Read KO E TOH TAPU KATOA TONGA KO SĒNESI 23 Bible Online

KO SĒNESI 23 - KO E TOH TAPU KATOA TONGA bible

KO SĒNESI 23

¹Pea ko e fuoloa ‘o Sela ko e ta‘u ‘e teau mo e ta‘u ‘e uofulu mā fitu: ko e ngaahi ta‘u ia ‘o e mo‘ui ‘a Sela.

²Pea pekia ‘a Sela ‘i Kiliati-‘A‘apa, ‘a ia ko Hepeloni ‘i he fonua ko Kēnani: pea na‘e ha‘u ‘a ‘Epalahame ke fetuki koe‘uhi ko Sela, pea ke tēngihia ia.

³Pea tu‘u hake ‘a ‘Epalahame mei he‘ene fekita ki hono pekia, ‘o ne fakalea ange ki ha‘a Heti, ‘o pehē,

⁴Ko si‘i muli mo ‘āunofo au ‘iate kimoutolu, tuku mai haku tofi‘a mōku fa‘itoka ‘iate kimoutolu kau tanu ai hoku pekia ke puli meiate au.

⁵Pea tali kia ‘Epalahame ‘e ha‘a Heti, ‘o nau pehē ki ai,

⁶‘Ēī, ka ke me‘a mai; ‘oku ke nofo mai ka ko e ‘eiki lahi: ko homau ngaahi fa‘itoka ‘eiki ē, fai ai ho pekia: ‘oku ‘ikai hamau toko taha te ne tapui hono fai ho pekia ‘i hono fa‘itoka.

⁷Pea tu‘u ‘a ‘Epalahame ‘o fai ‘ene faka‘apa‘apa ki he kakai ‘o ‘e fonua, ‘a e ha‘a Heti.

⁸Pea ne fakalea ange ‘o pehē, Ka ‘oku pehē leva homou loto ke u tanu hoku pekia ke puli meiate au; pea mou ‘ofa ‘o fai ‘eku kole kia ‘Efiloni ko e foha ‘o Soha‘a,

⁹koe‘uhi ke ne tuku mai ‘a e ‘ana ko Makipila ‘a ia ‘oku ‘o‘ona, ‘a ia ‘oku ‘i he ngata‘anga ‘o hono ‘api; ka u ‘atu ha pa‘anga ko hono fe‘unga, ka ne tuku mai ia kiate au ‘i homou lotolotonga ko hoku tofi‘a mōku fa‘itoka.

¹⁰Ka ‘oku ta‘utu ‘a ‘Efiloni ‘i he ha‘oha‘onga ‘o ha‘a Heti: pea tali kia ‘Epalahame ‘a ‘Efiloni ko e matāpule Heti ‘i he ‘ao ‘o ha‘a Heti mo kinautolu na‘e fe‘alu‘aki ‘i he matapā ‘o hono kolo, ‘o pehē,

¹¹‘Ēī, ‘oua ‘e pehē; me‘a mai kiate au: ko e me‘a ki he ‘api kuo u ‘atu ni ia, pea ko e ‘ana ‘oku ‘i ai ‘oku ou ‘atu mo ia; ‘i he ‘ao ‘o e hako ‘o hoku tupu‘anga kuo u ‘atu ni mo‘ou: fai ai ho pekia.

¹²Pea fai ‘e ‘Epalahame ‘ene faka‘apa‘apa ‘i he ‘ao ‘o e kakai ‘o e fonua.

¹³Pea ne lea kia ‘Efiloni ‘i he ‘ao ‘o e kakai ‘o e fonua, ‘o pehē, Ka ko eni, kapau ko ho loto ia, me‘a mai, te u ‘atu ha pa‘anga ki he ‘api; ke ke tali ia meiate au, ka u tanu hoku pekia ‘i he potu ko ia.

¹⁴Pea tali ‘e ‘Efiloni kia ‘Epalahame, ‘o ne pehē kiate ia.

¹⁵‘Ēī, me‘a mai: ko ha konga kelekele ‘oku fāngeau sikeli pē hono pa‘anga, ko e hā ia ‘iate kitaua? kehe pē ke ke fai ho pekia.

¹⁶Pea fai ‘a ‘Epalahame ki he me‘a ‘a ‘Efiloni, ‘o ne fua tautau kia ‘Efiloni ‘a e pa‘anga kuo ne tala ‘i he ha‘oha‘onga ‘o ha‘a Heti, ko e sikeli siliva ‘e fāngeau, ko e pa‘anga hū ‘i he kau fakatau.

¹⁷Pea ko e ‘api ‘o ‘Efiloni, ‘a ia ‘oku ‘i Makipila, ‘a ia ‘oku tu‘u ki he hahake ‘o Mamilī, ‘io, ‘a e ‘api mo e ‘ana ‘oku ‘i ai, mo e ngaahi ‘akau kotoa pē ‘oku ‘i he ‘api, ‘io, mo e ngaahi ‘akau ‘o e kau‘ā takatakai,

¹⁸na‘e fakapapau ia mo‘o ‘Epalahame ko ‘ene me‘a ‘i he ‘ao ‘o ha‘a Heti, mo kinautolu na‘e fe‘alu‘aki ‘i he matapā ‘o hono kolo.

¹⁹Pea hili ia na‘e tanu ‘e ‘Epalahame ‘a hono uaifi ko Sela ‘i he ‘ana ‘i he ‘api ko Makipila, ki he hahake ‘o Mamilī (‘a ia ko Hepeloni) ‘i he fonua ko Kēnani.

²⁰Pea ko e ‘api mo e ‘ana ‘oku ‘i ai na‘e fakapapau mo‘o ‘Epalahame meia ha‘a Heti, ko e tofi‘a mōno fa‘itoka.