Read KO E TOH TAPU KATOA TONGA KO SĒNESI 26 Bible Online

KO SĒNESI 26 - KO E TOH TAPU KATOA TONGA bible

KO SĒNESI 26

¹PEA na‘e faifai pea honge ‘a e fonua (taha kehe ‘a e ‘uluaki honge ‘a ia na‘e hoko ‘i he kuonga ‘o ‘Epalahame), pea ‘alu ‘a ‘Aisake ki Kela, kia ‘Apimeleki ko e Tu‘i Ha‘a Filisitia.

²Pea hā kiate ia ‘a Sihova, ‘o ne folofola mai, ‘Oua te ke ‘alu hifo ki ‘Isipite; ‘ilonga pe ha fonua te u fakahā atu, pea ke nofo ai.

³Ke ke nofonofo hifo ‘i he fonua ni, pea te u kau mo koe, pea te u tāpuaki‘i koe: he ko koe mo ho hako te u foaki ki ai ‘a e ngaahi fonua kotoa ko eni; pea te u fakaai ‘a e fuakava ‘a ia na‘a ma fefuakava‘aki mo ‘Epalahame ko ho‘o tamai:

⁴pea te u fakatokolahi ho hako ke tatau mo e ngaahi fetu‘u ‘o e langi; pea te u ‘atu ki ho hako ‘a e ngaahi fonua kotoa ko eni; pea ko ho hako ‘e monū‘ia mei ai ‘a e ngaahi pule‘anga ‘o māmani:

⁵Koe‘uhi ā na‘e tuitala ‘a ‘Epalahame ki he‘eku lea, mo ne tauhi ‘eku ngaahi fekau, ‘a ‘eku ngaahi tu‘utu‘uni, mo ‘eku ngaahi fono, pea mo ‘eku ngaahi lao.

⁶Ko ia na‘e nofo ‘a ‘Aisake ‘i Kela:

⁷pea ko e kau tangata ‘o e feitu‘u na‘a nau fehu‘i kiate ia ‘i hono uaifi; pea ne pehē, Ko hoku tuofefine ia: he na‘a ne manavahē ke tala, Ko hoku uaifi, he‘ene pehē, Na‘a tāmate‘i kita ‘e he kakai ‘o e potu koe‘uhi ko Lepeka, he ko e fefine hōihoifua.

⁸Pea kuo fuoloa ‘ene ‘i he potu ko ia, pea ‘iloange, ko ‘Apimeleki ko e Tu‘i Ha‘a Filisitia, ‘i he‘ene sio kitu‘a ‘i he tupa, na‘a ne vakai tā ‘oku fakavā ‘a ‘Aisake mo hono uaifi ko Lepeka.

⁹Pea ui ange ‘a ‘Apimeleki kia ‘Aisake, ‘o ne pehē, ‘Ā, tā ko ho uaifi pē ia: pea fēfē ai ho‘o pehē mai ko ho tuofefine ia? Pea tali ‘e ‘Aisake, Ko ‘eku pehē, na‘a faifai pea u mate koe‘uhi ko ia.

¹⁰Pea me‘a ‘e ‘Apimeleki, Ko e hā kuo ke fai pehē ai kiate kimautolu? he ka ne si‘i-kae-‘amo kae mohe ha taha ‘o e kakai mo ho uaifi, pehē kuo ke fakaangahala‘i kimautolu.

¹¹Pea fonosi ‘e ‘Apimeleki ‘a e kakai kotoa, ‘o pehē, Ka ai ha taha te ne ala ki he tangata ni pe ko hono uaifi, te ne mātu‘aki mate.

¹²Pea tōta‘u ‘a ‘Aisake ‘i he fonua ko ia, pea ne utu ‘i he ta‘u ko ia ‘o taki tu‘o teau; he na‘e tāpuaki‘i ia ‘e Sihova.

¹³Pea na‘e mā‘olunga ‘a e tangata, pea ne faka‘a‘au ai pē ki mu‘a, ‘o faifai ‘o ne mā‘olunga ‘aupito:

¹⁴he na‘a ne mohu sipi, pea mohu pulu, pea tokolahi ‘ene kau tamaio‘eiki: pea na‘e meheka ‘a e kau Filisitia kiate ia.

¹⁵Pea ko e ngaahi vai kotoa pē ne keli ‘e he kau tamaio‘eiki ‘o ‘ene tamai ‘i he kuonga ‘o ‘ene tamai ko ‘Epalahame, ne pupunu ‘e he kau Filisitia, ‘o tanu kelekele.

¹⁶Pea me‘a ‘a ‘Apimeleki kia ‘Aisake, Ke ke hiki meiate kimautolu; he ‘oku ke mālohi fau ‘iate kimautolu.

¹⁷Pea toki hiki mei ai ‘a ‘Aisake, ‘o ne fokotu‘u tēniti ‘i he tele‘a ‘o Kela, ‘o ne nofo ‘i he potu ko ia.

