Read KO E TOH TAPU KATOA TONGA KO SĒNESI 40 Bible Online

KO SĒNESI 40 - KO E TOH TAPU KATOA TONGA bible

KO SĒNESI 40

¹PEA faifai pea ko e matāpule ngaohi kava ‘a e Tu‘i ‘Isipite, mo ‘ene matāpule ta‘o mā, na‘a na hia ki hona ‘eiki ko e Tu‘i ‘Isipite.

²Pea na‘e tuputāmaki ‘a Felo ki he‘ene ongo ‘ōfisa, ko e pule ‘o ha‘a ngaohi kava mo e pule ‘o ha‘a ta‘o mā.

³Pea na‘a ne tuku kinaua ke nofo pōpula ‘i he fale ‘o e kapiteni ‘o e Kā‘ate, ‘io, ‘i he fale pilīsone, ‘a e potu na‘e nofo pōpula ai ‘a Siosifa.

⁴Pea ko e kapiteni ‘o e Kā‘ate na‘a ne tuku kinaua kia Siosifa, pea na‘a ne tauhi kinaua: pea na‘a na ‘aho lahi ‘i he pilīsone.

⁵Pea na‘a na misi ‘a kinaua fakatou‘osi ‘i ha pō pē taha, ‘a e matāpule ngaohi kava mo e matāpule ta‘o mā ‘a e Tu‘i ‘Isipite, ‘a ia na‘a na nofo pōpula ‘i he pilīsone, ‘o takitaha ma‘ana ‘a e misi mo hono ‘uhinga.

⁶Pea ‘i he hū kiate kinaua ‘a Siosifa pongipongi, na‘a ne vakai tā ‘oku na fofonga mamahi.

⁷Pea ne fehu‘i ki he ongo ‘ōfisa ‘a Felo, ‘a ia na‘e ‘iate ia ‘o nofo pōpula ‘i he fale ‘o hono ‘eiki, ‘o ne pehē, Ko e hā ‘oku kovi ai homo fofonga he ‘aho ni?

⁸Pea na tali, Kuo ma misi, pea ‘oku ‘ikai ha taha ke vete hono ‘uhinga. Pea pehē ‘e Siosifa kiate kinaua, ‘Ikai ‘oku ‘i he ‘Otua ‘a e faka‘uhinga? fakamatala mai mu‘a kiate au.

⁹Pea fakamatala ‘ene misi kia Siosifa ‘e he pule ‘o e ha‘a ngaohi kava ‘o ne pehē, Na‘e hā kiate au ‘i he‘eku misi, pea tā ‘oku ‘i hoku ‘ao ha vaine;

¹⁰pea ‘i he vaine ‘a e va‘a ‘e tolu: pea hangē na‘e muka mai, pea moto mai; pea ko hono ngaahi loholoho na‘a nau laku mai ‘a e ngaahi kālepi:

¹¹pea na‘e ‘i hoku nima ‘a e ipu ‘a Felo; pea u to‘o ‘a e ngaahi kālepi, ‘o tatau ia ki he ipu ‘a Felo, pea u ‘ange ‘a e ipu ki he to‘ukupu ‘o Felo.

¹²Pea tali ‘e Siosifa kiate ia, Ko hono ‘uhinga eni: Ko e va‘a ‘e tolu ko e ‘aho ‘e tolu ia.

¹³‘Oku toe ha ‘aho ‘e tolu, pea toki hiki ho ‘ulu ‘e Felo, pea te ne fakafoki koe ki ho tu‘unga, pea te ke ‘ange ‘a e ipu ‘a Felo ki hono nima, ‘o hangē ko ia ‘i mu‘a ‘i ho‘o nofo ko ‘ene ngaohi kava.

¹⁴Pea ‘oka ke ka tu‘umālie koe ke ke manatu‘i au, pea ke fai mu‘a ha ‘ofa kiate au, pea ke fakahaa‘ia au kia Felo, ‘o fakahū kitu‘a au mei he fale ko eni.

¹⁵He ko e mātu‘aki kaiha‘asia au mei he fonua ‘o e ha‘a Hepelū: pea na‘a mo ‘eku ‘i heni, kuo ‘ikai te u fai ha me‘a ke nau tuku ai au ki he ‘ana ni.

¹⁶Pea ‘i he vakai ‘e he pule ‘o e ha‘a ta‘o mā ‘oku mālie ‘a e faka‘uhinga, pea ne pehē kia Siosifa, Ko au foki na‘a ku vakai ‘i he‘eku misi, pea tā ‘oku ‘i hoku ‘ulu ha koto mā hinehina ‘e tolu:

¹⁷pea ‘i he kato taupotu ki ‘olunga na‘e ai ‘a e ngaahi fa‘ahinga me‘a ‘oku ngaohi ‘e he ta‘o mā ko e me‘a taumafa ‘a Felo; pea na‘e kai ia ‘e he fanga manupuna mei he kato ‘i hoku funga ‘ulu.

¹⁸Pea tali ‘e Siosifa, ‘o pehē, Ko hono ‘uhinga eni: Ko e kato ‘e tolu ko e ‘aho ‘e tolu ia:

¹⁹‘oku toe pē ha ‘aho ‘e tolu, pea ‘e hiki ‘e Felo ho ‘ulu meiate koe, pea ne tautau koe ‘i ha ‘akau; pea ‘e kai ‘e he manupuna ho kakano meiate koe.

²⁰Pea ‘i he hoko hono tolu ‘o e ‘aho, ‘a ia ko e ‘aho fā‘ele‘i ‘o Felo, na‘a ne fai ha kātoanga mo ‘ene kau tamaio‘eiki kotoa pē: pea ne hiki ‘a e ‘ulu ‘o e pule ‘o e ha‘a ngaohi kava mo e pule ‘o e ha‘a ta‘o mā ki he ha‘oha‘onga ‘o ‘ene kau tamaio‘eiki.

²¹Pea na‘a ne fakafoki ‘a e pule ‘o e ha‘a ngaohi kava ki he‘ene lakanga ngaohi kava; pea na‘a ne ‘ange ‘a e ipu ki he nima ‘o Felo:

²²ka na‘a ne tautau ‘a e pule ‘o e ha‘a ta‘o mā; ‘o hangē ko e faka‘uhinga ‘a Siosifa kiate kinaua.

²³Ka na‘e ‘ikai manatu kia Siosifa ‘e he pule ‘o e ha‘a ngaohi kava, ka na‘e ngalo pē.