Read KO E TOH TAPU KATOA TONGA KO SĒNESI 38 Bible Online

KO SĒNESI 38 - KO E TOH TAPU KATOA TONGA bible

KO SĒNESI 38

¹PEA ‘i he taimi ko ia tokua, na‘e ‘alu hifo ‘a Siuta mei hono ngaahi tokoua, ‘o ne afe atu ki ha motu‘a ‘Atulami na‘e hingoa ko Hila.

²Na‘e mamata ‘e Siuta ‘i he potu ko ia ki he ‘ōfefine ‘o ha tangata Kēnani na‘e hingoa ko Sua‘a: pea ne to‘o ia ‘o ‘alu ki ai.

³Pea ne feitama, ‘o ne fā‘ele‘i ha tama tangata ‘o ne fakahingoa ko ‘Ea.

⁴Pea ne toe feitama, ‘o ne fā‘ele‘i ha tama tangata; pea ne fakahingoa ia ko ‘Ōnani.

⁵Pea ne toe fai foki, ‘o fā‘ele‘i ha tama tangata, pea ne fakahingoa ia ko Sela: pea na‘e ‘i Kēsipi ‘a Siuta ‘i he‘ene fā‘ele‘i ia.

⁶Pea na‘e ma‘u ‘e Siuta ha uaifi mo‘o ‘Ea ko hono ‘uluaki, pea ko e hingoa ‘o e fefine ko Tema.

⁷Pea ko ‘Ea, ko e ‘uluaki foha ‘o Siuta ko e tangata kovi ia ‘i he ‘afio ‘a Sihova; ko ia na‘e tāmate‘i ia ‘e Sihova.

⁸Pea lea ‘a Siuta kia ‘Ōnani, ‘Alu koe ki he finemotu‘a ‘a ho ta‘okete, pea ke fai ‘a e tō‘onga ‘a e tokoua ‘o e husepāniti ‘o fokotu‘u ha hako ki ho ta‘okete.

⁹Ka na‘e ‘ilo ‘e ‘Ōnani ‘e ‘ikai ‘o‘ona ‘a e hako ko ia; pea ko ia ‘i he‘ene ‘alu atu ki he finemotu‘a ‘o hono ta‘okete, na‘a ne hua‘i ia ki he kelekele, koe‘uhi ke ‘oua te ne ‘ange ha hako ki hono ta‘okete.

¹⁰Pea na‘e tau kovi ki he finangalo ‘o Sihova ‘a e me‘a kuo ne fai: pea na‘a ne tāmate‘i mo ia foki.

¹¹Pea lea ‘a Siuta kia Tema ko e uaifi ‘o hono foha, ‘Ē, ke ke nofo uitou pē ‘i he fale ‘o ho‘o tamai kae‘oua ke lahi hoku foha ko Sela: ko ‘ene pehē, Na‘a mate foki mo ia, ‘o hangē ko hono ongo ta‘okete. Pea ‘alu ‘a Tema, ‘o nofo ‘i he fale ‘o ‘ene ‘eiki.

¹²Pea na‘e faifai pea pekia ‘a e ‘ōfefine ‘o Sua‘a, ‘a e uaifi ‘o Siuta; pea kuo malele ‘a e mamahi ‘a Siuta, pea na‘a ne ‘alu hake ki Tīmina ki he‘ene kau kosi sipi, ‘a ia mo hono kaume‘a ko Hila ko e tangata ‘Atulami.

¹³Pea na‘e fakahā kia Tema, ‘o pehē, Tā ko e tamai ‘a ho ‘unoho ‘oku ‘alu hake ki Tīmina ke fai ‘ene kosi sipi.

¹⁴Pea ne hu‘ihu‘i hono ngaahi kofu fakauitou, ‘o ne ‘ai hono pūlou, ‘o ne ‘ufi‘ufi ‘aki, ‘o ne nofo ‘i he matanikolo ‘o ‘Enaimi, ‘a ia ‘oku ‘i he hala ki Tīmina; he na‘a ne vakai kuo lahi ‘a Sela, pea kuo ‘ikai ‘ange ia mōno ‘unoho.

¹⁵Pea ‘i he vakai kiate ia ‘e Siuta, na‘a ne mahalo ko e fefine fe‘auaki; koe‘uhi kuo ne pūlou hono mata.

