Read KO E TOH TAPU KATOA TONGA KO SĒNESI 41 Bible Online

KO SĒNESI 41 - KO E TOH TAPU KATOA TONGA bible

KO SĒNESI 41

¹PEA ‘i he faka‘osi ‘o ha ta‘u ‘e ua, na‘e misi ‘a Felo: tā ‘oku ne tu‘u ‘i he ve‘e vaitafe.

²Pea ‘iloange na‘e ‘alu hake mei he vaitafe ha fanga kau ‘e toko fitu na‘e matamatalelei mo sisino; pea nau kaikai ‘i he mohuku ano.

³Pea tā na‘e ‘alu hake kimui mei he vaitafe ha fanga kau kehe ‘e toko fitu na‘e matamata kovi mo tutue; ‘o nau tu‘u fakataha mo e fanga kau ko ē ‘i he ngutu ‘o e vaitafe.

⁴Pea ko e fanga kau na‘e matamata kovi mo tutue na‘a nau folofua ‘a e fanga kau ‘e fitu na‘e matamatalelei mo sisino. Pea ‘ā ai ‘a Felo.

⁵Pea mohe ia ‘o misi ko hono tu‘o ua: pea tā na‘e ‘alu hake ha fo‘i koane ‘e fitu ‘i ha sino pē taha, ‘o fuo lalahi mo lelei.

⁶Pea vakai, na‘e tupu hake kimui ha fo‘i koane ‘e fitu na‘e fua mate, pea pakukā ‘i he matangi hahake.

⁷Pea ko e ngaahi fo‘i koane na‘e fua mate na‘a nau folo ‘a e fo‘i koane ‘e fitu na‘e fuolalahi mo fai kakano. Pea ‘ā ai ‘a Felo, pea tā ko e misi pē.

⁸Pea ‘i he‘ene pongipongi na‘e hoha‘a hono finangalo; ‘o ne fekau ke ui mai ‘a e kau sikalaipe kotoa pē ‘o ‘Isipite, mo hono kau tangata poto kotoa pē: pea na‘e fakamatala ‘e Felo ‘ene misi kiate kinautolu, ka na‘e ‘ikai ha taha te ne faka‘uhinga kia Felo.

⁹Pea na‘e toki lea kia Felo ‘e he matāpule ‘o e ha‘a ngaohi kava, ‘o pehē, Kuo u toki manatu he ‘aho ni ki he‘eku hia.

¹⁰Na‘e tuputāmaki ‘a e ‘Afiona ki he‘ene kau tamaio‘eiki ‘o tuku au ke u nofo pōpula ‘i he fale ‘o e kapiteni ‘o e Kā‘ate, ‘a au mo e matāpule ‘o ha‘a ta‘o mā:

¹¹pea ma misi fakatou‘osi ‘i ha pō pē taha, ‘a au mo ia, ‘o takitaha ma‘ana ‘a e misi mo hono ‘uhinga.

¹²Pea na‘a mau ‘i ai mo ha talavou ko e tangata Hepelū, ko e tamaio‘eiki ‘o e kapiteni ‘o e Kā‘ate; pea na‘a ma fakamatala kiate ia, pea na‘a ne faka‘uhinga kiate kimaua ‘ema misi; ‘o takitaha ‘a e misi hono ‘uhinga.

¹³Pea hangē ko ‘ene fakamatala kiate kimaua na‘e pehē ‘ene hoko; ko au na‘e fakafoki ‘e he ‘Afiona ki hoku lakanga, pea ko e tangata ko ē na‘e tautau.

¹⁴Pea fekau ‘e Felo ke ui ange ‘a Siosifa, pea na‘a nau ‘omi fakavave ia mei he ‘ana: pea na‘a ne tele hono kava, ‘o ne fetongi hono kofu, ‘o ne hū mai kia Felo.

¹⁵Pea folofola ‘a Felo kia Siosifa, ‘o pehē, Kuo u misi, pea ‘oku ‘ikai ha taha ke faka‘uhinga ia: ka kuo u fanongo kiate koe, tokua ko ho‘o fanongo leva ki ha misi pea ke faka‘uhinga ia.

¹⁶Pea tali ‘e Siosifa kia Felo, ‘o pehē, ‘Oku ‘ikai ko au: ko e ‘Otua pē te ne ‘omi ha me‘a ke tu‘umālie ai ‘a e ‘Afiona.

¹⁷Pea fakamatala ‘e Felo kia Siosifa, ‘o pehē, ‘I he‘eku misi ‘iloange ‘oku ou tu‘u ‘i he ngutu vaitafe:

¹⁸pea tā na‘e hake mei he vaitafe ha fanga kau ‘e toko fitu na‘e sisino mo matamatalelei; pea nau kaikai ‘i he mohuku ano:

¹⁹pea ‘iloange na‘e ‘alu hake kimui ha fanga kau kehe ‘e fitu na‘e tutue pea matamatakovi ‘aupito mo ‘ūhui; kuo te‘eki te u sio ki hano tatau ‘i he fonua kotoa ‘o ‘Isipite ‘i he kovi.

