Read KO E TOH TAPU KATOA TONGA KO SĒNESI 25 Bible Online

KO SĒNESI 25 - KO E TOH TAPU KATOA TONGA bible

KO SĒNESI 25

¹PEA na‘e ma‘u ‘e ‘Epalahame mo ha uaifi, pea ko hono hingoa ko Kētula.

²Pea ne fā‘ele‘i kiate ia ‘a Similani, mo Siokasane, mo Mētani, mo Mitiani, mo ‘Isipaka, mo Sua‘a,

³pea ko Siokasane ko e tupu‘anga ‘o Sipa, mo Tētani. Pea ko e hako ‘o Tētani ‘a e kau ‘Āsuli mo e Lētusi mo e Leumi.

⁴Pea ko e hako ‘o Mitiani; ko ‘Efa, mo ‘Ēfeli, mo ‘Īnoke, mo ‘Apita‘a, mo ‘Elita‘a. Ko kinautolu ni kotoa pē ko e hako ‘o Kētula.

⁵Pea ko ‘Aisake na‘e tuku ki ai ‘e ‘Epalahame ‘ene koloa kotoa;

⁶ka ki he fānau ‘o ‘ene kau sinifu na‘e ‘atu ‘e ‘Epalahame ha ngaahi me‘a‘ofa; pea ne tuku atu kinautolu ‘i he‘ene kei mo‘ui ke ‘alu ki hahake, ke nau nofo mama‘o mo hono foha ko ‘Aisake ‘i he feitu‘u hahake.

⁷Pea ko e fuoloa eni ‘o e mo‘ui ‘a ‘Epalahame ko e ta‘u ‘e teau mo e ta‘u ‘e fitungofulu mā nima.

⁸Pea toki hokotaki ‘a ‘Epalahame ‘o ne pekia, kuo toulekeleka ‘aupito, ko e ‘eiki kuo fuoloa, pea a‘ua‘u; pea na‘e ului ia ki hono kakai.

⁹Pea na‘e telio ia ‘e hono ongo foha ko ‘Aisake mo ‘Isime‘eli ‘i he ‘ana ko Makipila, ‘i he ‘api ‘o ‘Efiloni ko e foha ‘o Soha‘a, ko e matāpule Heti; ‘a ia na‘e tu‘u ki he potu ‘o Mamilī ki hahake:

¹⁰‘io, ko e ‘api na‘e fakatau e ‘Epalahame mei he ha‘a Heti: ko e potu ia na‘e fai ai ‘a ‘Epalahame mo hono uaifi ko Sela.

¹¹Pea hili ‘a e pekia ‘a ‘Epalahame na‘e fakamonū‘ia ‘e he ‘Otua ‘a hono foha ko ‘Aisake: pea na‘e nofo ‘a ‘Aisake ‘i Pea-lehai-lo‘ai.

¹²Ko e tohi eni ‘o e hako ‘o ‘Isime‘eli, ko e foha ‘o ‘Epalahame, ‘a ia na‘e fanau‘i kia ‘Epalahame ‘e Heka‘ā, ko e fefine ‘Isipite ko e kaunanga ‘a Sela.

¹³Pea ko eni ‘a e ngaahi hingoa ‘o e hako ‘o ‘Isime‘eli, ‘a honau hingoa mo ‘enau tupu. Ko e ‘uluaki foha ‘o ‘Isime‘eli ko Nepaiote, pea hoko mo Keta, mo ‘Atape‘eli, mo Mipisami;

¹⁴kae‘uma‘ā ‘a Mīsima, mo Tuma, mo Masa;

¹⁵ko Hētati, mo Teimu, mo ‘Ietuli, mo Nāfisi, pea mo Kētema.

¹⁶Ko kinautolu ni ‘a e hako ‘o ‘Isime‘eli, pea ko honau ngaahi hingoa eni ‘onautolu na‘e ma‘u kolo mo e nofo‘anga; ko e toko hongofulu mā ua, ko e ngaahi ‘ulumotu‘a ‘o e ngaahi fa‘ahinga.

¹⁷Pea ko e ngaahi ta‘u eni ‘o e mo‘ui ‘a ‘Isime‘eli; ko e ta‘u ‘e teau mo e ta‘u ‘e tolungofulu mā fitu: pea ne hokotaki ‘o pekia; pea na‘e ului ki hono kakai.

