Read KO E TOH TAPU KATOA TONGA KO SĒNESI 34 Bible Online

KO SĒNESI 34 - KO E TOH TAPU KATOA TONGA bible

KO SĒNESI 34

¹PEA ko Taina ko e ta‘ahine ‘a Lia, ‘a ia na‘a ne fā‘ele‘i kia Sēkope, na‘a ne ‘alu atu ke fe‘iloaki mo e kau ta‘ahine ‘o e fonua.

²Pea ko Sikemi ko e foha ‘o Hēmoa ko e Hevi, ko e ‘eiki ‘o e fonua, na‘a ne sio ki he ta‘ahine, ‘o ne puke ia, ‘o ne mohe mo ia ‘o kākaa‘i.

³Pea na‘e pīkitai hono loto kia Taina ko e ‘ōfefine ‘o Sēkope, pea ne ‘ofa ki he ta‘ahine, ‘o ne lea ke fakafiemālie ia.[88]

⁴Pea lea ‘a Sikemi kia Hēmoa ko ‘ene ‘eiki, ‘o pehē, Ke ke ma‘u mai ‘a e finemui ni mōku ‘unoho.

⁵Pea fanongo ‘e Sēkope kuo ne ‘uli‘i hono ‘ōfefine ko Taina; ka kuo ‘i ‘uta hono ngaahi foha ‘i he‘ene fanga manu: ko ia na‘e fakalongo pē ‘a Sēkope kae‘oua ke nau ō mai.

⁶Pea me‘a atu ‘a Hēmoa ko e tamai ‘a Sikemi kia Sēkope ke alea mo ia.

⁷Pea omi mei ‘uta ‘a e ngaahi foha ‘o Sēkope ‘i he‘enau fanongo ki ai: pea na‘e mamahi ‘a e kau tangata ko ia, pea nau ‘ita lahi koe‘uhi kuo ne fai ha me‘a fakalielia ‘i ‘Isileli, ‘i he‘ene mohe mo e ‘ōfefine ‘o Sēkope; ‘a ia ko e me‘a na‘e tāpuhā.

⁸Pea na‘e alea ‘a Hēmoa mo kinautolu, ‘o ne pehē, ‘Oku piki ‘a e loto ‘o hoku foha ko Sikemi ki ho‘omou ki‘i fefine: ‘ē, mou foaki ‘a e ta‘ahine kiate ia mōno uaifi.

⁹Pea tau femali‘aki: mou ‘omi homou ngaahi ‘ōfefine kiate kimautolu, pea ma‘u homau ngaahi ‘ōfefine kiate kimoutolu.

¹⁰Pea tau toki nonofo: ‘e ‘atā ‘a e fonua ni kiate kimoutolu: mou nofo ai ‘o fai fakatau, pea ma‘u tofi‘a ‘i ai.

¹¹Pea lea ‘a Sikemi ki he tamai ‘a e fefine, pea ki hono ngaahi tuonga‘ane, Mou ‘ofa foki ki he‘eku me‘a, pea neongo pe ko e hā te mou tala mai, te u ‘atu.

¹²Neongo pe ko e hā ha fu‘u koloa te mou ‘eke kiate au ma‘amoutolu pea ma‘a e ta‘ahine, ka te u ‘atu pē: ha me‘a pē te mou tala mai: ka mou tuku mai ‘a e ta‘ahine ke ma nonofo.

¹³Pea ko e ngaahi foha ‘o Sēkope na‘a nau vosa‘i ‘a Sikemi mo ‘ene tamai ko Hēmoa, pea nau puleaki‘i kinaua, koe‘uhi kuo ne ‘uli‘i ‘a Taina ko honau tuofefine.

¹⁴Ko ia na‘a nau tali kiate kinaua, ‘E ‘ikai te mau lava ke fai ‘a e me‘a ko eni, ke ‘atu homau tuofefine ki ha tangata ‘oku ‘ikai ke kamu; he ko e me‘a fakamā ia kiate kimautolu:

¹⁵ko e me‘a pē ko eni te mau loto ai ki ho‘omou me‘a: ‘o kapau te mou fai tatau mo kimautolu, ‘o mou kamu ‘a e tangata kotoa pē;

¹⁶pea te mau toki ‘atu ai homau ngaahi ‘ōfefine kiate kimoutolu, pea mau to‘o homou ngaahi ‘ōfefine mo‘omautolu, pea te tau nonofo, ‘o hoko ko e kakai pē taha.