¹⁸Pea hanga ‘a ‘Aisake ‘o toe keli ‘a e ngaahi vaikeli ‘a ia na‘e keli ‘i he kuonga ‘o ‘ene tamai ko ‘Epalahame; koe‘uhi kuo pupunu ‘e he kau Filisitia hili ‘a e pekia ‘a ‘Epalahame: pea ne ‘ai ki ai ‘a e ngaahi hingoa na‘e ‘ai ‘e he‘ene tamai.

¹⁹Pea na‘e keli holo ‘i he tele‘a ‘e he kau tamaio‘eiki ‘a ‘Aisake, pea nau ‘ilo ai ha matavai mo‘ui.

²⁰Pea na‘e fakakikihi ai ‘a e kau tauhi manu ‘o Kela mo e kau tauhi manu ‘a ‘Aisake, ‘o nau pehē, Ko homau vai: ko ia na‘a ne fakahingoa ‘a e vai ko ‘Ēseki [ko Fakamālohi], koe‘uhi na‘a nau fai fakamālohi kiate ia.

²¹Pea nau keli ha vai ‘e taha; pea nau ke foki ‘i he vai ko ia: ko ia na‘a ne fakahingoa ia ko Sītina [ka Fakafili].

²²Pea ne hiki mei he potu ko ia, ‘o ne keli ha vai ‘e taha; pea na‘e ‘ikai te nau kē ai, Ko ia na‘a ne fakahingoa ko Leopote [ko Fu‘u-‘atā], he‘ene pehē, Kuo faka‘ata‘atā ‘eni mo‘otautolu ‘e Sihova, pea te tau tupu ‘i he fonua.

²³Pea ne ‘alu hake mei ai ki Peasipa.

²⁴Pea na‘e hā kiate ia ‘a Sihova ‘i he pō ko ia, ‘o ne folofola mai, Ko au ko e ‘Otua ‘o ho‘o tamai ko ‘Epalahame: ‘oua te ke manavahē, he ‘oku ou ‘iate koe, pea te u tāpuaki‘i koe, pea te u fakatokolahi ho hako koe‘uhi ā ko ‘Epalahame na‘e tamaio‘eiki kiate au.

²⁵Pea ne fokotu‘u ‘i he potu ko ia ha ‘ōlita, pea ne fai ai ‘ene lotu ‘i he huafa ‘o Sihova; pea ne folahi hono tēniti ‘i he potu ko ia, pea hanga ‘e he kau tamaio‘eiki ‘a ‘Aisake, ‘o keli ai ha vai.

²⁶Toki ha‘u kiate ia ‘a ‘Apimeleki mei Kela, pea omi mo ia hono takanga ko ‘Ahusati, mo Fīkoli ko e ‘eiki ‘o ‘ene tau.

²⁷Pea lea ‘a ‘Aisake kiate kinautolu, Ko e hā kuo mou omi ai kiate au; ‘osi, ‘oku mou fehi‘a kiate au, pea kuo mou toutou teke‘i au?

²⁸Pea nau tali, Ko ‘ene mātu‘aki e‘a kiate kimautolu ‘oku kau ‘a Sihova mo koe; ko ia na‘a mau pehē, Ke ai mu‘a ha‘atau fuakava ‘a kimautolu mo koe: ko ia tau fuakava mo koe, ‘o pehē,

²⁹Ke ‘ilo ‘e koe ‘o kapau te ke fai ha kovi kiate kimautolu; ka ke fai pē ‘o hangē ko ‘emau fai atu, ‘a ē na‘e ‘ikai te mau ala kiate koe, kae fakapalataha ki he lelei, pea mau tuku melino atu pē koe: he ko koe pē ‘a e Pele ‘a Sihova ‘i he taimi ni.

³⁰Pea fai ‘e ia ha‘anau kātoanga, pea nau kai mo inu.

³¹Pea nau ‘ā hengihengi ‘o fefuakava‘aki; pea toki tukuange kinautolu ‘e ‘Aisake, pea nau māvae lelei mo ia.

³²Pea ‘iloange ‘i he ‘aho pē ko ia, na‘e omi ‘a e kau tamaio‘eiki ‘a ‘Aisake, ‘o nau fakaongo mai ‘enau keli vai; pea nau pehē mai, Kuo mau a‘u ki he vai.

³³Ko ia na‘a ne fakahingoa ia ko Sipa [ko Fuakava]: ‘ā ē ā kuo hingoa ai ‘a e kolo ‘o a‘u mai ki onopooni ko Peasipa [ko Vai-fuakava].[61]

³⁴Pea ‘i he faifai pea a‘u ‘a ‘Īsoa ki hono fāngofulu ta‘u, pea ne hanga ‘o mali mo Siutiti, ko e ‘ōfefine ‘o Pē‘eli ko e tangata Heti, pea mo Pasimati, ko e ‘ōfefine ‘o ‘Eiloni ko e tangata Heti;

³⁵pea ko e ongo me‘a ko ia ne hūkia ai ‘a e loto ‘o ‘Aisake mo Lepeka.