Read KO E TOH TAPU KATOA TONGA KO SĒNESI 31 Bible Online

KO SĒNESI 31 - KO E TOH TAPU KATOA TONGA bible

KO SĒNESI 31

¹PEA na‘a ne fanongo ki he lau ‘a e ngaahi foha ‘o Lēpani, ‘o pehē, Kuo ‘ave ‘e Sēkope ‘a e me‘a kotoa ‘a ‘etau tamai; ‘io, ko ‘ene fu‘u mamalu ni ‘oku mei he koloa ‘a ‘etau tamai.

²Pea na‘e vakai ‘e Sēkope, tā ‘oku ‘ikai lelei ‘a e fofonga ‘o Lēpani kiate ia, ‘o hangē ko e taimi mu‘a.

³Pea na‘e folofola ‘a Sihova kia Sēkope, ‘o ne pehē, Foki ki he fonua ‘o ‘ao ngaahi tamai, pea ki ho tupu‘anga; pea te u ‘iate koe.

⁴Pea fekau atu ‘e Sēkope ke tala kia Lesieli mo Lia ke na ‘alu ange ki ‘uta ki he‘ene fanga manu;

⁵pea ne pehē kiate kinaua, ‘Oku ou vakai ‘e au ‘a e fofonga ‘o ho‘omou tamai, ‘oku ‘ikai lelei kiate au, ‘o hangē ko e taimi mu‘a: ka kuo ‘iate au ‘a e ‘Otua ‘o ‘eku tamai.

⁶Pea ko kimoua ‘oku mo ‘ilo kuo u fai tūkuingata ‘eku ngāue ki ho‘omou ‘eiki.

⁷Pea kuo kākaa‘i au ‘e ho‘omo tamai, pea kuo ne fakakehe ‘eku totongi ‘o tu‘o hongofulu; ka na‘e ‘ikai tuku ‘e he ‘Otua ke lava ha‘ane kovi kiate au.

⁸Kapau na‘a ne pehē, ‘A‘au ‘a e tukumisi ko ho‘o totongi; pea fanau tukumisi ‘a e fanga manu kotoa pē: pea kapau na‘a ne pehē, ‘A‘au ‘a e lavatea ko ho‘o totongi; pea na‘e fanau lavatea ‘a e fanga manu kotoa pē.

⁹Ko ia kuo to‘o ‘e he ‘Otua ‘a e fanga manu ‘a ho‘omo ‘eiki, pea kuo ne foaki kia au.

¹⁰Pea ko eni ‘i he taimi na‘e lala ai ‘a e fanga manu, na‘a ku hanga hake ‘i ha‘aku misi, ‘o u vakai, tā ko e ngaahi kosi tangata ‘oku tau‘i ‘a e fanga manu ‘oku nau lavatea mo tukumisi mo pulepule.

¹¹Pea folofola kiate au ‘a ‘Āngelo ‘a e ‘Otua ‘i he‘eku misi, ‘o pehē, ‘E Sēkope. Pea u pehē, Ko au eni.

¹²Pea folofola ‘e ia, Hanga hake mu‘a ‘o vakai, ko e ngaahi manu ‘oku tau‘i ‘a e fanga kosi ‘oku nau lavatea kotoa pē, pe tukumisi, pe pulepule: he kuo u sio ki he ngaahi me‘a ‘oku fai ‘e Lēpani kiate koe.

¹³Ko au ‘a e ‘Otua Pēteli, ‘a ia na‘a ke pani ai ‘a e pou, pea na‘a ke fai ai ‘a e tukumo‘ui kiate au: pea ke ke tu‘u, ‘o ‘alu atu mei he fonua ni, ‘o foki ki he fonua ‘o ho tupu‘anga.

¹⁴Pea tali ‘e Lesieli mo Lia, ‘o na pehē kiate ia, He ‘oku ai homa kei ‘inasi pe tofi‘a ‘i he fale ‘o ‘ema tamai?

¹⁵‘Ikai ‘oku ma tatau kiate ia mo ha ongo muli? he kuo ne fakatau kimaua, pea ‘oku ne kaikai ai pē ‘ema pa‘anga.

