Read KO E TOH TAPU KATOA TONGA KO SĒNESI 21 Bible Online

KO SĒNESI 21 - KO E TOH TAPU KATOA TONGA bible

KO SĒNESI 21

¹PEA ‘a‘ahi ‘a Sihova kia Sela ‘o hangē ko ‘ene folofola, pea na‘e fai ‘e Sihova kia Sela ‘o hangē ko ‘ene tala.

²Pea feitama ‘a Sela, pea ‘i he hokosia ‘a e taimi ne tala kiate ia ‘e he ‘Otua na‘a ne fanau kia ‘Epalahame ha tama, neongo kuo ne motu‘a.

³Pea fakahingoa ‘e ‘Epalahame ‘a e foha ne fanau‘i kiate ia, ‘io, ‘a e foha ne fanau‘i kiate ia ‘e Sela, ko ‘Aisake.

⁴Pea na‘e kamu ‘e ‘Epalahame hono foha ko ‘Aisake ‘i he‘ene a‘u ki hono ‘aho valu, ‘o hangē ko e tu‘utu‘uni ‘a e ‘Otua kiate ia.

⁵Pea na‘e fe‘unga ‘a ‘Epalahame mo hono ta‘u teau ‘i he fanau‘i kiate ia hono foha ko ‘Aisake.

⁶Pea pehē ‘e Sela, Kuo fakatupu ‘e he ‘Otua ha kata ma‘aku; ‘Ilonga ha fanongo te ne kata mo au.[49]

⁷Na‘a ne pehē foki, Ko hai ne mei lea kia ‘Epalahame, ‘o lau, Ko Sela te ne fakahuhu ha fānau? He kuo te fanau‘i hano foha kuo ne a‘ua‘u.

⁸Pea lahi ‘a e tama, ‘o mavae, pea na‘e fai ‘e ‘Epalahame ha fu‘u kātoanga ‘i he ‘aho na‘e fakamavae ai ‘a ‘Aisake.

⁹Pea mamata ‘e Sela ki he tama ‘a Heka‘ā, ko e fefine ‘Isipite na‘a ne fanau‘i kia ‘Epalahame, ‘oku ne manuki.[50]

¹⁰Pea ne pehē kia ‘Epalahame, Kapusi ‘a e kaunanga ko ia mo ‘ene tama: he tala‘ehai ‘e kaunga-‘ea ‘a e tama ‘a e kaunanga na pea mo ‘eku tama, ‘a ‘Aisake.

¹¹Pea kovi‘ia ‘aupito ‘a ‘Epalahame ‘i he me‘a ko ia koe‘uhi ko si‘ono foha.

¹²Ka ka folofola ‘a e ‘Otua kia ‘Epalahame, ‘Oua na‘a ke kovi‘ia ai koe‘uhi ko ho foha, pea koe‘uhi ko ho‘o kaunanga; pea ko e me‘a ki he ngaahi lau ‘a Sela ‘oku fai atu, tuitala pē ki he‘ene lea; koe‘uhi ‘e ngata ‘ia ‘Aisake ‘a e lau ko ho hako.

¹³Pea ko e me‘a foki ki he tama ‘a e kaunanga, te u fokotu‘u foki ia ko e pule‘anga koe‘uhi ko ho hako ia.

¹⁴Pea ‘i he‘ene ‘aho leva na‘e tu‘u hengihengi ‘a ‘Epalahame, ‘o ne to‘o ha mā mo ha ‘angavai, ‘o ne ‘atu kia Heka‘ā, ‘o ‘ai ki hono uma; ‘o ne ‘ange kiate ia mo e tama, ‘o ne tuku atu; pea ‘alu atu ia ‘o he fano ‘i he toafa ‘o Peasipa.

¹⁵Pea faifai pea maha ‘a e vai ‘i he ‘angavai, pea tuku ‘e he fefine ‘a e tama ‘i ha lolo ‘akau;

¹⁶ka ka ‘alu pē ia ‘o nofo mai mei he mama‘o, ‘o fe‘unga mo e fakamama‘o ‘a e tu‘u ‘a e lautele; he na‘a ne pehē, Ke ‘oua mai na‘a ku sio ki he pekia ‘a e tama: ko ia na‘a ne nofo mai mei he mama‘o, ‘o ne[51] ‘ai atu hono le‘o ‘o tangi.

