ‘ikai te ke kai mei ai: he ko e ‘aho te ke kai mei ai kuo pau te ke mate.

¹⁸Pea folofola ‘a Sihova ‘Elohimi: ‘Oku ‘ikai lelei ki he tangata ke toko taha; ka u ngaohi ma‘ana ha tokoni ke ‘ao mo ia.

¹⁹Pea ngaohi ‘e Sihova ‘Elohimi mei he kelekele ‘a e fanga manu kotoa pē ‘o e fonua, pea mo e manupuna kehekehe ‘o e langi; ‘o ne ‘omi ki he tangata ke vakai pe ko e hā ha hingoa te ne ‘ai ki ai: pea ‘ilonga ha hingoa ne ‘ai ‘e he tangata ki he me‘a mo‘ui takitaha ko hono hingoa leva ia.

²⁰Pea fakahingoa ‘e he tangata ‘a e ngaahi fa‘ahinga manu lalata, mo e manupuna ‘o e langi, mo e ngaahi fa‘ahinga manu kaivao; ka ki he tangata na‘e ‘ikai te ne ‘ilo ha tokoni ke ‘ao mo ia.

²¹Pea fakatō ‘e Sihova ‘Elohimi ki he tangata ha mohe ma‘u, ‘o ne mohe: pea na‘a ne unuhi hono hui vakavaka ‘e taha, ‘o ne fetongi kakano ke ma‘opo‘opo;

²²pea ko e hui vakavaka na‘a ne to‘o mei he tangata na‘e fa‘u ‘aki ia ‘e Sihova ‘Elohimi ha fefine, ‘o ne ‘omi ia ki he tangata.

²³Pea pehē ‘e he tangata, Ko e fai ko eni ko e hui mei hoto hui, mo e kakano mei hoto kakano: ‘e fakahingoa eni ko e Fefine, koe‘uhi na‘e to‘o ia mei he Tangata.[10]

²⁴Ko ia ‘e tukuange ‘e he tangata ‘ene tamai mo ‘ene fa‘ē, kae pīkitai ki hono uaifi: pea te na hoko ko e kakano pē taha.

²⁵Pea na‘a na fakatou telefua, ‘a e tangata mo hono uaifi, ka na‘e ‘ikai te na mā.