Read KO E TOH TAPU KATOA TONGA KO SĒNESI 22 Bible Online

KO SĒNESI 22 - KO E TOH TAPU KATOA TONGA bible

KO SĒNESI 22

¹PEA hili ‘a e ngaahi me‘a ko ia na‘e sivi ‘a ‘Epalahame ‘e he ‘Otua; ko ia na‘a ne folofola mai, ‘E ‘Epalahame:

²pea tali ‘e ia, Ko au. Pea ne folofola mai, ‘Ē, ke ke ‘ave ho foha, ‘a ho‘o me‘a pē taha, ho ‘ofa‘anga, ‘a ‘Aisake, pea ‘alu mo koe ki he fonua ko Molaia; pea fai‘aki ia ha feilaulau tutu ‘i ha funga mo‘unga te u toki fakahā atu.

³Pea pongipongi leva pea tu‘u hengihengi hake ‘a ‘Epalahame, ‘o ne teuteu ‘ene ‘asi; ‘o ‘alu mo ia ha toko ua ‘i he‘ene kau tama mo hono foha ko ‘Aisake; na‘a ne fahi foki ha fefie ki he feilaulau, ‘o ne tu‘u ‘o ‘alu ki he potu ne fakahā kiate ia ‘e he ‘Otua.

⁴Pea ‘i hono ‘aho tolu na‘e tāngaki hake ‘a ‘Epalahame, ‘o ne vakai mei he mama‘o ki he potu.

⁵Pea lea ‘a ‘Epalahame ki he‘ene ongo tama, Mo nofo ā ‘i heni mo e ‘asi, ka ko au mo e tama te ma ‘alu ki hē; pea te ma fai ‘ema lotu ‘o foki mai kiate kimoua.

⁶Pea to‘o ‘e ‘Epalahame ‘a e fefie ki he feilaulau, ‘o ne hilifaki ki hono foha ko ‘Aisake; pea ne to‘o ‘e ia ‘a e afi mo e hele, pea na laka atu fakataha.

⁷Pea lea ‘a ‘Aisake ki he‘ene tamai ko ‘Epalahame, ‘o pehē, ‘Alā tamai: pea ne tali, Ko au, tama. Pea ne pehē, Ko e afi ē mo e fefie, ka ko e fē ‘a e lami ki he feilaulau?

⁸Pea pehē ‘e ‘Epalahame, Tama, ko e ‘Otua te ne tokonaki ‘e ia ha‘ane lami ki he feilaulau: pea na laka atu fakataha.

⁹Pea faifai pea na a‘u ki he potu kuo fakahā ‘e he ‘Otua kiate ia; pea hanga ai ‘a ‘Epalahame ‘o ne fokotu‘u ai ‘a e ‘ōlita, ‘o ne fakatoka ‘a e fefie, ‘o ne kafai ‘a hono foha ko ‘Aisake, ‘o ne hilifaki ‘i he ‘ōlita ki he makafefie.

¹⁰Pea ala atu ‘a ‘Epalahame, ‘o to‘o ‘a e hele ke tāmate‘i ‘aki hono foha.

¹¹Ka ka ui mai ‘a e ‘Āngelo ‘a Sihova mei langi ‘o pehē, ‘Epalahame! ‘Epalahame! pea ne pehē, Ko au.

¹²Pea ne folofola mai, ‘Oua te ke ala ki he tama, pea ‘oua te ke fai ha me‘a ki ai: he ‘oku ou ‘ilo eni ko e tokotaha koe ‘oku ke ‘apasia ki he ‘Otua, koe‘uhi na‘e ‘ikai te ke mamae‘i meiate au ho foha, ‘a ho‘o me‘a pē taha.

¹³Pea tāngaki hake ‘e ‘Epalahame ‘o vakai, tā na‘e ‘i hono tu‘a ha sipi tangata kuo fihia hono nifo ‘i he vao: pea ‘alu ‘a ‘Epalahame, ‘o puke ‘a e sipi tangata, ‘o ne fai‘aki ‘a e feilaulau tutu ko e fetongi ‘o hono foha.

¹⁴Pea na‘e fakahingoa ‘e ‘Epalahame ‘a e potu ko ia ko Sihova-siaila [ko Tokonaki-pē-‘e-Sihova][53] — ‘o hangē ko e lea ‘oku fakatokotokanaki ‘aki ‘i onopooni “‘I he mo‘unga ‘o Sihova ‘e hā.”[54]

¹⁵Pea ui mai mei langi kia ‘Epalahame ‘a e ‘Āngelo ‘a Sihova ko hono tu‘o ua,

¹⁶‘ō pehē, Ko e folofola eni ‘a Sihova, Kuo u fuakava ‘iate au, ko e me‘a ‘i ho‘o fai pehē, ‘o ‘ikai te ke mamae‘i ho foha, ‘a ho‘o me‘a pē taha;

¹⁷ko ia te u mātu‘aki tāpuaki‘i koe, pea te u mātu‘aki fakatokolahi ho hako ke tatau mo e ngaahi fetu‘u ‘o e langi, pe ko e ‘one‘one ‘i he matātahi; pea ‘e ma‘u ‘e ho hako ‘a e ngaahi matanikolo ‘o honau ngaahi fili;

¹⁸pea ko ho hako ‘e monū‘ia ai ‘a e ngaahi pule‘anga ‘o māmani; koe‘uhi ā kuo ke tuitala ki he‘eku lea.

¹⁹Pea foki ‘a ‘Epalahame ki he‘ene ongo tama; pea na tu‘u hake, ‘o nau ‘alu fakataha ki Peasipa; pea na‘e nofo ‘a ‘Epalahame ‘i Peasipa.

²⁰Pea hili ia na‘e fakahā kia ‘Epalahame, ‘o pehē, Tā ko Milika foki kuo ne fanau‘i ha fānau ki ho tokoua ko Nēhoa;

²¹ko ‘Usa ko e ta‘okete pea ko Pusa hono tehina, mo Kemiueli ‘a ia ko e tamai ‘a ‘Ālame;

²²mo Kēseti, mo Haso, mo Pilitasi, mo Sitilafi, mo Petueli.

²³Pea ko Petueli ko e tamai ia ‘a Lepeka. Ko e toko valu ni na‘e fanau‘i ‘e Milika kia Nēhoa ko e tokoua ‘o ‘Epalahame.

²⁴Pea ko ‘ene sinifu, ‘a ia ko hono hingoa ko Leuma, na‘e fanau‘i ‘e ia ‘a Tepa‘a, mo Kāhami, mo Tāhasi, mo Maaka.