¹⁷Pea ongo ki he ‘Otua ‘a e le‘o ‘o e tama; pea ui mai mei langi ‘a e ‘Āngelo ‘a e ‘Otua kia Heka‘ā, ‘o ne me‘a mai, Ko e hā ‘oku ke pehē ai, Heka‘ā! ‘Oua te ke manavahē, he kuo ongo ki he ‘Otua ‘a e le‘o ‘o e tama mei he potu ‘oku ne ‘i ai.

¹⁸Tu‘u ‘o langa‘i hake ‘a e tama, ‘o taki nima ia; he te u fokotu‘u ‘iate ia ha pule‘anga lahi.

¹⁹Pea faka‘ā ‘e he ‘Otua ‘a e mata ‘o e fefine, pea ne ‘ilo ha vaikeli; pea ne ‘alu ki ai ‘o ‘utu ‘ene ‘angavai ‘i he vai, ‘o ne fakainu ‘a e tama.

²⁰Pea na‘e kau ‘a e ‘Otua mo e tama; pea faifai pea ne tangata, pea ne nofo ai pē ‘i he toafa, ‘o ne hoko ko e tangata poto ‘i he fana.

²¹Pea ne nofo fonua ‘i he Toafa ‘o Pēlana: pea kumi ‘e he‘ene fa‘ē ha uaifi mo‘ona mei ‘Isipite.

²²Tokua ‘i he kuonga ko ia na‘e me‘a ‘a ‘Apimeleki kia ‘Epalahame, ‘o kau ai ‘a Fīkoli ko e ‘eiki ‘o ‘ene tau; pea ne pehē, Tā ‘oku kau ‘a e ‘Otua ma‘au ‘i he me‘a kotoa pē ‘oku ke fai:

²³pea ko eni ke ke fuakava mai heni kiate au ‘i he ‘Otua, ‘ilo ‘e koe ‘o kapau te ke fai kākā kiate au, pe ki hoku pikilau, pe ki hoku hako! kae hangē ko ‘eku ‘ofa kiate koe, ke pehē ho‘o fai ‘ofa kiate au, pea mo e fonua kuo ke ‘āunofo ki ai.

²⁴Pea pehē ‘e ‘Epalahame, Te u fuakava pē.

²⁵Pea valoki ‘e ‘Epalahame ‘a ‘Apimeleki ko e me‘a ‘i he vaikeli ne fa‘ao ‘e he kau tamaio‘eiki ‘a ‘Apimeleki.

²⁶Pea tali ‘a ‘Apimeleki, ‘Oku ‘ikai te u ‘ilo pe ko hai ne fai ‘a e me‘a ko ia: ‘io, pea tala‘ehai na‘a ke tala mai ‘e koe, pea tala‘ehai na‘a ku fanongo ki ai, ko e ‘aho ni pē.

²⁷Pea to‘o mai ‘e ‘Epalahame ha fanga sipi mo ha fanga pulu, ‘o ne ‘ange kia ‘Apimeleki; pea na fai ha fuakava ‘e kinaua.

²⁸Pea hanga ‘a ‘Epalahame ‘o tukukehe ha fitu‘i lami fefine.

²⁹Pea me‘a ‘a ‘Apimeleki kia ‘Epalahame, Ko e hā ē, ‘a e fitu‘i lami fefine ko ia kuo ke tukukehe?

³⁰Pea ne pehē, Te ke to‘o meiate au ‘a e fitu‘i lami fefine ma‘aku fakamo‘oni ko au na‘a ku keli ‘a e vaikeli ni.

³¹Ko hono ‘uhinga ia na‘e ui ai ‘a e potu ko ia ko Peasipa [ko Vai-fuakava, pe ko Vai-fitu][52] koe‘uhi ko e potu ia na‘a na fuakava ai ‘e kinaua.

³²Pea kuo fai ‘ena fuakava ‘i Peasipa, pea tu‘u ‘a ‘Apimeleki mo Fīkoli ko e ‘eiki ‘o ‘ene tau, ‘o na foki ki he fonua ‘o e kau Filisitia.

³³Ka ka tō ‘akau ia ‘i Peasipa, ‘o ne fai ai ‘ene lotu ‘i he huafa ‘o Sihova ko e ‘OTUA-LAUI-‘ĪTĀNITI.

³⁴Pea na‘e nofo ‘āunofo ‘a ‘Epalahame ‘i he fonua ‘o e kau Filisitia ‘o ‘aho lahi.