²⁰Pea ko e fanga kau ‘ūhui mo kovi na‘a nau folofua ‘a e ‘uluaki fanga kau ‘e toko fitu na‘e sisino.

²¹Pea neongo kuo nau hū ki honau kete, ka na‘e ‘ikai ‘ilonga ‘enau ‘i ai; he na‘a nau matamata kovi ai pē ‘o hangē ko ia ‘i he kamata‘anga, pea u ‘ā ai.

²²Pea u vakai ‘i he‘eku misi, pea tā na‘e ‘alu hake ‘i ha sino pē taha ha fo‘i koane ‘e fitu na‘e fuomo‘ui mo lelei;

²³pea ‘iloange na‘e tupu hake ha fo‘i koane kehe ‘e fitu na‘e fuomate mo kau pē, mo pakukā ‘i he matangi hahake;

²⁴pea ko e ngaahi fo‘i koane na‘e fuomate na‘a nau folo ‘a e fo‘i koane ‘e fitu na‘e lelei: pea na‘a ku tala ia ki he kau sikalaipe; pea na‘e ‘ikai ha taha te ne mafakamatala kiate au.

²⁵Pea lea ‘a Siosifa kia Felo, ko e misi ‘a e ‘Afiona ‘oku taha pē: kuo fakamatala ‘e he ‘Otua kia Felo ‘a e me‘a ‘oku ne teu fai.

²⁶Ko e kau lelei ‘e toko fitu ko e ta‘u ‘e fitu ia; pea ko e fo‘i koane lelei ‘e fitu ko e ta‘u ‘e fitu ia; ko e misi ‘oku taha pē.

²⁷Pea ko e fanga kau ‘ūhui mo kovi ‘e toko fitu na‘e ‘alu hake kimui ko e ta‘u ‘e fitu ia; pea ko e fo‘i koane ‘e fitu na‘e nge‘esi pē, mo pakukā ‘i he matangi hahake, ko e ta‘u honge ‘e fitu ‘e hoko ai.

²⁸Ko eni ‘a e me‘a kuo u fakamatala kia Felo; ‘oku fakahā ‘e he ‘Otua ki he ‘Afiona ‘a e me‘a ‘oku ne teu ke fai.

²⁹Vakai, ‘oku ha‘u ha ta‘u ‘e fitu ‘a ia ‘e mahu lahi ai ‘a ‘Isipite kātoa;

³⁰pea ‘e hoko ai ha ta‘u honge ‘e fitu, pea ‘e ngalo kotoa ‘a e mahu ‘i he fonua ko ‘Isipite, pea ‘e ‘auha ‘a e fonua ‘i he honge;

³¹‘io ‘e ‘ikai ‘iloa ‘a e mahu na‘e ‘i he fonua koe‘uhi ko e honge ko ia ‘e hoko ai; he ‘e mamafa ‘aupito ia.

³²Pea ko e me‘a ‘i hono ‘ai ‘o lōua ‘a e misi kia Felo, ko hono ‘uhinga kuo pau ‘a e me‘a mei he ‘Otua, pea ‘e vave ‘ene fai.

³³Pea ko ia ke vakai ‘e Felo ha tangata ‘oku mafai mo poto, pea ke ne fokotu‘u ia ke angi ki he fonua ko ‘Isipite.

³⁴Pea ke fai ‘e Felo mo fokotu‘u ha kau ‘ōfisa ki he fonua, ke to‘o hono vahe nima ‘o e fonua ko ‘Isipite ‘i he ta‘u ‘e fitu ‘o e mahu.

³⁵Pea ke nau tānaki ‘a e me‘akai kehekehe ‘o e ta‘u lelei ‘e fitu ko ia ‘oku ha‘u, ‘o nau fa‘oaki uite ‘i he malu ‘o Felo, ko e me‘akai ki he‘enau ngaahi kolo, pea ke nau tauhi ia.

³⁶Pea ko e me‘akai ko ia ko e tokonaki ki he fonua ki he ta‘u honge ‘e fitu, ‘a ia ‘e hoko ki ‘Isipite, koe‘uhi ke ‘oua na‘a ‘auha ‘a e fonua ‘i he honge.

³⁷Pea na‘e hā lelei ‘a e me‘a kia Felo, mo ‘ene kau tamaio‘eiki kotoa.

³⁸Pea folofola ‘a Felo ki he‘ene kau tamaio‘eiki, Te tau ‘ilo ‘i fē ha taha ‘oku hangē ko eni, ha tangata ‘oku ‘i ai ‘a e laumālie ‘o e ‘Otua?

³⁹Pea folofola ‘a Felo kia Siosifa, Ko e me‘a ‘i he fakahā ‘e he ‘Otua kiate koe ‘a e ngaahi fu‘u me‘a ni, ‘oku ‘ikai ha taha ‘oku mafai mo poto ‘o hangē ko koe.

⁴⁰Ko koe te ke pule ‘i hoku fale, pea ko hoku kakai kotoa pē te nau fai ‘enau nofo ‘o fakatatau ki ho‘o angi; ko e taloni pē te u mā‘olunga ai ‘iate koe.

