Read KO E TOH TAPU KATOA TONGA KO SĒNESI 4 Bible Online

KO SĒNESI 4 - KO E TOH TAPU KATOA TONGA bible

KO SĒNESI 4

¹PEA fe‘iloaki ‘a ‘Ātama mo hono uaifi ko ‘Ivi pea ne feitama, ‘o ne fā‘ele‘i ‘a Keini [ko Ma‘u],[15] pea pehē ‘e he fefine, Kuo u ma‘u ha tangata ‘ia Sihova.

²Pea ne toe fā‘ele, ‘o ne ma‘u hono tehina ko ‘Ēpeli. Pea na‘e hoko ‘a ‘Ēpeli ko e tauhi sipi, ka ko Keini ko e tama ngoue.

³Pea ‘i he hili ha ngaahi ‘aho, pea ‘omi ‘e Keini ha fua ‘o ‘ene ngoue ko e feilaulau kia Sihova.

⁴Pea ko ‘Ēpeli foki na‘e ‘omi ‘e ia ‘a e veloaki ‘o ‘ene fanga sipi, ‘io, ‘a ia pē na‘e ngako. Pea na‘e hāngaifofonga ‘a Sihova kia ‘Ēpeli mo ‘ene feilaulau:

⁵ka ko Keini mo e feilaulau ‘a‘ana na‘e ‘ikai te ne fofonga ki ai. Pea ‘ita ‘aupito ‘a Keini, pea mapelu hono mata.

⁶Pea folofola ‘a Sihova kia Keini, Ko e hā ‘oku ke ‘ita ai? Pea ko e hā ‘oku mapelu ai ho mata?

⁷‘Ikai ‘e ai ha hanga hake,[16] ‘o kapau ‘oku ke feinga ke lelei? Pea ka ‘oku ‘ikai te ke feinga ke lelei ‘oku ‘i he matapā ‘a angahala, ‘o tokotoaki mai: pea ‘oku toka ‘ene holi kiate koe, ka ‘oku ‘a‘au ke pule ki ai.

⁸Pea lea ai ‘a Keini kia ‘Ēpeli ko hono tehina:[17] pea lolotonga ‘ena ‘i ‘uta na‘e tu‘u ‘a Keini kia ‘Ēpeli ko hono tehina, ‘o ne tāmate‘i ia.

⁹Pea folofola ‘a Sihova kia Keini, Kofa‘ā ‘a ‘Ēpeli ko ho tehina? Pea ne pehē, ‘Oku ‘ikai te te ‘ilo: he ko e tauhi kita ‘o hoto tokoua?

¹⁰Pea ne folofola mai, Ko e hā eni kuo ke fai? Sī, ko e le‘o ena! Ko e ngaahi tulutā toto ‘o ho tehina ‘oku tangi mai kiate au mei he kelekele.

¹¹Pea ko eni ko e mala‘ia koe mei he kelekele na na‘e tangaki hono ngutu ‘o fakatali ‘a e toto ‘o ho tehina mei ho nima;

¹²he ‘oka ke ka ngoue‘i ‘a e kelekele, ‘e ‘ikai te ne toe ‘atu kiate koe ‘ene koloa; te ke nofo fakahee‘i mo fehiki‘aki ‘i māmani.

¹³Pea pehē ‘e Keini kia Sihova, ‘Oku mamafa fau hoku tautea, ‘o ‘ikai te u fa‘ahi.

¹⁴He vakai, kuo ke kapusi au he ‘aho ni ke ‘oua na‘a ku nofo ‘i he kelekele ni, pea te u puli mei ho fofonga; pea te u nofo fakahee‘i mo fehiki‘aki ‘i māmani; pea ‘e faifai pea ‘ilonga ha taha te ne ‘ilo au te ne tāmate‘i au.

¹⁵Pea folofola ‘a Sihova kiate ia, pea telia ‘a e me‘a ko ia, ‘ilonga ‘a ia te ne tāmate‘i ‘a Keini ‘e liunga fitu hono sauni. Pea na‘e tu‘utu‘uni ‘e Sihova ha faka‘ilonga mo‘o Keini ke ‘oua ‘e tāmate‘i ia ‘e he kakai te nau ma‘u ia.

¹⁶Pea na‘e ‘alu atu ‘a Keini mei he‘ene taka ofi kia Sihova, ‘o ne nofo ‘i he fonua ko Noti, ‘i he potu hahake ‘o ‘Īteni.

¹⁷Pea fe‘iloaki ‘a Keini mo hono uaifi; pea ne feitama ‘o ne fā‘ele‘i ‘a ‘Īnoke: pea ne kamata langa ha kolo, pea na‘a ne fakahingoa ‘a e kolo ki hono foha ko ‘Īnoke.

¹⁸Pea na‘e fanau‘i kia ‘Īnoke ‘a ‘Īlati: pea ma‘u foha ‘e ‘Īlati, ko Mehuiaeli: pea ma‘u ‘e Mehuiaeli ‘a Metuisaeli; pea ma‘u ‘e Metuisaeli ‘a Lēmeki.

¹⁹Pea mali ‘a Lēmeki mo ha ongo fafine ‘e toko ua; ko e hingoa ‘o e ‘uluaki ko ‘Ata, pea ko e hingoa ‘o hono ua ko Sila.

²⁰Pea na‘e fā‘ele‘i ‘e ‘Ata ‘a Siapale: ko e tupu‘anga ia ‘o e ha‘a nofo tēniti, mo fanga manu.

²¹Pea ko e hingoa ‘o hono tehina ko Siupale: ko e tupu‘anga ia ‘o e fa‘ahinga ‘oku faiva ‘aki ‘a e ha‘ape mo e mimiha.

²²Pea ko Sila foki na‘a ne fā‘ele‘i ‘a Tūpale-keini, ko e tama na‘a ne tuki ‘a e fa‘ahinga me‘a māsila kehekehe mei he kapa mo e ‘aione:[18] pea ko e tuofefine ‘o Tūpale-keini ko Nā‘ama.

²³Pea pehē ‘e Lēmeki ki hono ongo uaifi, Fanongo mai, ‘Ata mo Sila; Ongo uaifi ‘o Lēmeki, Tokanga ka u lea: He‘eku tāmate‘i ‘a e tangata ne taa‘i au, ‘Io, ‘a e talavou ne fai hoku pohu.

²⁴He liunga fitu ‘a e sauni ‘o Keini, Kae liunga fitungofulu mā fitu ‘a Lēmeki.

²⁵Pea toe fe‘iloaki ‘a ‘Ātama mo hono uaifi; pea ne fā‘ele‘i ha tama, ‘o ne fakahingoa ia ko Seti [ko Tu‘utu‘uni];[19] he‘ene pehē, Kuo tu‘utu‘uni ma‘aku ‘e he ‘Otua ha hako ‘e taha ke fetongi ‘a ‘Ēpeli, ‘a ia ne tāmate‘i ‘e Keini.

²⁶Pea ko Seti foki na‘e fanau‘i kiate ia ha foha; ‘o ne fakahingoa ko ‘Īnosi. Ko e taimi ko ia na‘e kamata fai ai ‘a e lotu ki he huafa ‘o Sihova.