Read KO E TOH TAPU KATOA TONGA KO SĒNESI 3 Bible Online

KO SĒNESI 3 - KO E TOH TAPU KATOA TONGA bible

KO SĒNESI 3

¹PEA ko e Ngata na‘e olopoto lahi ‘i he manu kotoa pē ‘o e fonua, ‘a ia ne ngaohi ‘e Sihova ‘Elohimi. Pea ne huhū ange ki he fefine, ‘Oku mo‘oni koā kuo folofola ‘e he ‘Otua ke ‘oua te mo kai mei he ‘akau kehekehe ‘o e ngouetapu?

²Pea tali ‘e he fefine ki he ngata, ‘Oku ngofua pē ‘ema kai ‘a e fua ‘o e ngaahi ‘akau ‘o e ngouetapu:

³ka koe fua ‘o e ‘akau ‘oku ‘i he loto ngoue, kuo folofola ‘a e ‘Otua, ‘E ‘ikai te mo kai mei ai, pea ‘e ‘ikai te mo ala ki ai, na‘a mo mate.

⁴Pea pehē ‘e he Ngata ki he fefine, ‘E ‘ikai ‘aupito te mo mate:

⁵kaekehe, ‘oku mea‘i ‘e he ‘Otua ko e ‘aho te mo kai ai ‘e ‘ā ai homo mata, pea te mo hoko ke hangē ko e ‘Otua, ho‘omo ‘ilo ‘a e lelei mo e kovi.

⁶Pea na‘e vakai ‘e he fefine ko e ‘akau ia ‘oku lelei ki he kai, pea matamatalelei ki he mata, kae‘uma‘ā ko e ‘akau ke fai ki ai ha vēlevele ko ‘ene fakapoto‘i, pea ne hanga ‘o toli hono fua, ‘o kai, pea ne ‘ange foki ki hono husepāniti na‘e ‘iate ia; pea kai mo ia.

⁷Pea ‘ā ai hona mata ‘osi pē, ‘o na ‘ilo tā ‘oku na telefua; pea na tui lou fiki, ‘o ngaohi ‘aki hana vala.

⁸Pea na‘a na fanongo ki he le‘o ‘o Sihova ‘Elohimi, he‘ene hā‘ele ‘i he ngouetapu ‘i he hauhaufano ‘o e ‘aho: pea toitoi ‘a e tangata mo hono uaifi ‘i ha loto ‘ulu‘akau ‘o e ngoue, ke ‘oua na‘a mea‘i kinaua ‘e Sihova ‘Elohimi.

⁹Pea ui ki he tangata ‘e Sihova ‘Elohimi, ‘o ne pehē ki ai, Kofa‘ā koe?

¹⁰Pea pehē ‘e ia, Na‘a ku fanongo ki ho le‘o ‘i he ngouetapu, pea u manavahē, koe‘uhi kuo u telefua; pea u toitoi.

¹¹Pea ne folofola mai, Ko hai na‘e fakahā kiate koe ‘oku ke telefua? Kuo ke kai koā mei he ‘akau na‘a ku tapui ho‘o kai mei ai, ‘ō?

¹²Pea tali ‘e he tangata, Ko e fefine na‘a ke ‘omi ke ma nonofo, ko ia ia na‘a ne ‘omi ha‘aku me‘a mei he ‘akau, pea u kai.

¹³Pea folofola ‘a Sihova ‘Elohimi ki he fefine, Ko e hā eni kuo ke fai? Pea tali ‘e he fefine, Ko e Ngata na‘a ne kākaa‘i au, pea u kai.

¹⁴Pea folofola ‘a Sihova ‘Elohimi ki he Ngata, Ko e me‘a ‘i ho‘o fai pehē, ‘e lahi taha ho‘o mala‘ia ‘i he manu lalata kotoa pē, mo e manu kaivao kotoa pē; te ke ‘alu ‘aki ho kete, pea te ke kai efu ‘i he ngaahi ‘aho kotoa pē ‘o ho‘o mo‘ui:

¹⁵te u ‘ai ke mo fetāufehi‘a‘aki, ‘a koe mo e fefine, pea ko ho hako mo hono hako; ‘e laiki ‘e ia ho ‘ulu, pea te ke laiki ‘e koe ‘a hono muiva‘e.

¹⁶Pea ki he fefine na‘a ne folofola, Te u mātu‘aki fakalahi ho‘o mamahi, kae‘uma‘ā ho‘o feitama; pea te ke fā‘ele‘i mamahi ‘a e fānau; kae tō ho‘o holi ki ho husepāniti, pea ‘e ‘a‘ana ‘a e pule kiate koe.

¹⁷Pea kia ‘Ātama na‘a ne folofola, Ko e me‘a ‘i ho‘o fakaongo ki he lea ‘a ho uaifi, mo ke kai mei he ‘akau, ‘a ia na‘a ku tu‘utu‘uni ai ‘o pehē, ‘E ‘ikai te ke kai mei ai: kuo mala‘ia ‘a e kelekele koe‘uhi ko koe; te ke kai mei ai ‘i he mamahi ‘i he ‘aho kotoa pē ‘o ho‘o mo‘ui;

¹⁸pea ko e ‘akau talatala mo e talatala‘āmoa te ne fakatupu ma‘a u; pea te ke kai ‘a e mohuku ‘o e ngoue;

¹⁹te ke kai ho‘o me‘akai ‘i he kakava ‘o ho mata, kae‘oua ke ke foki ki he kelekele ‘a ia na‘e to‘o koe mei ai: he ko e efu koe, pea ko e efu te ke foki ki ai.

²⁰Pea fakahingoa ‘e he tangata[11] hono uaifi ko ‘Ivi [ko Mo‘ui‘anga];[12] koe‘uhi ko e fa‘ē ia ‘a e kakai kotoa pē.

²¹Pea na‘e ngaohi ‘e Sihova ‘Elohimi ma‘a ‘Ātama mo hono uaifi ‘a e ngaahi kofu kili‘imanu, ‘o ne ‘ai kiate kinaua.

²²Pea na‘e folofola ‘a Sihova ‘Elohimi; Vakai, kuo hoko ‘a e tangata ke hangē ko e toko taha ‘iate kitautolu, ke ne ‘ilo ‘a e lelei mo e kovi:[13] ‘ē, na‘a ‘iloange te ne hanga ‘o toli foki mei he ‘Akau ‘o e Mo‘ui, ‘o ne kai, ‘o ne mo‘ui ‘o ta‘engata:

²³ko ia na‘e tuku atu ia ‘e Sihova ‘Elohimi mei he ngouetapu ‘i ‘Īteni, ke ne ngoue‘i ‘a e kelekele ‘a ia na‘e to‘o ia mei ai.

²⁴‘Io, ne kapusi ‘a e tangata; pea ne fakanofo ‘i hahake ‘i he ngouetapu ‘i ‘Īteni, ‘a e Selupimi,[14] mo ha heletā ulo na‘e tavilovilo, mo le‘ohi ‘a e hala ki he ‘Akau ‘o e Mo‘ui.