Read KO E TOH TAPU KATOA TONGA KO SĒNESI 32 Bible Online

KO SĒNESI 32 - KO E TOH TAPU KATOA TONGA bible

KO SĒNESI 32

¹KA ka fai atu ‘e Sēkope hono fononga, pea fakafetaulaki mai kiate ia ha kau ‘āngelo ‘a e ‘Otua.

²Pea pehē ‘e Sēkope ‘i he‘ene mamata kiate kinautolu, Tā ko e ‘apitanga tau eni ‘o e ‘Otua: ko ia na‘a ne fakahingoa ‘a e potu ko ia ko Mehanemi (ko Ongo ‘apitanga tau).

³Pea fekau atu ‘e Sēkope ha kau talafekau ke fakamelomelo kiate ia ki hono tokoua ko ‘Īsoa, ki he fonua ko Seia, ki he tuku‘uta ‘o ‘Ītomi.

⁴Pea ne na‘ina‘i kiate kinautolu, ‘o pehē, Ko e anga eni ‘o ho‘omou lea ki hoku ‘eiki ko ‘Īsoa, Ko e fakatau folofola eni ‘a ho‘o tamaio‘eiki ko Sēkope; Na‘a ku nofo ‘āunofo kia Lēpani, pea kuo u ‘i ai ‘o a‘u ki he taimi ni:

⁵pea ‘oku ou ma‘u pulu mo e ‘asi, ‘a e fanga manu mo e kau tamaio‘eiki mo e kau kaunanga; pea kuo u fekau atu ke tala ki hoku ‘eiki na, ke langa‘i ‘ene ofa kiate au.

⁶Pea na‘e foki mai ‘a e kau talafekau kia Sēkope, ‘o nau pehē, Na‘a mau a‘u atu ki ho tokoua ko ‘Īsoa, pea ‘oku ne ha‘u foki ke fakafetaulaki kiate koe, pea ‘oku ne ha‘u mo ia ha kau tangata ‘e toko fāngeau.

⁷Pea manavahē ‘aupito ai ‘a Sēkope, ‘o ne faingata‘a‘ia: pea ne hanga ‘o vahevahe ‘a e kakai na‘e ‘iate ia, mo e fanga manu iiki, mo e fanga manu lalahi, mo e fanga kāmeli, ke ‘apitanga ua;

⁸pea ne pehē, Kapau ‘e ha‘u ‘a ‘Īsoa ki he ‘apitanga ‘e taha, ‘o ne taa‘i ia, hei‘ilo ‘e hola ‘a e ‘apitanga ‘oku toe.

⁹Pea pehē ‘e Sēkope, ‘E ‘Otua ‘o ‘eku kui ko ‘Epalahame, mo e ‘Otua ‘o ‘eku tamai ko ‘Aisake; ‘a Sihova na‘a ke folofola mai, ‘o pehē, Foki ki ho fonua, pea ki ho tupu‘anga, pea te u fai ‘ofa kiate koe:

¹⁰‘oku ‘ikai te u taau ke ma‘u ha taha ‘o ho‘o ngaahi fu‘u meesi ni, mo ho‘o ngaahi fu‘u fakaai, ‘a ia kuo ke fai ki ho‘o tamaio‘eiki ko au; he ko hoku tokotoko pē na‘a ku a‘a mo au ‘i Soatani ni, ka ko eni kuo u hoko ‘o ‘apitanga ua.

¹¹‘Ē, ke ke fakahaofi au mei he nima ‘o hoku tokoua, ‘io, meia ‘Īsoa: he ‘oku ou tailiili kiate ia ‘e au, na‘a ‘iloange te ne ha‘u ‘o taa‘i au, ‘o talua ‘aki ‘a e fa‘ē mo e fānau.

¹²Ka na‘a ke folofola mai ‘e koe, Te u mātu‘aki fai ‘ofa kiate koe, pea te u ngaohi ho hako ke tatau mo e ‘one‘one ‘o e tahi, ‘a ia ‘oku ‘ikai malau ko ‘ene lahi.

¹³Pea ne nofo ai ‘i he pō ko ia; pea ne fili mei he me‘a kuo ne ma‘u, ha me‘a‘ofa ki hono tokoua ko ‘Īsoa;

¹⁴ko e kosi fefine ‘e toko uangeau mo e kosi tangata ‘e toko uofulu, ko e sipi fefine ‘e toko uangeau mo e sipi tangata ‘e toko uofulu, ko e fanga kāmeli ‘e toko tolungofulu,

¹⁵ko e sināmanu mo honau ‘uhiki, ko e fanga pulu fefine ‘e toko fāngofulu mo e pulu tangata ‘e toko hongofulu, ko e ‘asi fefine ‘e toko uofulu mo e fanga ki‘i ‘asi ‘e hongofulu.

