Read KO E TOH TAPU KATOA TONGA KO SĒNESI 39 Bible Online

KO SĒNESI 39 - KO E TOH TAPU KATOA TONGA bible

KO SĒNESI 39

¹KO ia na‘e ‘ohifo ‘a Siosifa ki ‘Isipite; pea ko Pōtifa ko e tangata ‘Isipite, ko ha ‘ōfisa ‘o Felo, ko e kapiteni ‘o e Kā‘ate, na‘a ne fakatau ia mei he kau ‘Isime‘eli kuo nau ‘ohifo ia.

²Pea na‘e kau ‘a Sihova mo Siosifa, pea ko e tangata fai tāpuekina ia; pea na‘a ne taka ‘i he fale ‘o hono ‘eiki ko e ‘Isipite.

³Pea na‘e vakai ‘e hono ‘eiki ‘oku kau ‘a Sihova mo e tangata ni, pea ‘ilonga ha me‘a na‘a ne ala ki ai na‘e tāpuaki‘i ‘e Sihova hono fai.

⁴Ko ia na‘e ‘ofeina ‘a Siosifa ‘e he tangata ni, ‘o ne nofo mai kōno tauhi: pea na‘a ne fakanofo ia ke pule ki hono fale, pea na‘a ne tuku ke ne fa‘iteliha ki he‘ene ngaahi me‘a kotoa.

⁵Pea hili ‘ene fakanofo ia ke pule ki hono fale mo e me‘a kotoa pē na‘a ne ma‘u, ‘io, mei he taimi ko ia na‘e tāpuaki‘i ‘e Sihova ‘a e fale ‘o e tangata ‘Isipite ko ia, koe‘uhi ko Siosifa; na‘e tō ‘a e tāpuaki ‘a Sihova ki he‘ene me‘a kotoa pē, ‘i fale mo tu‘a.

⁶Pea na‘a ne tuku ‘ene me‘a kotoa pē kia Siosifa; pea na‘e ‘ikai te ne feongoi mo ia ‘i ha me‘a, ngata pē ‘i he me‘a na‘a ne kai. Pea ko Siosifa ko e tangata toulekeleka mo matamatalelei.

⁷Pea na‘e faifai pea tokanga kovi kia Siosifa ‘a e uaifi ‘o hono ‘eiki; pea ne pehē ki ai, Ta mohe mu‘a.

⁸Pea ne fakafisi, ‘o ne pehē ki he uaifi ‘o hono ‘eiki; Vakai, ‘oku ‘ikai ke feongoi mo au ‘a hoku ‘eiki ‘i ha me‘a ‘oku ‘i he fale, pea ko ‘ene me‘a kotoa kuo ne tuku ke u fa‘iteliha ki ai;

⁹‘oku ‘ikai ha taha ‘i he fale ni ‘oku lahi ‘iate au; pea kuo ‘ikai te ne ta‘ofi meiate au ha momo‘i me‘a ‘e taha, ko koe pē, koe‘uhi ā ko hono uaifi koe: pea fēfē ai ha‘aku fai ‘a e fu‘u angahala lahi ni, ‘o te hia ai ki he ‘Otua?

¹⁰Pea neongo na‘a ne toutou lea kia Siosifa ‘i he ‘aho kotoa pē, ka na‘e ‘ikai te ne fai ki hono loto, ke na tākoto, pe ke na fe‘ao.

¹¹Pea faifai pea hoko ha ‘aho ‘a ia na‘a ne hū ai ki fale ke fai ‘ene ngāue, pea na‘e ‘ikai ‘i ai ha toko taha ‘o e kakai ‘o e fale.

¹²Pea puke ia ‘e he fefine ‘i hono kofu, ‘o ne pehē, Ta mohe ā: pea ne tuku ‘a e kofu ‘i hono nima, ‘o ne hola ‘o hū kitua‘ā.

¹³Pea ‘i he vakai ‘e he fefine kuo ne tuku hono kofu ‘i hono nima, pea kuo ne hola kitu‘a,

¹⁴na‘a ne ui ange ‘a e kakai ‘o e fale, ‘o ne lea kiate kinautolu, ‘o pehē; Vakai, kuo ne ‘omi kiate kitautolu ha tangata Hepelū ke pā‘usi‘i kitautolu; na‘a ne ha‘u kiate au ke ma mohe, pea u kaila le‘o lahi:

¹⁵pea ‘i he‘ene fanongo ki he ‘ai ‘eku fu‘u kalanga, na‘a ne tuku hono kofu ‘i hoku tafa‘aki, ‘o ne hola ‘o hū kitu‘a.

¹⁶Pea na‘a ne tuku ‘a e kofu ‘i hono tafa‘aki, kae‘oua ke ha‘u ki ‘api ‘a hono ‘eiki.

¹⁷Pea ne lea kiate ia ‘o pehē, Ko e tamaio‘eiki Hepelū ni, ‘a ia kuo ke ‘omi kiate kitautolu, na‘a ne ha‘u kiate au ke pā‘usi‘i au;

¹⁸pea ‘i he‘eku ‘ai ‘eku fu‘u kalanga, na‘a ne tuku hono kofu ‘i hoku tafa‘aki, ‘o ne hola kitu‘a.

¹⁹Pea ‘i he fanongo ‘e hono ‘eiki ki he ngaahi me‘a na‘e lea‘aki ‘e hono uaifi kiate ia, he‘ene pehē, Na‘e pehē mo pehē ‘a e fai ‘a ho‘o tamaio‘eiki kiate au; na‘a ne tuputāmaki.

²⁰Pea na‘e puke ‘a Siosifa ‘e hono ‘eiki ‘o ne tuku ia ki he pilīsone, ‘a e potu na‘e nofo pōpula ai ‘a e kau pōpula ‘a e Tu‘i: pea na‘a ne nofo ‘i he pilīsone.

²¹Ka na‘e kau ‘a Sihova mo Siosifa, pea ne o‘i ha manava‘ofa ki ai, pea ne tuku ke ne ‘ofeina ‘i he pule ‘o e pilīsone.

²²Pea ko e pule ‘o e pilīsone na‘a ne tuku kia Siosifa ‘a e kau pōpula kotoa pē na‘e ‘i he pilīsone; pea ‘ilonga ha me‘a na‘e fai ai, ko ia ia na‘a ne fai.

²³Na‘e ‘ikai tokanga‘i ‘e he pule ‘o e pilīsone ha kihi‘i momo‘i me‘a ‘e taha kuo tuku kiate ia; koe‘uhi na‘e kau mo ia ‘a Sihova, pea ‘ilonga ha me‘a na‘a ne fai, na‘e fakamonū‘ia ‘e Sihova.