¹⁶Pea ko ia, ‘ilonga ha koloa kuo to‘o ‘e he ‘Otua mei he‘ema tamai, ‘oku ‘amaua ia, mo ‘ema fānau: pea ko eni ko e me‘a kotoa pē kuo folofola ai ‘a e ‘Otua kiate koe ke ke fai.

¹⁷Pea tu‘u ‘a Sēkope, ‘o ne fakaheka ‘ene fānau mo hono ngaahi uaifi ki he fanga kāmeli:

¹⁸pea ne taki atu ‘ene fanga manu kotoa pē, ‘io, ‘a e koloa kotoa pē kuo ne ma‘u, ‘ene fanga manu ngāue‘i, ‘a ia kuo ne ma‘u ‘i Mesopotēmia, ko ‘ene ‘alu ki he‘ene tamai ko ‘Aisake ki he fonua ko Kēnani.

¹⁹Ka kuo ‘alu ‘a Lēpani ke kosi ‘ene fanga sipi: pea kaiha‘asi ‘e Lesieli ‘a e ngaahi telāfimi na‘e ‘a ‘ene tamai.

²⁰Pea na‘e fakamatavalea‘i ‘e Sēkope ‘a e motu‘a Mesopotēmia ko Lēpani, ‘o ‘ikai te ne tala ki ai ‘e ‘alu pē ia.

²¹Pea na‘a ne hola mo ‘ene me‘a kotoa, pea ne hanga ‘o a‘a ‘i he Vaitafe, pea ne tu‘utu‘uni ‘ene fononga ke ‘alu fakahangatonu ki he mo‘unga ko Kiliati.

²²Pea na‘e toki fakahā kia Lēpani ‘i hono ‘aho tolu kuo hola ‘a Sēkope.

²³Pea ne ‘alu mo ia hono kāinga, ‘o ne tuli ki ai ‘o ‘aho fitu; pea ne toki ma‘u ia ‘i he mo‘unga ko Kiliati.

²⁴Pea na‘e hā‘ele ‘a e ‘Otua kia Lēpani ko e tangata Sīlia ‘i he‘ene misi, po‘uli, pea ne folofola ki ai, Tokanga kiate koe na‘a papa‘ivale ha‘o lea kia Sēkope ‘i hē, pe ko ē.

²⁵Pea a‘u atu ‘a Lēpani kia Sēkope. Pea kuo fokotu‘u ‘e Sēkope hono tēniti ‘i he mo‘unga; ko Lēpani foki na‘e fokotu‘u tēniti mo hono kāinga ‘i he mo‘unga ko Kiliati.

²⁶Pea pehē ‘e Lēpani kia Sēkope, Ko e hā eni kuo ke fai? ‘a ho‘o fakamatavalea‘i au, mo taki atu hoku ongo ‘ōfefine, ‘o hangē ha pōpula ma‘u tau?

²⁷Ko e hā kuo ke hola fakafufū mo fakakaiha‘asi meiate au; ‘o ‘ikai te ke tala mai, ke u tuku atu koe mo e mavava, mo ha hiva, mo ha tā nafa, mo ha tā ha‘ape;

²⁸mo e ‘ikai te ke tuku ke u ‘uma ki hoku ngaahi foha mo hoku ngaahi ‘ōfefine? ‘Ā, kuo ke fai vale ho‘o fai pehē.

²⁹‘Oku mafai noa pē ‘e hoku nima ni ke tautea koe; ka ko e ‘Otua ‘o ho‘omou tamai na‘a ne folofola mai kiate au ‘anepō, ‘o pehē, Tokanga kiate koe ke ‘oua te ke lea kia Sēkope ‘a ē, pe ko ē.

³⁰Pea ko eni, neongo na‘e pau ho‘o ‘alu, koe‘uhi na‘a ke mātu‘aki manatu ki he fale ‘o ho‘o tamai, ka ko e hā kuo ke kaiha‘asi ai si‘oku ngaahi ‘otua?

