Read KO E TOH TAPU KATOA TONGA KO SĒNESI 37 Bible Online

KO SĒNESI 37 - KO E TOH TAPU KATOA TONGA bible

KO SĒNESI 37

¹KO E tohi eni ‘o e hako ‘o Sēkope.

²Kuo hongofulu mā fitu ta‘u ‘a Siosifa, pea ne fai mo hono ngaahi tokoua ‘a e tauhi manu; pea ko si‘i tamasi‘i na‘a ne kau mo e fānau ‘a Pīla‘a mo e fānau ‘a Sīlipa, ko e ongo uaifi ‘o ‘ene ‘eiki: pea na‘e ha‘u mo Siosifa ki he‘enau ‘eiki honau talakovi‘i.

³Pea na‘e ‘ofa lahi ‘a ‘Isileli kia Siosifa ‘i he‘ene fānau kotoa pē, he ko hono foha ia ka kuo motu‘a: pea na‘a ne ngaohi mo‘ona ha kofu pulepule.[93]

⁴Pea ‘i he vakai ‘e hono ngaahi tokoua ‘oku pele ‘aki ia ‘e he‘enau tamai ‘iate kinautolu, na‘a nau fehi‘a kiate ia, pea na‘e ‘ikai te nau fa‘a lea ‘ofa ange.

⁵Pea na‘e misi ‘a Siosifa, pea ne tala ki hono ngaahi tokoua: pea na‘e ‘āsili ai ‘enau fehi‘a kiate ia.

⁶He na‘a ne pehē kiate kinautolu. ‘E fanongo mai ki he me‘a kuo u misi ki ai:

⁷he ko eni, ko kitautolu na‘a tau ha‘i ‘ū koane ‘i he ngoue, pea ‘iloange na‘e malanga hake ‘a e ‘ū koane ‘a‘aku, ‘o ne mātu‘aki tu‘u tonu; pea fakaofo, na‘e hanga ho‘omou ngaahi ‘ū koane, ‘o tu‘u takai, ‘o nau tulolo ki he ‘ū koane ‘a‘aku.

⁸Pea tali ‘e hono ngaahi tokoua, ‘Io, te ke tu‘i koā kiate kimautolu? pea te ke nofo koā ko homau pule? Pea na‘e fakautuutu ‘enau fehi‘a kiate ia koe‘uhi ko ‘ene ngaahi misi, mo ‘ene ngaahi lea.

⁹Pea na‘a ne toe misi foki ‘o ne fakahā ki hono ngaahi tokoua, ‘o ne pehē, Ko eni kuo u toe misi, pea ko e la‘ā mo e māhina mo e fetu‘u ‘e hongofulu mā taha na‘a nau tulolo kiate au.

¹⁰Na‘a ne tala foki ia ki he‘ene tamai mo hono ngaahi tokoua: pea na‘e valoki‘i ia ‘e he‘ene tamai, ‘o ne pehē ki ai, Ko e hā ‘a e me‘a ko eni kuo ke misi ki ai? Ko e pehē koā ke mau ‘alu atu, ‘a au mo ho‘o fa‘ē mo ho ngaahi tokoua, ‘o mau tulolo ki he kelekele kiate koe?

¹¹Pea meheka kiate ia ‘a hono ngaahi tokoua; ka ka kumuni ‘a e lea ‘e he‘ene tamai.

¹²Pea ‘alu hono ngaahi tokoua ki Sikemi ke fafanga ‘a e fanga manu ‘a ‘enau ‘eiki.

¹³Pea lea ‘a ‘Isileli kia Siosifa, ‘Ikai ‘oku fai ‘e ho ngaahi tokoua ‘enau fanga manu ‘i Sikemi! ha‘u ‘o fai ‘eku fekau kiate kinautolu.

¹⁴Pea ne tali, Ko au eni. Pea ne pehē kiate ia, ‘Ē, ‘alu ‘o vakai pe ‘oku lelei ho ngaahi tokoua, pea lelei mo e fanga manu, pea foki mai mo hano tala kiate au. Ko ia na‘a ne fekau atu ia mei he talalo ‘o Hepeloni, pea ne ‘alu ki Sikemi.

¹⁵Pea na‘e fetaulaki mo ia ha tangata, tā ‘oku ne hēhē ‘i he vao: pea ne fehu‘i kiate ia ‘e he tangata, ‘o pehē, Ko e hā ‘oku ke kumi.

¹⁶Pea ne pehē, Ko si‘eku kumi hoku ngaahi tokoua: tala mai mu‘a pe ‘oku nau fanga manu ‘i fē?

¹⁷Pea tali ‘e he tangata, Kuo nau hiki mei heni; he na‘a ku fanongo ‘oku nau pehē, Tau ō ki Tōtani. Pea tuli atu ‘e Siosifa ki hono ngaahi tokoua, ‘o ne ‘ilo kinautolu ‘i Tōtani.

