Read KO E TOH TAPU KATOA TONGA KO SĒNESI 28 Bible Online

KO SĒNESI 28 - KO E TOH TAPU KATOA TONGA bible

KO SĒNESI 28

¹KO ia na‘e ui mai ‘e ‘Aisake ‘a Sēkope, ‘o ne fai hono tāpuaki; pea ne tu‘utu‘uni ia ‘o pehē, ‘oua te ke mali mo ha ‘ōfefine ‘o ha taha Kēnani.

²Tu‘u, ‘o ‘alu ki Mesopotēmia, ki he ‘api ‘o Petueli ko e tamai ‘a ho‘o fa‘ē; pea ke kumi ai hao uaifi mei he fānau ‘a Lēpani ko e tuonga‘ane ‘o ho‘o fa‘ē.

³Pea ‘ofa ke tāpuaki‘i koe ‘e Sātai koe ‘Otua, pea ke ne ‘ai ke ke fanafanau mo tupu ke lahi, pea ke ke hoko ko e koto kakai;

⁴pea ke ne ‘atu ‘a e tāpuaki ‘o ‘Epalahame mo‘ou, pea mo ho hako foki; ke tō mo‘o tofi‘a ‘a e fonua ‘oku ke nofo muli ai, ‘a ia na‘e foaki ‘e he ‘Otua mo‘o ‘Epalahame.

⁵Pea tuku atu ‘e ‘Aisake ‘a Sēkope, pea ne ‘alu ki Mesopotēmia ki he matāpule Sīlia ko Lēpani, ko e foha ‘o Petueli, pea ko e tuonga‘ane foki ‘o Lepeka ko e fa‘ē ‘a Sēkope mo ‘Īsoa.

⁶Pea hā kia ‘Īsoa kuo fai ‘e ‘Aisake ‘a e tāpuaki ‘o Sēkope, pea kuo ne fekau atu ia ki Mesopotēmia, ke kumi hono uaifi mei ai; kae‘uma‘ā foki ‘i he‘ene fai hono tāpuaki kuo ne na‘ina‘i ia ‘o pehē, ‘E ‘ikai te ke mali mo ha ‘ōfefine ‘o ha taha Kēnani;

⁷pea kuo tuitala foki ‘a Sēkope ki he‘ene tamai mo ‘ene fa‘ē, pea kuo ne ‘alu ki Mesopotēmia;

⁸ko ia ‘i he vakai ‘e ‘Īsoa ‘oku tokotokangatāmaki ‘a e finangalo ‘o ‘ene ‘eiki ko ‘Aisake ki he kau fefine Kēnani;

⁹ko ia na‘a ne ‘alu ki ha‘a ‘Isime‘eli, ‘o ne fakalahi ‘aki ‘a e ongo uaifi kuo ne ma‘u ha fefine ‘e taha ko Mahalati ko e ‘ōfefine ‘o ‘Isime‘eli ko e foha ‘o ‘Epalahame, pea ko e tuofefine ‘o Nepaiote.

¹⁰Pea na‘e ‘alu atu ‘a Sēkope mei Peasipa, ‘o ne fononga ki Kālana.

¹¹Pea ne hoko fāinoa ki ha feitu‘u, pea ne nofo ai ‘i he pō ko ia, he kuo tō ‘a e la‘a; pea ne to‘o ha taha ‘o e ngaahi maka ‘o e feitu‘u, ‘o ne fokotu‘u mōno ‘olunga, pea ne tokoto ai ‘i he potu ko ia ke mohe.

¹²Pea ne misi, pea tā ko ha tu‘unga kuo tu‘u ‘i he kelekele, ‘o tau hake hono ‘ulu ki he langi; pea ko e kau ‘Āngelo ‘ena ‘a e ‘Otua ‘oku ‘alu hake mo ‘alu hifo ‘i ai.

¹³Pea tā ko Sihova ‘oku tu‘u mei ‘olunga,[64] ‘o ne folofola mai, Ko au ko Sihova ko e ‘Otua ‘o ‘Epalahame ko ho‘o ‘eiki, pea ko e ‘Otua ‘o ‘Aisake; ko e kelekele ‘oku ke tokoto ai, te u ‘atu ia mo‘ou mo ho hako;

¹⁴pea ‘e hoko ho hako ke tatau mo e efu ‘o e fonua, pea te ke mafola koe ki lulunga, mo hahake, mo e tokelau, mo e tonga; pea ‘e monū‘ia ‘iate koe ‘a e fa‘ahinga kotoa pē ‘o e kelekele, pea ‘i ho hako foki.[65]

¹⁵Pea ko eni ko au te u ‘iate koe, pea te u tauhi koe ‘i ho ngaahi founga kotoa pē, pea te u fakafoki koe ki he kelekele ko eni; he ‘e ‘ikai te u li‘aki koe kae‘oua ke u fai ‘a e ngaahi me‘a kuo u lea ai kiate koe.

¹⁶Pea ofo ‘a Sēkope mei he‘ene mohe, pea ne pehē, Tā ‘oku ‘afio ‘a Sihova ‘i he potu ni, ka u ta‘e‘ilo ki ai ‘e au.

¹⁷Pea na‘a ne manavahē, ‘o ne pehē, Hono ‘ikai fakalilifu ‘a e potu ni; ‘oku ‘ikai ko ha potu kehe eni, ka ko e fale ‘o e ‘Otua, ‘io, ko e matapā eni ‘o langi.

¹⁸Pea tu‘u hengihengi hake ‘a Sēkope, pea ne to‘o ‘a e maka kuo ne ‘olunga ‘aki, pea ne fokotu‘u ia ko e pou, pea ne lilingi ha lolo ki hono funga.

¹⁹Pea ne fakahingoa ‘a e potu ko ia ko Pēteli (ko Fale-‘o-e-‘Otua); ka ko Lusa ‘a e hingoa ‘o e kolo ‘i mu‘a.

²⁰Pea fai ai ‘e Sēkope ‘ene tukumo‘ui, he‘ene pehē, Kapau ‘e ‘iate au ‘a e ‘Otua, pea ne tauhi au ‘i he hala ko eni ‘oku ou ‘alu ai, pea ne tuku mai ha mā ke u kai, mo ha kofu ke u ‘ai,

²¹ka u toe ha‘u lelei ki he fale ‘o ‘eku ‘eiki; ‘e toki hoko ‘a Sihova ko hoku ‘Otua;

²²pea ko e maka ni, ‘a ia kuo u fokotu‘u ko e pou, ‘e hoko ia ko e fale ‘o e ‘Otua; pea ‘ilonga ha me‘a te ke ‘omi kiate au te u mātu‘aki ‘atu hono vahe hongofulu kiate koe.