Read KO E TOH TAPU KATOA TONGA KO SĒNESI 30 Bible Online

KO SĒNESI 30 - KO E TOH TAPU KATOA TONGA bible

KO SĒNESI 30

¹PEA ‘i he vakai ‘e Lesieli ‘oku ‘ikai te ne fanau kia Sēkope, na‘a ne meheka ki hono ta‘okete, pea ne pehē kia Sēkope, Fei mo ‘omi ha‘aku fānau; he ka ‘ikai, te u mate.

²Pea ‘ita ‘a Sēkope kia Lesieli; pea ne pehē, He kuo u fetongi ‘a e ‘Otua, ‘a ia kuo ne ta‘ofi meiate koe ‘a e fua ‘o e manava?

³Pea pehē ‘e Lesieli, Ko ‘ena ‘eku kaunanga ko Pīla‘a, ke ke ‘alu kiate ia; ke ne fanau ki hoku funga, ka u ma‘u fānau foki ‘e au ‘iate ia.

⁴Ko ia na‘a ne foaki kiate ia ‘a Pīla‘a ko ‘ene kaunanga mōno uaifi; pea na‘e ‘alu ‘a Sēkope ki ai.

⁵Pea feitama ‘a Pīla‘a, pea ne fā‘ele‘i kia Sēkope ha tama tangata.

⁶Pea pehē ‘e Lesieli, Kuo fakamāu‘i ‘eku me‘a ‘e he ‘Otua, pea kuo ne fanongo foki ki hoku le‘o, pea kuo ne foaki mai ha tama tangata: ‘ā e ā na‘a ne fakahingoa ia ko Tani (ko Fakamāu).[71]

⁷Pea toe feitama ‘a Pīla‘a ko e kaunanga ‘a Lesieli, ‘o ne fā‘ele‘i kia Sēkope ha tama tangata ko hono ua.

⁸Pea pehē ‘e Lesieli, Ko e ngaahi fefa‘uhi lalahi kuo u fefa‘uhi ai mo hoku ta‘okete, pea kuo u lava foki: ko ia na‘a ne fakahingoa ia ko Nafitalai (ko ‘Eku Fefa‘uhi).[72]

⁹Pea ‘i he vakai ‘e Lia kuo motu ‘ene fanau, na‘a ne ‘ave ‘e ia ‘ene kaunanga ko Sīlipa, ‘o ne foaki ia kia Sēkope mōno uaifi.

¹⁰Pea fanau kia Sēkope ‘e Sīlipa ko e kaunanga ‘a Lia, ko e tama tangata.

¹¹Pea pehē ‘e Lia, Kuo u mālie; pea ne fakahingoa ko Kata (ko Ta‘imālie).[73]

¹²Pea fanau kia Sēkope ‘e Sīlipa ko e kaunanga ‘a Lia ha tama tangata ko hono ua.

¹³Pea pehē ‘e Lia, Kuo u monū‘ia; he kuo kamata lau au ‘e he kau fefine ko e monū‘ia; pea ne fakahingoa ia ka ‘Āseli (ko Monū‘ia).[74]

¹⁴Pea ‘alu ‘a Lūpeni ‘i he taimi ututa‘u uite, pea ne ‘ilo ‘i he vao ‘a e ‘akau fakafanau,[75] pea ne ‘omi ki he‘ene fa‘ē ko Lia. Pea pehē ‘e Lesieli kia Lia, ‘Omi mu‘a ma‘aku ha me‘a mei he ngaahi ‘akau fakafanau na ‘a ho‘o tama.

¹⁵Pea ne tali, Ko e me‘a si‘i koā ho‘o ‘ave hoku husepāniti, pea te ke ‘ave foki ‘a e ngaahi ‘akau fakafānau ‘a ‘eku tama? Pea pehē ange ‘e Lesieli, Ka me‘a, pea ne mohe mo koe ‘apō ko e totongi ‘o e ngaahi ‘akau fakafānau ‘a ho‘o tama.