¹⁸Pea ‘i he‘enau sio kiate ia mei he mama‘o, kuo te‘eki ke ne ofi mai, na‘a nau puleaki‘i ke tāmate‘i ia.

¹⁹Pea nau fepehē‘aki; Vakai, ko e ‘eiki misi ‘ena ‘oku ha‘u.

²⁰‘Ē, tau tāmate‘i mu‘a, ‘o lī ki ha lepa, pea te tau tala kuo keina ia ‘e ha manu fekai: ka tau vakaia pe ‘e fēfē ‘ene ngaahi misi.

²¹Pea fanongo ki ai ‘e Lūpeni, pea ne fakahaofi ia meiate kinautolu, he‘ene pehē, ‘Oua na‘a tau ala ki he‘ene mo‘ui.

²²Pea lea kiate kinautolu ‘e Lūpeni, ‘Oua ‘e lilingi toto; lī ia ki he lepa na ‘i he toafa, kae ‘oua ‘e ala mālohi kiate ia; koe‘uhi ā, tokua, ka ne fakahaofi ia mei honau nima, ‘o fakafoki ki he‘ene tamai.

²³Pea ko ia ‘i he a‘u mai ‘a Siosifa ki hono ngaahi tokoua, na‘a nau to‘o meia Siosifa hono kofu, ‘a e kofu pulepule[94] kuo ne ‘ai;

²⁴pea nau puke ia ‘o lī ki he lepa: pea na‘e maha ‘a e lepa, ‘o ‘ikai ha vai ‘i ai.

²⁵Pea nau nofo hifo ke kai me‘akai: pea ‘iloange na‘a nau hanga atu ‘o nau vakai, tā ko e fononga ‘Isime‘eli ‘oku ha‘u mei Kiliati, pea ‘oku uta ‘e he‘enau fanga kāmeli ‘a e nekoti mo e paame mo e lātano, ko ‘enau ‘alu ke fetuku ki ‘Isipite.

²⁶Pea lea ‘a Siuta ki hono ngaahi tokoua, ‘o pehē, Neongo te tau tāmate‘i hotau tokoua, ‘o fufū hono toto, ka tala‘ehai te tau ma‘u ai ha me‘a.

²⁷‘Ē, tau fakatau mu‘a ia ki he kau ‘Isime‘eli, pea ‘oua na‘a ala kiate ia ‘e hotau nima; he ko hotau tokoua ia mo hotau sino. Pea na‘e loto ki ai hono ngaahi tokoua.

²⁸Pea na‘e laka atu ha kau tangata Mitiani, ko e kau fakatau; pea nau fusi hake ‘a Siosifa mei he lepa, pea nau fakatau ia ki he kau ‘Isime‘eli ‘aki ha pa‘anga siliva ‘e uofulu, pea nau ‘ave ‘a Siosifa ki ‘Isipite.

²⁹Pea foki ‘a Lūpeni ki he lepa; pea tā ‘oku ‘ikai ‘i ai ‘a Siosifa; pea ne hae hono kofu.

³⁰Pea ne foki ki hono ngaahi tokoua, ‘o ne pehē, Kuo ‘ikai ‘a e tamasi‘i; pea ko au te u ‘alu ki fē?

³¹Pea nau to‘o ‘a e kofu ‘o Siosifa, ‘o nau tāmate‘i ha kosi tangata, ‘o nau unu ‘a e kofu ki he toto;

³²pea na‘a nau fekau atu ‘o ‘ave ‘a e kofu pulepule ki he‘enau ‘eiki; ‘o nau pehē, Kuo mau ‘ilo ‘a e me‘a ni; ke ke vakai mu‘a pe ko e kofu ‘o ho foha pe ‘ikai.

³³Pea na‘a ne ‘ilo ia, ‘o ne pehē, Ko e kofu pē ‘o hoku foha; kuo keina ia ‘e ha manu fekai: kuo pau kuo hae ‘a si‘i Siosifa.

³⁴Pea hae ‘e Sēkope hono ngaahi kofu, ‘o ne vala tauanga‘a ‘o ne tēngihia hono foha ‘o ‘aho lahi.

³⁵Pea na‘e tutu‘u kotoa pē hono ngaahi foha mo hono ngaahi ‘ōfefine ke fakafiemālie ki ai: ka na‘e ‘ikai te ne tali ‘enau fakafiemālie; ‘o ne pehē, Ka u ‘alu hifo tangi pē ki hoku foha ki Hētesi. Na‘e pehē hono tēngihia ia ‘e he‘ene ‘eiki.

³⁶Ka ko e kau Mētani na‘a nau fakatau ia ki ‘Isipite, kia Pōtifa ko e ‘ōfisa ‘a Felo, ko e kapiteni ‘o e ka‘ate.