¹⁶Pea ne afe ki ai ‘i he hala, ‘o ne pehē, Sī ni, tuku ke u ‘alu atu kiate koe (he na‘e ‘ikai te ne ‘ilo ko e ‘unoho ‘o hono foha). Pea ne tali, Ko e hā te ke foaki mai ka ke ha‘u kiate au?

¹⁷Pea ne pehē, Te u ‘atu mei he fanga manu ha ki‘i kosi. Pea pehē ‘e he fefine, Pea te ke tuku mai ha talifaki, kae‘oua ke ke ‘omi ia?

¹⁸Pea ne pehē, Ko e hā ha talifaki te u ‘atu? Pea tali ‘e he fefine, Ko ho‘o sila, mo ho‘o kahoa, mo e tokotoko ‘oku ‘i ho nima na. Pea ne ‘ange ki ai, pea ne ‘alu kiate ia, pea ne feitama kiate ia.

¹⁹Pea tu‘u hake ‘a e fefine, ‘o ‘alu, ‘o ne hu‘ihu‘i hono pūlou, ‘o ne ‘ai hono kofu fakauitou.

²⁰Pea ‘atu ‘e Siuta ‘a e ki‘i kosi ‘i hono kaume‘a, ko e tangata ‘Atulami, koe‘uhi ke ne ma‘u mai mei he fefine hono talifaki: ka na‘e ‘ikai te ne ‘ilo ia.

²¹Ko ia na‘a ne fehu‘i ki he kakai ‘o e feitu‘u, ‘o pehē, Ko e fē ‘a e fefine tapu ko ia na‘a ne ‘i ‘Enaimi, ‘i he ve‘ehala ni? Pea nau tali, Na‘e ‘ikai ‘i heni ha fefine tapu.

²²Pea na‘a ne foki kia Siuta, ‘o ne pehē, Kuo ‘ikai te u ‘ilo ‘a e fefine; kae‘uma‘ā na‘e tala mai ‘e he kakai ‘o e potu, ‘o pehē, Na‘e ‘ikai ha fefine tapu ‘i ai.

²³Pea pehē ‘e Siuta, Tuku ai pe ā ke ne ma‘u ia, na‘a manuki‘i kitaua: Ko eni kuo u ‘atu ‘a e ki‘i kosi ni, pea ko koe na‘e ‘ikai te ke ‘ilo ia.

²⁴Pea ‘i he faifai pea ‘osi nai ‘a e māhina ‘e tolu, na‘e fakahā kia Siuta, ‘o pehē, Kuo fe‘auaki ‘a Tema ko e ‘unoho ‘o ho foha; kae‘uma‘ā kuo ne feitama ‘i he‘ene fe‘auaki. Pea pehē ‘e Siuta, ‘Omi ia kitua‘ā ‘o tutu.

²⁵Pea kuo ‘omi ‘a e fefine kitua‘ā, na‘a ne fekau atu ki he tamai ‘a hono ‘unoho, ‘o pehē, Ko e tangata ‘oku ‘a‘ana ‘a e ngaahi me‘a ni, ko ia ia ‘oku ou feitama ki ai: pea ne pehē foki, Ke ke vakai mu‘a pe ‘oku ‘o hai ‘a e ngaahi me‘a ni, ‘a e sila ni, mo e kahoa, mo e tokotoko.

²⁶Pea ‘ilo ia ‘e Siuta, ‘o ne pehē, ‘Oku ne tonuhia ange ‘iate au, koe‘uhi ā na‘e ‘ikai te u ‘ange ia ki hoku foha ko Sela. Ka na‘e ‘ikai te ne toe fe‘iloaki mo ia.

²⁷Pea ‘i he faifai pea hoko hono taimi fā‘ele, pea tā ko e māhanga,

²⁸pea ‘i he‘ene fā‘ele na‘e ‘ai mai ha nima: pea na‘e hanga ‘a e mā‘uli, ‘o nono‘o ‘aki hono nima ha filo kula, he‘ene pehē, Ko eni ia ‘a e fuofua ha‘u.

²⁹Pea ‘i he‘ene to‘o atu hono nima, ‘iloange na‘e tō mai hono tokoua: pea pehē ‘e he fefine, ko e hā kuo ke motuhi mai? Ke tō kiate koe ho‘o motuhi: ko ia na‘e fakahingoa ai ia ko Felesi (ko Motuhi).[95]

³⁰Pea hili ia na‘e tō mai hono tokoua, ‘a ia na‘e ‘i hono nima ‘a e filo kula: pea na‘e fakahingoa ia ko Sala.[96]