Read KO E TOH TAPU KATOA TONGA KO SĒNESI 29 Bible Online

KO SĒNESI 29 - KO E TOH TAPU KATOA TONGA bible

KO SĒNESI 29

¹PEA hiki ‘e Sēkope hono fononga ki he fonua ‘o e kakai Hahake.

²Pea ne vakai, tā ko e vai ‘ena ‘i he toafa, pea ko e tākanga sipi ‘e tolu ‘oku tākoto ofi ai; he ko e vai ia na‘a nau fakainu mei ai ‘a e fanga manu; pea ko e maka na‘e tāpuni ‘aki ‘a e vai ko e maka lahi.

³Pea na‘e ‘oua pē ke tānaki ki ai ‘a e fanga manu kotoa pē, pea nau toki teka‘i ‘a e maka mei he ngutu vai, ‘o nau fakainu ‘a e fanga sipi, pea nau toe ‘ai ‘a e maka ki hono potu ki he ngutu vai.

⁴Pea na‘e lea ‘a Sēkope kiate kinautolu, kāinga, ko e kakai mei fē kimoutolu? Pea nau tali, Ko e kakai Kālana kimautolu.

⁵Pea ne pehē ange, ‘Oku mou ‘ilo ‘a Lēpani ko e foha ‘o Nēhoa? Pea nau pehē ‘Oku mau ‘ilo ia.

⁶Pea ne pehē kiate kinautolu, ‘Oku ne lelei? Pea nau tali, ‘Oku ne lelei pē; pea ko hono ‘ōfefine ‘ena ko Lesieli ‘oku ha‘u mo e fanga, sipi.

⁷Pea ne pehē, Ka ‘oku kei ho‘atā fau, kei tuai ‘a e tānaki ‘o e fanga manu; mou fakainu ‘a e fanga sipi, ‘o ‘ave ‘o fafanga.

⁸Pea nau tali, ‘E ‘ikai te mau lava, kae‘oua ke tānaki mai ‘a e ngaahi tākanga sipi kotoa pē, ‘o nau fakateka ‘a e maka mei he funga vai; pea mau toki fakainu ‘a e sipi.

⁹Pea lolotonga ‘enau talanoa mo e ha‘u ‘a Lesieli mo e fanga sipi ‘a ‘ene ‘eiki; he na‘e ‘a‘ana hono tauhi.

¹⁰Pea ‘i he mamata leva ‘e Sēkope kia Lesieli ko e ‘ōfefine ‘o Lēpani ko e tuonga‘ane ‘o ‘ene fa‘ē, mo e fanga sipi ‘a Lēpani ko e tuonga‘ane ‘o ‘ene fa‘ē, na‘a ne ‘unu‘unu atu, ‘o fakateka ‘a e maka mei he ngutu vai, ‘o ne fakainu ‘a e fanga sipi ‘a Lēpani ko e tuonga‘ane ‘o ‘ene fa‘ē.

¹¹Pea na‘e ‘uma ‘e Sēkope kia Lesieli, ‘o ne hua‘aki ‘ene fu‘u fākafoa.

¹²Pea tala ‘e Sēkope kia Lesieli, ko e tokoua ia ‘a ‘ene tamai, pea ko e tama ‘a Lepeka: pea lele ‘a e ta‘ahine, ‘o fakahā ki he‘ene tamai.

¹³Pea ‘i he fanongo leva ‘e Lēpani ki he pehē, Ko Sēkope ‘ena ko e tama ‘a hono tuofefine, na‘a ne lele ke fakafetaulaki kiate ia, ‘o ne fā‘ofua ki ai mo ne fekita kiate ia, ‘o ne fakahū mai ki hono fale. Pea fakamatala ‘e ia kia Lēpani ‘a e ngaahi me‘a ko ia kotoa.

¹⁴Pea pehē ‘e Lēpani kiate ia, Tā ko hoku hui koe mo hoku kakano. Pea na‘a na nonofo ‘o māhina kātoa.

¹⁵Pea pehē ‘e Lēpani kia Sēkope, ‘oku totonu koā ho‘o ngāue ta‘etotongi mai koe‘uhi ko hoku kāinga? tala mai mu‘a pe ko e hā ‘a e totongi ‘e fai atu?

¹⁶Pea na‘e ma‘u ‘e Lēpani ha ongo ‘ōfefine ‘e toko ua: ko e hingoa ‘o e lahi ko Lia, pea ko e hingoa ‘o e si‘i ko Lesieli.

¹⁷Pea na‘e matakuikui ‘a Lia,[66] ka ko Lesieli na‘e hōihoifua mo matamatalelei.