¹⁷Ka ‘o kapau ‘e ‘ikai te mou fai ki he me‘a ‘oku mau tala, ‘o kamu, pea te mau to‘o homau ki‘i fefine, ‘o ‘alu.

¹⁸Pea na‘e hā lelei ‘enau lea kia Hēmoa mo hono foha ko Sikemi.

¹⁹Pea na‘e ‘ikai fakatotoka ‘e he talavou ke fai ‘a e me‘a, he na‘a ne mamana ki he ‘ōfefine ‘o Sēkope: pea ko e fahu ia ‘o e fāmili ‘o ‘ene ‘eiki.

²⁰Pea na‘e me‘a ange ‘a Hēmoa mo hono foha ko Sikemi ki he matapā ‘o hona kolo, ‘o nau alea mo e kau tangata ‘o hono kolo, ‘o pehē,

²¹Ko e kau tangata ni ‘oku lelei ‘enau fakafeangai kiate kitautolu; ‘ē, tau tuku mu‘a ke nau nofo ‘i he fonua, ‘o fai fakatau ai; he vakai ‘oku fu‘u ‘atā ‘a e fonua kiate kinautolu; tau to‘o honau ngaahi ‘ōfefine mōtau ‘unoho, pea tau ‘atu hotau ngaahi ‘ōfefine kiate kinautolu.

²²Ka ko e me‘a ni pē ‘e loto ai ‘a e kau tangata ke nonofo mo kitautolu, ‘o kakai taha mo kitautolu, ‘a e kamu ‘o ‘etau kau tangata kotoa pē, ‘o hangē ko kinautolu.

²³Pea ko ‘enau fanga manu mo ‘enau koloa, ‘io, ‘a ‘enau manu ngāue fua pē, ‘ikai ‘e hoko ia ko ‘etau me‘a? kehe pē ke tau fai ki honau loto, pea te nau nofo pē mo kitautolu.

²⁴Pea na‘e tali ‘a e lea ‘a Hēmoa mo hono foha ko Sikemi ‘e he kakai kotoa na‘e kau ki hona kolo; pea na‘e kamu ‘a e kau tangata kotoa pē na‘e kau ki he kolo.

²⁵Pea ‘i hono tolu ‘o e ‘aho, lolotonga na‘a nau fakailiili, na‘e hanga ‘a e ongo foha ‘o Sēkope, ko Simione mo Līvai, ko e ongo tuonga‘ane ‘o Taina, ‘o na to‘o ‘ena heletā, ‘o na hū ta‘emanavahē ki he kolo, ‘o na taa‘i ‘a e tangata kotoa pē;

²⁶kae‘uma‘ā na‘a na have‘i ‘aki ‘a e mata ‘o e heletā ‘a Hēmoa mo hono foha ko Sikemi; pea na to‘o ‘a Taina mei he fale ‘o Sikemi, ‘o na hū kitua‘ā.

²⁷Na‘e ha‘u ‘a e ngaahi foha ‘o Sēkope ki he pekia, ‘o nau vete ‘a e kolo, koe‘uhi kuo nau ‘uli‘i honau tuofefine.

²⁸Na‘a nau ‘ave ‘enau fanga manu iiki, mo ‘enau fanga manu lalahi, mo ‘enau fanga ‘asi ‘a ia na‘e ‘i he kolo mo ia na‘e ‘i he vao;

²⁹pea nau ‘ave ‘enau koloa kotoa, mo e kau tamaiki, mo honau ngaahi uaifi, ‘io, na‘a nau vete mo e me‘a kotoa pē ‘i fale.

³⁰Pea pehē ‘e Sēkope kia Simione mo Līvai, Kuo mou fakatupu mamahi kiate au, ‘i ho‘omou fakanamukuu‘i au ‘i he lotolotonga ‘o e kakai ‘o e fonua, ‘a e ha‘a Kēnani, mo e ha‘a Pēlisi: pea ‘oku ou kaungatāmaki au, pea te nau fakataha mai ko hoku ngaohi, pea te nau taa‘i au: pea te u ‘auha, ‘a au mo hoku fale.

³¹Ka ka tali ‘e kinaua, He ko e pehē koā ke ne fai ki homa tuofefine ‘o hangē ko ha fefine fe‘auaki ia.