Read KO E TOH TAPU KATOA TONGA KO SĒNESI 20 Bible Online

KO SĒNESI 20 - KO E TOH TAPU KATOA TONGA bible

KO SĒNESI 20

¹PEA hiki mei ai ‘a ‘Epalahame, ‘o ne tukutuku holo ki he feitu‘u ko Tonga, ‘o ne fuoloa hifo ‘i he vaha‘a ‘o Kētesi mo Sua, ‘o ne nofo ‘āunofo ‘i Kela.

²Pea na‘e lau ‘e ‘Epalahame ‘a hono uaifi ko Sela, Ko hoku tuofefine ia; ko ia na‘e fekau atu ‘e ‘Apimeleki ko e tu‘i Kela, ‘o ne ‘omi ‘a Sela.

³Pea hā‘ele ‘a e ‘Otua kia ‘Apimeleki ‘i ha misi po‘uli, ‘o ne folofola ki ai, Ko eni ko e koto pekia koe, koe‘uhi ko e fefine kuo ke ma‘u; he ko e fefine alafia.

⁴Ka kuo te‘eki ke ofi ‘a ‘Apimeleki kiate ia: pea ne pehē, ‘Ēī, te ke faka‘auha koā ha kakai mā‘oni‘oni?

⁵‘Ikai na‘a ne pehē mai kiate au, Ko hoku tuofefine ia? mo e fefine foki, na‘a ne pehē ‘e ia, Ko hoku tuonga‘ane ia: ‘i he loto totonu mo e nima ma‘ane u fai ia.

⁶Pea folofola ‘a ‘Elohimi kiate ia ‘i he misi, ‘Io, na‘a ku ‘ilo pē ‘oku ‘atā ho loto ‘i ho‘o fai ko ia, ko ia foki na‘a ku ta‘ofi koe mei he fai angahala kiate au, ‘a ‘ikai te u tuku ke ke ala ki he fefine.

⁷Pea ko eni ke ke fakafoki ‘a e uaifi ‘o e tangata, he ko e palōfita ia, pea te ne hufekina koe, pea te ke mo‘ui; pea kapau ‘e ‘ikai te ke fakafoki ia, tala atu te ke mātu‘aki mate, ‘a koe mo ia kotoa pē ‘oku ‘a‘au.

⁸Pea ‘i he‘ene ‘aho leva, na‘e tu‘u hengihengi ‘a ‘Apimeleki, ‘o ne ui mai ‘ene kau tamaio‘eiki, ‘o ne fakamatala ‘a e ngaahi me‘a ko ia ke nau fanongo ki ai: pea na‘e manavahē ‘aupito ‘a e kau tangata.

⁹Pea tala ‘e ‘Apimeleki ke ha‘u ‘a ‘Epalahame, ‘o ne me‘a ki ai, Ko e hā ‘eni kuo ke fai kiate kimautolu? pea ko e hā ha‘aku kovi kuo fai atu ke ke fakamo‘ua au mo hoku pule‘anga ‘i ha fu‘u angahala pehē? Kuo ke fai kiate au ‘a e ngaahi me‘a na‘e ‘ikai totonu ke fai.

¹⁰Pea toe me‘a ‘a ‘Apimeleki kia ‘Epalahame, Ko e hā ha me‘a na‘a ke sio ki ai ke tupu ai ho‘o fai pehē?

¹¹Pea tali ‘e ‘Epalahame, Ko hono ‘uhinga ko ‘eku pehē, kuo pau ‘oku ‘ikai ‘i he potu ni ‘a e ‘apasia ki he ‘Otua; pea te nau fakapoongi au koe‘uhi ko hoku uaifi.

¹²Ka ‘oku mo‘oni foki ko hoku tuofefine; ko e ‘ōfefine ia ‘o ‘eku tamai, ka ‘oku ‘ikai ko e tama ‘a ‘eku fa‘ē; pea ne hoko ko hoku uaifi.

¹³Pea ‘i he faifai pea fakahee‘i au ‘e he ‘Otua mei he ‘api ‘o ‘eku tamai, pea u pehē ki he fefine, Ko eni ‘a e ‘ofa te ke fai kiate au; ‘i he ngaahi potu te ta a‘u ki ai, te ke lau au ‘o pehē, Ko hoku tuonga‘ane ia.

¹⁴Pea hanga ai ‘a ‘Apimeleki, ‘o ne foaki ma‘a ‘Epalahame ha fanga sipi mo ha fanga pulu mo ha kau tamaio‘eiki mo ha kau kaunanga, pea ne toe ‘ange mo hono uaifi ko Sela.

¹⁵Pea me‘a ‘a ‘Apimeleki, Ko ena hoku fonua: ke ke fa‘iteliha pē ha potu te ke nofo ki ai.

¹⁶Pea ne me‘a foki kia Sela, Ko eni kuo u ‘atu ki ho tuonga‘ane ha pa‘anga ‘e taha afe: ‘ē, ko ‘eku me‘a fakamolemole ia kiate koe koe‘uhi ko ha ngaahi me‘a ‘i ho loto mo kinautolu kotoa: pea kuo maau ho‘o me‘a.

¹⁷Pea fai ‘e ‘Epalahame ‘ene hū kia ‘Elohimi, pea na‘e fakamo‘ui ‘e he ‘Otua ‘a ‘Apimeleki mo hono uaifi mo ‘ene kau sinifu, pea nau fanau.

¹⁸He kuo mātu‘aki tapui ‘e Sihova ‘a e fanau ‘i he ‘api ‘o ‘Apimeleki ko e me‘a ‘ia Sela ko e uaifi ‘o ‘Epalahame.