¹⁶Pea ‘i he ha‘u ‘a Sēkope mei ‘uta ‘i he efiafi, na‘e ‘alu atu ‘a Lia ke fakafetaulaki kiate ia, ‘o ne pehē ange, Te ke ha‘u kiate au; he kuo u mātu‘aki unga koe ‘aki ‘a e ngaahi ‘akau fakafānau ‘a ‘eku tama. Pea ne mohe mo ia ‘i he pō ko ia.

¹⁷Pea na‘e ongo‘i ‘e he ‘Otua ‘a Lia, pea ne feitama, ‘o ne fā‘ele‘i kia Sēkope ha tama tangata ko hono toko nima.

¹⁸Pea pehē ‘e Lia, kuo ‘omi ‘e he ‘Otua ‘eku totongi, koe‘uhi na‘a ku ‘atu ‘eku kaunanga ki hoku husepāniti: pea ne fakahingoa ka ‘Īsaka (ko ‘Oku-ai-ha-Totongi).[76]

¹⁹Pea toe feitama ‘a Lia, ‘o ne fā‘ele‘i kia Sēkope ha tama tangata ko hono toko ono.

²⁰Pea pehē ‘e Lia, Kuo fakakoloa ‘aki au ‘e he ‘Otua ha koloa lelei; kuo pau eni ke nofo mai hoku husepāniti kiate au; he kuo u fā‘ele‘i kiate ia ha fānau tangata ‘e toko ono: ko ia na‘a ne fakahingoa ia ka Sepulone (ko Nonofo).[77]

²¹Pea hili ia na‘a ne fā‘ele‘i ha ta‘ahine, pea ne fakahingoa ia ko Taina.

²²Pea manatu ‘e he ‘Otua kia Lesieli, pea ongo‘i ia ‘e he ‘Otua, ‘o ne fakafanau ia.

²³Pea ne feitama, ‘o ne fā‘ele‘i ha tama tangata; pea ne pehē, Kuo hiki ‘e he ‘Otua hoku mā‘anga:

²⁴pea ne fakahingoa ia ko Siosifa (ko Fakalahi);[78] he‘ene pehē, Ke fakalahi mai kiate au ‘e Sihova ‘aki ha tama ‘e taha.

²⁵Pea ‘i he hili ‘a e fā‘ele‘i ‘o Siosifa ‘e Lesieli, na‘e lea ‘a Sēkope kia Lēpani ‘o pehē, Tuku mai au ke u ‘alu ki hoku ‘api, mo hoku fonua.

²⁶Tuku mai hoku ngaahi uaifi mo ‘eku fānau, ‘a ia kuo u ngāue ai kiate koe, ka u ‘alu: he ‘oku ke ‘ilo ‘e koe ‘a e ngāue kuo u fai kiate koe.

²⁷Pea tali ‘e Lēpani ki ai, Ka ‘oku ke ‘ofa kiate au, ‘oua: kuo u ‘ilo ‘i he tongafisi tā kuo tāpuaki au ‘e Sihova koe‘uhi ko koe.

²⁸Pea ne pehē, Tu‘utu‘uni mai hao totongi, pea te u ‘atu.

²⁹Pea ne pehē ange, ‘Oku ke ‘ilo pē ‘a e anga ‘o ‘eku ngāue kiate koe, pea mo e anga ‘o e ‘iate au ho‘o fanga manu.

³⁰Hono ‘uke ‘a e me‘a na‘a ke ma‘u ‘i he te‘eki te u ha‘u? pea kuo tupu ko e fu‘u me‘a; pea kuo ō mo au ho tāpuekina ‘e Sihova;[79] pea ko eni, te u ngāue fakakū ‘e au foki ma‘a hoku fāmili?

³¹Pea ne pehē, Ko e hā te u ‘atu? Pea tali ‘e Sēkope, ‘E ‘ikai te ke ‘omi ha me‘a kiate au: ka ‘o kapau te ke fai mai ‘a e me‘a ko eni, te u toe fafanga mo tauhi ho‘o fanga manu.