¹⁶Pea ne tuku kinautolu ki he‘ene kau tamaio‘eiki, ‘o fakafa‘ahinga; ‘o ne pehē ki he‘ene kau tamaio‘eiki, Mou mu‘omu‘a atu, ‘o ‘ai ke vahavaha ‘a e fa‘ahinga mo e fa‘ahinga.

¹⁷Pea ne na‘ina‘i ki he ‘uluaki, ‘o pehē, ‘Oka mou ka fetaulaki mo ‘Īsoa ko hoku tokoua, ‘o ne fehu‘i kiate koe, ‘o pehē, ‘Oku ‘o hai koe? pea ‘oku ke ‘alu ki fē? pea ko e ngaahi me‘a ‘a hai eni ‘oku ke fakateka?

¹⁸Pea te ke tali, Ko e ngaahi me‘a ‘a ho‘o tamaio‘eiki ko Sēkope; ko e me‘a‘ofa eni kuo ne tuku atu ki hono ‘eiki ko ‘Īsoa: pea ko eni ‘oku ne muimui mai foki. Pea ne tu‘utu‘uni pehē foki ki hono ua pea pehē mo hono tolu.

¹⁹‘Io, mo kinautolu kotoa pē na‘e muimui ki he fanga manu ‘o ne pehē, Ke hangē ko ia ho‘omou lea kia ‘Īsoa ‘oka mou ka ‘ilo ia.

²⁰Pea te mou pehē foki, Ko eni ‘oku muimui mai ‘a ho‘o tamaio‘eiki ko Sēkope. He na‘a ne pehē, Ka u fakalelei mu‘a hono loto ‘aki ‘a e me‘a‘ofa ‘oku mu‘aki atu na, pea hili ia te u fakafe‘iloaki kiate ia; hei‘ilo te ne tali lelei au.

²¹Ko ia na‘e mu‘omu‘a atu ‘a e me‘a‘ofa ki he kauvai; ka ka nofo ia ‘i he ‘apitanga ‘i he pō ko ia.

²²Pea ne tu‘u hake ‘i he pō ko ia, ‘o ne ‘ave hono ongo uaifi mo ‘ene ongo kaunanga, mo hono ngaahi foha ‘e toko hongofulu mā taha, ‘o nau a‘a atu ‘i he a‘a‘anga ‘o Siapoki.

²³‘Io, na‘a ne ‘ave kinautolu ki he kauvai mo e me‘a kotoa pē na‘e ‘iate ia.

²⁴Pea na‘e nofo toko taha pē ‘a Sēkope; pea na‘e fefa‘uhi mo ia ha tangata, ‘o a‘u ki he ‘alu hake ‘a e pongipongi.

²⁵Pea ‘i he‘ene vakai ‘oku ‘ikai te ne lava‘i ia, na‘a ne alasi hono ‘aofi tenga; pea na‘e homo ‘a e ‘aofi tenga ‘o Sēkope ‘i he‘ene fefa‘uhi mo ia.

²⁶Pea ne folofola, Tuku ange au ke u ‘alu, he ‘oku ‘alu hake ‘a e pongipongi. Pea ne tali, ‘E ‘ikai te u tukuange koe, kae‘oua ke ke tāpuaki au.

²⁷Pea ne folofola kiate ia, Ko e hā ho hingoa? Pea ne tali, Ko Sēkope.

²⁸Pea ne folofola, ‘E ‘ikai toe ui ho hingoa ko Sēkope, ka ko ‘Isileli pē (Ko Fai-mo e-‘Otua):[85] he kuo ke fai mo e ‘Otua mo e kakai, pea kuo ke lava.

²⁹Pea fehu‘i ange ‘e Sēkope, ‘o pehē, Tala mai mu‘a ho huafa ‘o‘ou. Pea ne folofola mai, Ko e hā ‘oku ke fai pehē ai, ‘o ‘eke ki hoku hingoa? Pea ne tāpuaki‘i ia ‘i ai.

³⁰Pea na‘e fakahingoa ‘e Sēkope ‘a e potu na ko Penieli (ko Fofonga-‘o e-‘Otua).[86] he‘ene pehē, He kuo u sio ki he ‘Otua, ‘o ma mātu‘aki femātaaki, ka kuo fakahaofi ‘eku mo‘ui.

³¹Pea na‘e hopo kiate ia ‘a e la‘ā ‘i he‘ene laka atu ‘i Penueli, pea na‘a ne ketu pē koe‘uhi ko hono tenga.

³²Ko hono ‘uhinga ia ‘oku ‘ikai ke kai ‘e ha‘a ‘Isileli, ‘o a‘u ki he ‘aho ni, ‘a e uoua ‘o e tenga, ‘a ia ‘oku ‘i he ‘aofi tenga: koe‘uhi na‘a ne alasi ‘a e ‘aofi tenga ‘o Sēkope ‘i he uoua na‘e mingi.