¹⁸Pea na‘e ‘ofa ‘a Sēkope kia Lesieli; pea ne pehē, Te u ngāue kiate koe ‘o ta‘u fitu koe‘uhi ko Lesieli ko ho ‘ōfefine ki mui.

¹⁹Pea pehē ‘a Lēpani, ‘Oku lelei mu‘a ‘eku ‘atu ia kiate koe ‘i ha‘aku ‘atu ki ha tangata kehe: nofo mai kiate au.

²⁰Pea na‘e ngāue ‘a Sēkope koe‘uhi ko Lesieli, ‘o fitu ta‘u; pea na‘e hangē kiate ia ko e ngaahi ‘aho si‘i pē, koe‘uhi ko ‘ene ‘ofa kiate ia.

²¹Pea na‘e toki lea ‘a Sēkope kia Lēpani, ‘o pehē, Ke ke tuku mai hoku uaifi, he kuo ‘osi hoku taimi, ka u ‘alu kiate ia.

²²Pea fakataha ‘e Lēpani ‘a e kakai kotoa pē ‘o e feitu‘u, ‘o ne fai ha kātoanga.

²³Pea ‘i he‘ene efiafi na‘a ne to‘o hono ‘ōfefine ko Lia, ‘o ne ‘ave ia kiate ia; pea ne ‘alu ki ai.

²⁴Pea foaki ‘e Lēpani ‘a ‘ene kaunanga ko Sīlipa ki hono ‘ōfefine ko Lia ma‘ane kaunanga.

²⁵Pea ‘i he‘ene pongipongi leva tā ko Lia ia: pea ne pehē kia Lēpani, Ko e hā ‘a e me‘a ni kuo ke fai kiate au? ‘Ikai ko Lesieli na‘a ku ngāue ai kiate koe? Pea ko e hā kuo ke kākaa‘i ai au?

²⁶Pea tali ‘e Lēpani, ‘Oku ‘ikai ha fai pehē ‘i homau feitu‘u, ke tomu‘a mali ‘a e tehina ‘i he ta‘okete.

²⁷Fakakakato ‘a e uike ‘o ‘eni, pea te mau toki ‘atu mo ‘ena foki, koe‘uhi ko e ngāue te ke fai kiate au, ‘o toe ta‘u ‘e fitu atu.

²⁸Pea fai pehē ‘e Sēkope, ‘o ne fakakakato ‘a e uike ‘o e fefine ko ē: pea ne ‘atu kiate ia hono ‘ōfefine ko Lesieli mōno uaifi.

²⁹Pea na‘e foaki ‘e Lēpani ki hono ‘ōfefine ko Lesieli ‘a ‘ene kaunanga ko Pīla‘a ma‘ane kaunanga ‘a‘ana.

³⁰Pea ne ‘alu foki kia Lesieli, pea ne ‘ofa foki kia Lesieli ‘o lahi ‘ia Lia; pea ne ngāue foki kiate ia, ‘o toe fitu ta‘u atu.

³¹Pea ‘i he ‘afio‘i ‘e Sihova ‘oku fai ha fehi‘a kia Lia, na‘a ne fakafanau ia; ka ka pa‘a pē ‘a Lesieli.

³²Pea feitama ‘a Lia, pea ne fā‘ele‘i ha tama tangata, pea ne fakahingoa ia ko Lūpeni (ko Vakai-ko-e-tama);[67] he‘ene pehē, Koe‘uhi ā kuo vakai ‘e Sihova ki hoku ngaohikovi‘i, he ko eni ‘e ‘ofa kiate au ‘a hoku husepāniti.

³³Pea ne toe feitama, ‘o ne fā‘ele‘i ha tama tangata; pea ne pehē, Tā kuo fanongo ‘e Sihova: ‘oku fai ha fehi‘a kiate au, pea kuo ne foaki mai mo e me‘a ni foki: pea ne fakahingoa ia ko Simione (ko Fanongo).[68]

³⁴Pea ne toe feitama ‘o ne fā‘ele‘i ha tama tangata; pea ne pehē, Ko e taimi ko eni ‘e pīkitai ‘a hoku husepāniti kiate au, he kuo u fā‘ele‘i ma‘ana ha tangata ‘e toko tolu: ko ia na‘e fakahingoa ia ko Līvai [ko Fakapiki].[69]

³⁵Pea ne toe feitama, ‘o fā‘ele‘i ha tama tangata; pea ne pehē, Ko e taimi ni te u fakamālō kia Sihova: ko ia na‘a ne fakahingoa ia ko Siuta [ko Fakamālō];[70] pea motu ai ‘ene fanau.