³²Te u ‘asi atu ‘i ho‘o fanga manu kotoa pē he ‘aho ni, pea te u vahe‘i mei ai ‘a e manu kotoa pē ‘oku tukumisi pe pulepule,[80] mo e manu kotoa pē ‘oku kelo ‘i he fanga sipi, mo e pulepule mo e tukumisi ‘i he fanga kosi: pea ko e fa‘ahinga ko ia ko ‘eku totongi ‘amui.

³³Ko ia ‘e fakamo‘oni ma‘aku ‘e he‘eku faitotonu ‘amui, ‘oka ke ka ha‘u ki he‘eku totongi hono vakai‘i: ‘ilonga ha manu ‘i he‘eku fanga kosi ‘a‘aku ‘oku ‘ikai ke tukumisi pe pulepule, pea ‘ilonga ha manu ‘i he‘eku fanga sipi ‘oku ‘ikai ko kelo, ‘e lau ia ko ‘eku kaiha‘a.

³⁴Pea pehē ‘e Lēpani, Taumaiā ke fai ‘o hangē ko ia kuo ke lea ki ai.

³⁵Pea ne hanga ‘i he ‘aho ko ia, ‘o ne vahe‘i ‘a e fanga kosi tangata na‘e lavatea mo pulepule pea mo e fanga kosi fefine na‘e tukumisi pe pulepule ‘io, ‘a e manu kotoa pē na‘e ai hā fo‘i me‘a ‘oku hinehina, pea mo ia ‘i he fanga sipi na‘e ‘uli‘uli, pea ne tuku ia ke tauhi ‘e he‘ene fānau.

³⁶Pea ne tu‘utu‘uni ‘a e mama‘o ‘o Sēkope mo ia, ke fe‘unga mo e fononga ‘i he ‘aho ‘e tolu: pea na‘e tauhi ‘e Sēkope ‘a hono toe ‘o e fanga manu ‘a Lēpani.

³⁷Pea tā ‘e Sēkope ‘a e ngaahi va‘a ‘o e ‘akau ko e popilā mata mo e ‘ai, mo e paleini; pea na‘a ne fohi fakanikoniko‘i ke pule hinehina, he‘ene ‘ai ke hā ‘a e kakano hina ‘o e ngaahi va‘a.

³⁸Pea ne tuku ‘a e ngaahi va‘a kuo ne fohi ki he ngaahi kumete na‘e tu‘u ‘i he ngaahi fakainu‘anga, ‘oka ha‘u ‘a e fanga sipi ke inu, ke fehangahangai mo e fanga sipi; hei‘ilo te nau tou‘ia ‘i he‘enau ha‘u ke inu.

³⁹Pea na‘e tou‘ia ‘a e fanga sipi ‘i he‘enau ‘i he ngaahi va‘a, pea nau fā‘ele‘i ha fanga manu na‘e lavatea mo tukumisi mo pulepule.

⁴⁰Pea vahe‘i ‘e Sēkope ‘a e fanga lami, pea ne ‘ai ‘a e fanga manu ke hanga ki he lavatea mo e fa‘ahinga kelo kehekehe: ko e fai ia ki he fanga manu ‘a Lēpani, ka ko e fanga manu ‘a‘ana na‘e tuku fakaekinautolu, pea na‘e ‘ikai te ne tuku ke nau ofi ki he fanga manu ‘a Lēpani.

⁴¹Pea ko eni, ka tau‘i ‘a e fanga manu mālohi, na‘e ‘ai ‘e Sēkope ‘a e ngaahi va‘a ‘i he ‘ao ‘o e fanga manu ‘i he ngaahi kumete, ke nau tou‘ia ‘i he‘enau ‘i he ngaahi va‘a.

⁴²Ka ‘oka vaivai ‘a e fanga manu na‘e ‘ikai te ne ‘ai: ko ia na‘e faifai pea tō kia Lēpani ‘a e ha‘a vaivai, kae ‘ia Sēkope ‘a e mālohi.

⁴³Ko ia na‘e ‘oho hake ‘a e tangata ko e me‘a fakamanavahē, pea na‘e tokolahi ‘ene fanga manu, mo ‘ene kau kaunanga, mo ‘ene kau tamaio‘eiki, mo ene fanga kāmeli, mo ‘ene fanga ‘asi.