⁴¹Pea folofola ‘a Felo kia Siosifa, Ko eni kuo u fakanofo koe ke pule ki ‘Isipite kātoa.

⁴²Pea na‘e to‘o ‘e Felo ‘a e mama mei hono nima, ‘o ne ‘ai ki he nima ‘o Siosifa, pea ne fakakofu ‘aki ia ha tupenu mahu‘inga, pea ne ‘ai ha kahoa koula ki hono u‘a;

⁴³na‘a ne fakaheka foki ia ki hono ua ‘o ‘ene sāliote; pea na‘a nau kalanga ‘i mu‘a, Punou; pea na‘a ne fakanofo ia ki he fonua kotoa ‘o ‘Isipite.

⁴⁴Pea na‘e folofola ‘a Felo kia Siosifa, Ko Felo au, pea ‘e ‘ikai ha tangata ‘i he fonua kotoa ‘o ‘Isipite te ne hiki hono nima pe ko hono va‘e ta‘e te ke kau ai.

⁴⁵Pea na‘e fakahingoa ‘e Felo ‘a Siosifa ko Safinate Peanea, pea na‘a ne ‘ange mōno ‘unoho ‘a ‘Asinate ko e ‘ōfefine ‘o Potifela ko e taula‘eiki ‘o ‘Oni.

⁴⁶Pea na‘e ‘alu atu ‘a Siosifa kuo ‘iate ia ‘a e fonua ko ‘Isipite. Pea kuo tolungofulu ta‘u ‘a Siosifa ‘i he‘ene tu‘u ‘i he ‘ao ‘o Felo ko e Tu‘i ‘Isipite. Pea na‘e ‘alu atu ‘a Siosifa mei he ‘ao ‘o Felo, ‘o ne angi atu ‘i he fonua kotoa ‘o ‘Isipite.

⁴⁷Pea ‘i he ta‘u mahu ‘e fitu na‘e fua ngafuhifuhi ‘a e kelekele.

⁴⁸Pea na‘a ne tānaki ‘a e me‘akai kehekehe ‘o e ta‘u ‘e fitu, ‘a ia na‘e ‘i he fonua kotoa ‘o ‘Isipite, pea ne tuku ‘a e me‘akai ‘i he ngaahi kolo: ko e me‘akai ‘o e tuku‘uta na‘e takatakai ‘a e kolo takitaha na‘a ne tuku ia ‘i he kolo ko ia.

⁴⁹Pea na‘e fa‘oaki koane ‘e Siosifa ‘o hangē ko e ‘one‘one ‘o e tahi hono lahi, ‘io, na‘e lahi ‘aupito, ko ia na‘e tuku hono fua; he na‘e ‘ikai mafua.

⁵⁰Pea na‘e fanau‘i kia Siosifa ha ongo foha ‘e toko ua ‘i he te‘eki ke hoko ‘a e ta‘u honge, ‘a ia na‘e fā‘ele‘i kiate ia ‘e ‘Asinate ko e ‘ōfefine ‘o Potifela ko e taula‘eiki ‘o ‘Oni.

⁵¹Na‘e fakahingoa ‘e Siosifa ‘a e ‘uluaki ko Manase (ko Fakangalo),[97] he‘ene pehē, Kuo fakangalo ‘e he ‘Otua ‘iate au ‘eku ongosia kotoa, mo e fale kotoa ‘o ‘eku tamai.

⁵²Pea na‘a ne fakahingoa ‘a hono ua ko ‘Ifalemi (ko Fua-loua),[98] he‘ene pehē, He kuo fakafua au ‘e he ‘Otua ‘i he fonua ‘o ‘eku tu‘utāmaki.

⁵³Pea na‘e ‘osi ‘a e ta‘u ‘e fitu ‘o e mahu, ‘a ia na‘e hoko ki he fonua ko ‘Isipite.

⁵⁴Pea na‘e kamata hoko ‘a e ta‘u ‘e fitu ‘o e honge, ‘o hangē ko e lea ‘a Siosifa: pea ko e honge na‘e ‘i he ngaahi fonua kotoa pē; ka ‘i he ngaahi feitu‘u ‘o ‘Isipite na‘e ‘i ai ha me‘akai.

⁵⁵Pea ‘i he faifai pea honge ‘a e ngaahi feitu‘u kehekehe ‘o ‘Isipite, pea tangi ‘a e kakai kia Felo ke ‘omi ha me‘akai: pea tala ‘e Felo ki he kakai ‘Isipite, Mou ō kia Siosifa; pea ‘ilonga ha me‘a ‘oku ne tala kiate kimoutolu, mou fai.

⁵⁶Pea ko e honge na‘e ‘i he funga ‘o māmani kotoa, pea na‘e fakaava ‘e Siosifa ‘a e ngaahi feleoko, ‘o ne fakatau ki he kakai ‘Isipite; pea na‘e faifai pea mamafa ‘a e honge ‘i ‘Isipite.

⁵⁷Pea na‘e ha‘u ki ‘Isipite ‘a e ngaahi fonua kehekehe ke fakatau me‘akai meia Siosifa; he na‘e mamafa ‘a e honge ‘i he fonua kotoa pē.