³¹Pea tali ‘e Sēkope, ‘o ne pehē kia Lēpani, He na‘a ku manavahē; ‘o u pehē, Na‘a ‘iloange te ke fa‘ao ho ongo ‘ōfefine meiate au.

³²‘Ilonga ia te ke ‘ilo ki ai ho ngaahi ‘otua ke ‘oua te ne mo‘ui: ke ke ‘eke ‘i he ‘ao ‘o hota kāinga ‘a e me‘a ‘a‘au ‘oku ‘iate au, pea ke to‘o atu. He na‘e ‘ikai ‘ilo ‘e Sēkope kuo kaiha‘asi ia ‘e Lesieli.

³³Pea hū ‘a Lēpani ki he tēniti ‘o Sēkope, mo e tēniti ‘o Lia mo e tēniti ‘o e ongo kaunanga; ka na‘e ‘ikai te ne ‘ilo ki ai. Pea ne ‘alu mei he tēniti ‘o Lia, ‘o ne hū ki he tēniti ‘o Lesieli.

³⁴Ka kuo hanga ‘e Lesieli ‘o ‘ai ‘a e ngaahi telāfimi ‘i he nofo‘a fale ‘o e kāmeli, ‘o ne hekeheka ai. Pea fotofota holo ‘e Lēpani ‘a e ngaahi me‘a ‘i he tēniti, ka ka ‘ikai ‘ilo.

³⁵Pea lea ange ‘a e fefine ki he‘ene tamai, Ke ‘oua na‘a tuputāmaki ‘a hoku ‘eiki ‘i he ‘ikai te u lava ke tu‘u ki ‘olunga ‘i ho‘o me‘a mai; he ‘oku ‘iate au ‘a e anga fakafefine. Pea ne hakule, kae ‘ikai te ne ‘ilo ‘a e ngaahi telāfimi.

³⁶Pea ‘ita ‘a Sēkope, ‘o ne ngaohi ‘a Lēpani; ‘io, na‘a ne tali ‘a Lēpani ‘o pehē, Ko e hā ha‘aku kākā? Ko e hā ha‘aku angahala kuo fai ke pehē fau ho‘o teletauta‘a ‘i hoku tuli?

³⁷He ko eni kuo ke fota‘i ‘eku ngaahi me‘a kotoa, ko e hā fua ha me‘a mei ho fale kuo ke ‘ilo ai? Tuku hena ‘i he ‘ao ‘o hoku kāinga mo ho kāinga, ke nau fakamaau ‘iate kitaua.

³⁸Ko e ta‘u eni ‘e uofulu mo ‘eku ‘iate koe; pea tala‘ehai kuo ‘uhi mate ho‘o fanga sipi, pe ko ho‘o fanga kosi, pea ko ho‘o fanga manu tangata na‘e ‘ikai te u kai.

³⁹Ko ia na‘e hae ‘e ha manu na‘e ‘ikai te u ‘omi kiate koe; na‘a ku totongi pē ia ‘e au; ko au pē na‘a ke ‘eke ki ai, pe na‘e mole ‘aho pe mole po‘uli.

⁴⁰Ko eni ‘eku nofo na‘e fai; ‘i he ‘aho na‘a ku mate ‘i he māfana pea ko e momoko ‘i he pō; ko ia na‘e mahu‘i ‘a e mohe mei hoku mata.

⁴¹Ko e uofulu ta‘u eni kuo u nofo ‘i ho fale; ko e ta‘u ‘e hongofulu mā fā na‘a ku ngāue kiate koe koe‘uhi ko ho ongo ‘ōfefine, pea ko e ta‘u ‘e ono ki ho‘o fanga manu: pea kuo ke fakakehe ‘eku totongi ‘o tu‘o hongofulu.

⁴²Ka ne ta‘e‘oua ‘a e ‘iate au ‘a e ‘Otua ‘o ‘eku ‘eiki, ‘a e ‘Otua ‘o ‘Epalahame mo e Manavahē‘anga ‘o ‘Aisake, pehē kuo ke tukuange mola au ‘i he taimi ni. Na‘e ‘afio‘i ‘e he ‘Otua hoku ngaohikovi‘i mo e vevela ‘o hoku ‘aofinima ni, ko ia na‘a ne valoki ai koe ‘anepō.

