Read KO E TOH TAPU KATOA TONGA KO SĒNESI 42 Bible Online

KO SĒNESI 42 - KO E TOH TAPU KATOA TONGA bible

KO SĒNESI 42

¹PEA ‘i he ‘ilo ‘e Sēkope ‘oku ai ha koane ‘i ‘Isipite, na‘a ne pehē ki he‘ene fānau, Ko e hā ‘oku mau fesiofaki ai.

²Pea ne pehē foki, Ko eni kuo u fanongo ‘oku ai ha koane ‘i ‘Isipite: mou ‘alu hifo mu‘a ki ai, ‘o fakatau mei ai ma‘atautolu; koe‘uhi ke tau mo‘ui, ‘o ‘oua te tau mate.

³Ko ia na‘e ‘alu hifo ‘a e ngaahi tokoua ‘e hongofulu ‘o Siosifa ke fakatau koane mei ‘Isipite.

⁴Ka ko Penisimani, ko e tehina ‘o Siosifa, na‘e ‘ikai tuku ia ‘e Sēkope ke ‘alu mo hono ngaahi tokoua; he‘ene pehē, Na‘a hoko kiate ia ha tu‘utāmaki.

⁵Pea na‘e ha‘u ‘a e fānau ‘a ‘Isileli ke fakatau fakataha mo e kakai na‘e ha‘u; he na‘e honge ‘a e fonua ko Kēnani.

⁶Pea ko Siosifa ko e kōvana ia ‘o e fonua, ko ia ia na‘a ne fakatau ki he kakai ‘o e fonua: pea na‘e ha‘u ‘a e ngaahi tokoua ‘o Siosifa, ‘o nau tulolo kiate ia, ‘o punou ki he kelekele.

⁷Pea ‘i he mamata ‘a Siosifa ki hono ngaahi tokoua, na‘a ne ‘ilo kinautolu, ka na‘a ne fai kiate kinautolu ‘o hangē ha muli, ‘o ne lea fakapuhopuha kiate kinautolu, ‘o ne pehē kiate kinautolu, Ko ho‘omou omi mei fē?

⁸Pea nau pehē, Mei he fonua ko Kēnani ke fakatau me‘akai. Pea na‘e ‘ilo ‘e Siosifa hono ngaahi tokoua, ka ko kinautolu na‘e ‘ikai te nau ‘ilo ia.

⁹Pea na‘e manatu ‘e Siosifa ki he ngaahi misi na‘a ne fai kiate kinautolu, pea ne pehē ki ai, Ko e kau mataki kimoutolu; kuo mou omi ke vakai ‘a e ta‘eū ‘o e fonua.

¹⁰Pea nau tali, ‘Ēī, ‘oku ‘ikai, he kuo omi ‘a ho‘o kau tamaio‘eiki ke fakatau me‘akai.

¹¹Ko kimautolu kātoa ko e fānau ‘a ha tangata pē taha; ko e kakai fai mā‘oni‘oni kimautolu, ‘oku ‘ikai ko e kau mataki ‘a ho‘o kau tamaio‘eiki.

¹²Pea ne pehē kiate kinautolu, ‘Ikai, ka ko ho‘omou omi pē ke vakai ‘a e ta‘eū ‘o e fonua.

¹³Pea nau pehē ange, Ko kimautolu ko ho‘o kau tamaio‘eiki ko e toko hongofulu mā ua, ko e tautehina, ko e fānau ‘a e tangata pē taha ‘i he fonua ko Kēnani: pea ke ke me‘a, ko e kimui ‘oku ‘i he‘emau ‘eiki ‘i he taimi ni, pea ko e toko taha ‘oku ‘ikai.

¹⁴Pea pehē ‘e Siosifa kiate kinautolu, ‘Āua, ‘ikai ko ia ia na‘a ku tala atu, ko e kau mataki kimoutolu:

¹⁵ko e me‘a ko eni ‘e sivi ‘aki kimoutolu: Tangi e mo‘ui ‘a Felo, ‘e ‘ikai te mou ‘alu atu kae‘oua ke ha‘u homou tehina.

¹⁶Fekau atu hamou toko taha ke ‘omi homou tehina, ka ko kimoutolu ‘e nofo pilīsone, koe‘uhi ke fakamo‘oni ko e kau tangata fai mo‘oni kimoutolu: he ka ‘ikai, tangi e mo‘ui ‘a Felo ko e kau mataki kimoutolu.

¹⁷Pea ne ‘ai fakataha kinautolu ki he pilīsone, ‘o ‘aho tolu.

¹⁸Pea ‘i hono ‘aho tolu na‘e lea ‘a Siosifa kiate kinautolu, ‘o pehē, Mou fai eni, pea te mou mo‘ui; he ko e tokotaha au ‘oku ou ‘a‘apa ki he ‘Otua:

¹⁹kapau ko e kau fai mo‘oni kimoutolu, pea ke nofo pōpula ‘i he pilīsone hamou toko taha; ka mou ō kimoutolu ‘o ‘ave koane telia ‘a e honge ‘o homou ngaahi ‘api;

²⁰ka mou ‘omi kiate au homou tehina kimui, pea ‘e fakamo‘oni ai ho‘omou lea; pea ‘e ‘ikai ai te mou mate. Pea na‘a nau fai pehē.