¹⁸Pea ko honau nofo‘anga na‘e fai mei Havila ki Sua, ‘a ia ‘oku tu‘u ki he hahake ‘o ‘Isipite, ‘i he hala ki ‘Āsilia: na‘a ne ta‘utu ki hahake ‘i hono kāinga kotoa pē.[57]

¹⁹Ko e tohi eni ‘o e hako ‘o ‘Aisake ko e foha ‘o ‘Epalahame. Na‘e ma‘u ‘e ‘Epalahame ha foha ko ‘Aisake:

²⁰pea ‘i he fe‘unga ‘a ‘Aisake mo e ta‘u ‘e fāngofulu na‘a ne ma‘u mōno uaifi ‘a Lepeka, ko e ‘ōfefine ‘o Petueli ko e motu‘a Sīlia mei Mesopotēmia, ko e tuofefine ‘o Lēpani ko e Sīlia.

²¹Pea na‘e hūfia ‘e ‘Aisake hono uaifi kia Sihova, he na‘e pa‘a ia: pea na‘e ongo ‘ene hū kia Sihova, pea feitama hono uaifi ko Lepeka.

²²Pea feteketeke‘i ‘a e fānau ‘i hono manava; pea pehē ‘e he fefine, Kapau ko ia, ko e hā ‘oku ou pehē ai? pea ne ‘alu ‘o fehu‘i kia Sihova.

²³Pea folofola ‘a Sihova kiate ia, Ha kakai ‘e ua ‘oku ‘i ho manava, ‘E mavahe mei ho fatu ha ongo fa‘ahinga, ‘o kaukaua ‘a e taha ‘i he taha; Ko ta‘okete te ne tauhi ‘a tehina.

²⁴Pea faifai pea kakato hono ngaahi māhina ke fā‘ele, pea tā na‘e māhanga.

²⁵Pea tō mai ‘a e ‘uluaki kuo kulokula, ‘o hangē ko e kofu fulufulu‘i manu hono kotoa; pea nau fakahingoa ia ko ‘Īsoa [ko Fulufulua].[58]

²⁶Pea hili ia na‘e tō mai hono tokoua ‘oku ne puke ‘a e muiva‘e ‘o ‘Īsoa; pea nau fakahingoa ia ko Sēkope [ko Hākiva‘e];[59] pea na‘e fe‘unga ‘a ‘Aisake mo e ta‘u ‘e onongofulu ‘i he‘ene fā‘ele‘i kinaua.

²⁷Pea hoko ‘o lalahi ‘a e ongo tamaiki: pea ko e faiva ‘o ‘Īsoa ko e tulimanu, ko e tama taka vao ia; ka ko Sēkope na‘e anga māopo, ko e tama taka fale.

²⁸Pea pele ‘aki ‘e ‘Aisake ‘a ‘Īsoa, koe‘uhi ko ‘ene kai kiki mei he‘ene tulimanu: ka ko Sēkope ‘a e pele ‘a Lepeka.

²⁹Tokua na‘e fai ‘e Sēkope ‘ene haka sepo, mo e a‘u mai ‘a ‘Īsoa mei he vao kuo ne ‘aungalua:

³⁰pea pehē ‘e ‘Īsoa kia Sēkope, ‘Ē, ‘omi ha‘aku me‘i me‘a kula ke u folo, ‘a e kula na; he kuo u ‘aungalua: ko hono ‘uhinga ia na‘e hingoa ai ko ‘Ītomi [ko Kula][60]

³¹Pea pehē ‘e Sēkope, Pe‘i fakatau ni kiate au ‘a e hoko.

³²Pea pehē ‘e ‘Īsoa, ‘Ā, ko ‘eku faka‘a‘au eni ki he mate; pea ko e hā hono ‘aonga ‘o e me‘a ko ia kiate au, ‘a e tu‘unga hoko?

³³Pea pehē ‘e Sēkope, Pe‘i fuakava mai leva. Pea ne fuakava kiate ia: ‘o ne fakatau kia Sēkope hono tu‘unga hoko.

³⁴Pea toki ‘ange ‘e Sēkope kia ‘Īsoa ha mā mo ha sepo piini, pea ne kai mo inu; pea toki tu‘u ia ‘o ‘alu. Ko e va‘inga‘aki ē ‘e ‘Īsoa ‘a e tu‘unga hoko.