⁴³Pea tali ‘e Lēpani, ‘o ne pehē kia Sēkope, Ko e tu‘unga fafine ni ko hoku ngaahi ‘ōfefine, pea ko e tamaiki ni ko hoku ngaahi foha, pea ko e fanga manu ni ko ‘eku fanga manu, ‘io, ko e me‘a kotoa pē ‘oku ke sio ki ai ko ‘eku me‘a pea ko hoku ongo ‘ōfefine ni, ko e pehē koā ke u fai ha me‘a he ‘aho ni kiate kinaua, pe ki he fānau kuo na fanau‘i?

⁴⁴‘Ē, ta fai mu‘a ha fuakava, ‘a au mo koe, mo fakamo‘oni ‘iate kitaua.

⁴⁵Pea to‘o ‘e Sēkope ha maka, ‘o ne fokotu‘u ko e pou.

⁴⁶Pea lea ‘a Sēkope ki hono kāinga, Mou tānaki maka; pea nau tufi maka, ‘o tanu ha ‘esi, pea na‘a nau kai ‘i he funga ‘esi.

⁴⁷Pea na‘e fakahingoa ia ‘e Lēpani ko Seka‘a-sahatuha:[81] ka ka ui ia ‘e Sēkope ko Kāleti.[82]

⁴⁸Pea na‘e pehē ‘e Lēpani, Ko e ‘esi ko eni ko e fakamo‘oni ‘iate kitaua he ‘aho ni. Ko hono ‘uhinga ia ‘o e fakahingoa ia ko Kāleti (ko ‘Esi Fakamo‘oni).

⁴⁹Na‘e ui ko Misipā foki (ko Potu-le‘o),[83] he‘ene pehē, Ke le‘o ‘e Sihova hota vaha‘a, ‘oka ta ka fepulingaki.

⁵⁰‘Ilo ‘e koe ‘o kapau ‘oku ke ngaohikovi‘i hoku ongo ‘ōfefine, pea kapau te ke ‘omi ha kau fefine ke tata‘o ‘aki hoku ongo ‘ōfefine: neongo ‘oku ‘ikai ha tangata ‘iate kitaua, vakai ko e ‘Otua ‘oku ne fakamo‘oni ki he‘eta me‘a.

⁵¹Pea lea ‘a Lēpani kia Sēkope, Sio atu, ko e ‘esi ‘ena mo e pou ‘a ia kuo u fokotu‘u ‘i hota vaha‘a — ke fakamo‘oni ‘a e ‘esi ni.

⁵²Pea ke fakamo‘oni ‘a e pou ni ‘o kapau te u maumau ‘eku fuakava: ‘e ‘ikai te u laka atu ‘i he ‘esi ni kiate koe ke fai ha kovi, pea ko koe ‘e ‘ikai te ke laka mai ‘i he ‘esi ni mo e pou ni kiate au.

⁵³Ko e ‘Otua ‘o ‘Epalahame mo e ‘Otua ‘o Nēhoa[84] ke ne fakamaau ‘eta me‘a, ‘io, ‘a e ‘Otua ‘o ‘ena tamai. Ka ka fuakava ‘e Sēkope ‘i he Manavahē‘anga ‘o ‘ene tamai ko ‘Aisake.

⁵⁴Pea fai feilaulau ‘a Sēkope ‘i he mo‘unga, pea ne tala ki hono kāinga ke nau ha‘u ‘o kai; pea na‘a nau kai, ‘o nau mohe ‘i he mo‘unga ‘i he pō ko ia.

⁵⁵Pea tu‘u hengihengi hake ‘a Lēpani, ‘o ne ‘uma ki hono ngaahi foha mo hono ngaahi ‘ōfefine, ‘o ne tāpuaki‘i kinautolu: pea ‘alu ‘a Lēpani, ‘o foki ki hono feitu‘u.