²¹Pea felāuaki ‘a e tu‘unga me‘a ni, Kuo tau hia mo‘oni ‘i hotau tehina, ‘i he‘etau sio ki he mamahi ‘o hono loto, ‘i he‘ene kōlenga kiate kitautolu kae ‘ikai te tau tokanga; ko hono ō ia kuo hoko ai kiate kitautolu ‘a e mamahi ko eni.

²²Pea tali ‘e Lūpeni kiate kinautolu, ‘o pehē, ‘Ikai na‘a ku tala kiate kimoutolu, ‘o pehē, ‘Oua te mou fai ha kovi ki he tama; ka na‘e ‘ikai te mou tokanga? Pea ko eni foki ‘oku ‘eke hono toto.

²³Ka ko kinautolu na‘e ‘ikai te nau mahalo ‘oku ‘ilo‘i ‘e Siosifa; he na‘e hikilea ‘enau fe‘iloaki.

²⁴Pea ne tafoki meiate kinautolu, ‘o tangi; pea ne foki mai ‘o alea mo kinautolu, pea ne fili ‘a Simione, ‘o ne ha‘i ia ‘i honau ‘ao.

²⁵Pea na‘e tu‘utu‘uni ‘e Siosifa ke fakafonu koane ‘enau ngaahi ‘angame‘a, pea ke fakafufū ‘a e pa‘anga ‘a e tangata takitaha ki he‘ene tangai, pea ke ‘ange hanau ‘oho ki he hala: ‘io, na‘e pehē ‘ene fai kiate kinautolu.

²⁶Pea na‘a nau fakaheka ‘enau koane ki he‘enau fanga ‘asi, ‘o nau ‘alu mei he potu ko ia.

²⁷Pea ‘i he vete ‘e ha taha ‘ene tangai ke ‘ange ha me‘akai ki he‘ene ‘asi ‘i he mālōlō‘anga, na‘a ne vakai ‘ene pa‘anga, tā ‘oku ‘i he‘ene ngutu‘i tangai.

²⁸Pea ne pehē ki hono ngaahi tokoua, Kuo fakafoki mai ‘eku pa‘anga; he vakai foki ‘oku ‘i he‘eku tangai: pea na‘e tō honau manava, ‘o nau fetete‘i he‘enau pehē, Ko e hā ‘a e me‘a ni kuo fai ‘e he ‘Otua kiate kitautolu?

²⁹Pea na‘a nau a‘u ki he‘enau ‘eiki ko Sēkope ki he fonua ko Kēnani, pea nau fakamatala kiate ia ‘a e me‘a kotoa kuo hoko kiate kinautolu: ‘o nau pehē,

³⁰Ko e matāpule ‘oku ‘eiki ‘i he fonua na‘a ne lea fakapuhopuha‘a kiate kimautolu, ‘o ne tuku ko e ni‘ihi kimautolu kuo mau ō ange ke mataki‘i ‘a e fonua.

³¹Pea ne mau tali ki ai, Ko e kakai fai mā‘oni‘oni kimautolu; ‘oku ‘ikai ko e kau mataki:

³²‘oku mau toko hongofulu mā toko ua, ko e tautehina, ko e kau tamai taha; ko e toko taha kuo ‘ikai, pea ko e kimui ‘oku ‘i he‘enau tamai ‘i he taimi ni ‘i he fonua ko Kēnani.

³³Pea me‘a kiate kimautolu ‘a e matāpule ‘oku ‘eiki ‘i he fonua, ‘o pehē, Ko e me‘a ko eni te u ‘ilo ai ko e kau mā‘oni‘oni kimoutolu; ke mou tuku ‘iate au hamou toko taha, pea mou ‘ave ha me‘a telia ‘a e honge ‘o homou ngaahi fāmili, ‘o mou ō: pea mou ‘omi kiate au homou tehina kimui:

³⁴pea te u ‘ilo ai ‘oku ‘ikai ko e kau mataki kimoutolu, ka ko e kau fai mo‘oni, pea te u toki tuku atu homou tokoua, pea te mou fai fakatau ‘i he fonua.

³⁵Pea ‘i he‘enau lilingi ‘enau ngaahi tangai Pea tā ko e kofu pa‘anga ‘a e tangata takitaha na‘e ‘i he‘ene tangai: pea ‘i he‘enau vakai ‘a e ngaahi kofu pa‘anga, ‘e kinautolu mo ‘enau ‘eiki, na‘a nau manavahē.

³⁶Pea lea ‘e he‘enau ‘eiki ko Sēkope kiate kinautolu, Kuo mou ‘ave ‘eku fānau meiate au; ko Siosifa ‘oku ‘ikai, pea ko Simione ‘oku ‘ikai, pea ‘oku mou fie ‘ave mo Penisimani: ‘oku tō kiate au ‘a e ngaahi me‘a ni kotoa.

³⁷Pea lea ‘e Lūpeni ki he‘ene ‘eiki, ‘o pehē, Te ke tāmate‘i hoku ongo foha ‘o‘oku, ‘o kapau ‘e ‘ikai te u ‘omi ia kiate koe: tuku ia kia au, pea te u fakafoki ia kiate koe.

³⁸Ka ka pehē ‘e ia, ‘E ‘ikai ‘alu hifo hoku foha mo kimoutolu; he kuo mate hono tokoua, pea ko ia pē toko taha ‘oku toe: pea kapau ‘e hoko kiate ia ha tu‘utāmaki ‘i he hala ‘oku mou ‘alu ai, te mou ‘ohifo hoku hina ni ki fa‘itoka ‘i he mamahi.