Read KO E TOH TAPU KATOA TONGA KO SĒNESI 33 Bible Online

KO SĒNESI 33 - KO E TOH TAPU KATOA TONGA bible

KO SĒNESI 33

¹PEA hanga hake ‘a Sēkope ‘o fakasio, tā ko ‘Īsoa ‘ena ‘oku ha‘u, pea ‘oku ‘iate ia ha kau tangata ‘e toko fāngeau. Pea ne hanga ‘o vahevahe ‘a e fānau kia Lia mo Lesieli mo e ongo kaunanga.

²Pea ne fakamu‘omu‘a ‘a e ongo kaunanga mo ‘ena fānau, pea hoko ai ‘a Lia mo ‘ene fānau, pea fakamuimui ‘a Lesieli mo Siosifa.

³Ka ka laka atu pē ia ‘i honau ‘ao, ‘o ne toutou tulolo ki he kelekele, ‘o tu‘o fitu ke fakaofiofi atu ki hono tokoua.

⁴Ka ka lele mai ‘a ‘Īsoa ke fakafetaulaki kiate ia, ‘o ne fā‘ofua ki ai, ‘o tāupe ‘i hono kia, ‘o ne ‘uma kiate ia; pea na fetāngihi.

⁵Pea ne hanga hake, ‘o ne sio ki he kau fefine mo e tamaiki; pea ne pehē, Ko hai ‘a kinautolu ni ‘oku ‘iate koe? Pea ne tali, Ko e fānau ia kuo me‘a‘ofa ‘aki ‘e he ‘Otua ki ho‘o tamaio‘eiki ko au.

⁶Pea ‘unu‘unu mai ‘a e ongo kaunanga, ‘a kinaua mo ‘ena fānau, ‘o nau tulolo.

⁷Pea ‘unu‘unu mai foki ‘a Lia mo ‘ene fānau, ‘o nau tulolo: pea hili ia na‘e ‘unu‘unu mai ‘a Siosifa mo Lesieli, ‘o na tulolo.

⁸Pea ne pehē, Ko e hā fua ho‘o fu‘u kongakau ko ē na‘a mau fetaulaki mo au? Pea ne tali, Ko e me‘a ia ke langa‘i ‘a e ‘ofa ‘a hoku ‘eiki kiate au.

⁹Pea pehē ‘e ‘Īsoa, Si‘oku tokoua, ‘oku lahi pē ‘eku me‘a; ma‘u pē ‘e koe ‘a e me‘a ‘a‘au.

¹⁰Pea tali ‘e Sēkope, ‘Oua foki: kapau leva kuo u ta‘imālie ho‘o ‘ofa, pea ke to‘o pē ‘eku mōihū, ‘a ia ‘oku ou ‘atu: koe‘uhi ā kuo u mamata ki ho fofonga, ‘o hangē ko ‘eku mamata ki he fofonga ‘o e ‘Otua, pea kuo ke hōifua mai.

¹¹Ke ke ma‘u mu‘a ‘eku fakafeta‘i ‘a ia kuo ‘oatu; he kuo ‘ofa‘i au ‘e Sihova, pea kuo u ma‘u kakato. Pea na‘a ne fakakolekole ki ai ‘o ne ma‘u.

¹²Pea ne pehē, Ta hiki, ‘o ta laka atu, pea te u taki.

¹³Ka ka tali ‘e ia ki ai, ‘Oku mea‘i ‘e hoku ‘eiki ‘oku ngāvaivai ‘a tamaiki, pea ‘oku ‘alu mo au ha fanga manu iiki mo ha fanga manu lalahi ‘oku toutama pea kapau ‘e fakatepitepi honau fakateka ‘i ha ‘aho pē taha, ‘e mate kotoa pē ‘a e fanga manu iiki.

¹⁴Ke me‘a atu mu‘a ‘a hoku ‘eiki, ‘o mu‘omu‘a ki he‘ene tamaio‘eiki ko au: ka ko au te u takitakimālie atu pē, ‘o fakatatau ki he fa‘a ‘alu ‘a e fanga manu ‘oku ou fakateka, mo e fa‘a ‘alu ‘a e fānau, kae‘oua ke u a‘u atu ki hoku ‘eiki ‘i Seia na.

¹⁵Pea pehē ‘e ‘Īsoa, Kaekehe ke nofo mo koe ha ni‘ihi ‘i he kakai ni ‘oku ‘iate au. Ka ka tali ‘e ia, Koe‘uma‘aki? Kehe pē ke u ‘ofeina ‘e hoku ‘eiki.[87]

¹⁶Pea foki ‘a ‘Īsoa ‘i he ‘aho ko ia he‘ene fononga ki Seia.

¹⁷Pea hiki ‘a Sēkope ‘o ‘alu ki Sūkote, ‘o ne langa ai hano fale ‘o‘ona, ‘o ne ngaohi ‘a e ngaahi fale lou‘akau mo‘o ‘ene fanga manu: ko hono ‘uhinga ia na‘e fakahingoa ai ‘a e potu ko Sūkote (Koni-Fale-lou‘akau).

¹⁸Ko ia na‘e hoko lelei ‘a Sēkope ki he kolo ko Sikemi, ‘a ia ‘oku ‘i he fonua ko Kēnani, ‘i he‘ene ha‘u mei Mesopotēmia; pea ne fokotu‘u hono tēniti ‘o hanga ki he kolo.

¹⁹Pea ne fakatau mei he ngaahi foha ‘o Hēmoa ko e tamai ‘a Sikemi ‘a e konga vao kuo ne folahi ai hono tēniti, ‘aki ha kesita ‘e teau.

²⁰Pea ne fokotu‘u ‘i he potu ko ia ha ‘ōlita, ‘o ne fakahingoa ia ko ‘Elalohe-‘Isileli (ko ‘Ela-ko-e-‘Otua-‘o-‘Isileli).