Read KO E TOH TAPU KATOA TONGA KO SĒNESI 43 Bible Online

KO SĒNESI 43 - KO E TOH TAPU KATOA TONGA bible

KO SĒNESI 43

¹PEA na‘e mamafa ‘a e honge ‘i he fonua.

²Pea ‘i he faifai pea ‘osi ‘enau kai ‘a e koane kuo nau ‘omi mei ‘Isipite, pea lea kiate kinautolu ‘e he‘enau tamai, ‘o pehē, Mou toe ‘alu, ‘o fakatau mai ma‘atautolu ha me‘i me‘akai.

³Pea tali ‘e Siuta kiate ia, ‘o pehē, Na‘e mātu‘aki fakapapau kiate kimautolu ‘e he matāpule ‘o pehē, ‘E ‘ikai te mau toe sio ki hoku mata, ka ‘i ho‘omou omi mo kimoutolu homou tehina.

⁴Kapau te ke fie tuku mai homau tehina ke ‘alu mo kimautolu, te mau ‘alu hifo ‘o fakatau ha‘o kai:

⁵pea kapau ‘e ‘ikai te ke tuku mai, ‘e ‘ikai te mau ‘alu hifo: he na‘e lea mai ‘a e matāpule, ‘E ‘ikai te mau mamata ki hoku mata, ka ‘i ho‘omou omi mo homou tehina.

⁶Pea lea ‘a ‘Isileli, Ko e hā na‘a mou ta‘e‘ofa pehē ai kiate au, ‘o fakahā ki he tangata ‘oku kei toe hamou tehina?

⁷Pea na‘a nau pehē, Na‘e mātu‘aki ‘eke ‘e he matāpule kiate kimautolu, pea ki homau fāmili, ‘o pehē, ‘Oku kei laumālie ho‘omou tamai? ‘oku ai mo hamou tokoua? Pea na‘a mau fakamatala kiate ia ‘o fakatatau ki he ngaahi lea ko ia: he na‘a mau ‘alo‘alo‘iloa te ne pehē mai, Mou ‘ohifo homou tokoua?

⁸Pea lea ‘a Siuta ki he‘ene ‘eiki ko ‘Isileli, ‘o pehē, Tuku ‘a e tama kiate au, ka mau tutu‘u ‘o ‘alu, ka tau mo‘ui ‘o ‘oua ‘e mate, ‘a kimautolu mo koe, mo ‘emau tamaiki foki.

⁹Ko au hono talifaki; ko au te ke ‘eke ia ki ai: kapau ‘e ‘ikai te u ‘omi ia kiate koe, ‘o fokotu‘u ia ‘i ho ‘ao, pea te u hia kiate koe ‘o ta‘engata:

¹⁰he ka ne ta‘e‘oua ‘etau fakatuai ni, pehē kuo mau foki mai ‘eni ko hono tu‘o ua.

¹¹Pea toki lea kiate kinautolu ‘e he‘enau tamai ko ‘Isileli, ‘o pehē, Ka kuo pau ia, pea mou fai eni; mou to‘o ‘a e ngaahi me‘a fungani ‘o e fonua, ‘o fa‘o ki ho‘omou ngaahi kato, ‘o ‘ave ha me‘a‘ofa ki he matāpule; ha me‘i paame mo ha me‘i honi, mo ha nekoti mo ha lātano, mo ha ngaahi fo‘i telie mo ha ‘ai:

¹²pea ke ‘alu mo kimoutolu ha pa‘anga kehe, pea ko e pa‘anga na‘e fakafoki mai ‘i homou ngutu‘i tangai, toe ‘ave ia; na‘a ko ha matavalea:

¹³pea ‘ave foki homou tehina, pea mou tu‘u ‘o ō, ‘o foki atu ki he tangata:

¹⁴pea tauange mo e ‘Otua ko Sātai ke ne ‘ange ha fatu ‘oku ngaue ‘i he ‘ofa ‘i ho‘omou ‘i he ‘ao ‘o e matāpule, koe‘uhi ke ne ‘atu homou tokoua ‘e taha, mo Penisimani. Kapau ‘e fakamasiva au ‘i he ‘ave ‘eku fānau ka u masiva pē ā.

¹⁵Pea na‘e to‘o ‘e he kau tangata ‘a e me‘a‘ofa ko ia, pea nau to‘o foki ‘a e pa‘anga lōua, pea mo Penisimani; pea nau tu‘u ‘o ‘alu hifo ki ‘Isipite, pea nau tutu‘u ‘i he ‘ao ‘o Siosifa.

¹⁶Pea ‘i he vakai ‘e Siosifa ‘oku ‘iate kinautolu ‘a Penisimani, na‘a ne pehē ki he matāpule ‘o hono fale, ‘Omi ki fale ‘a e kau tangata na, pea tāmate manu ‘o teuteu; he te nau kai mo au ‘a ho‘atā.

¹⁷Pea na‘e fai pehē ‘e he matāpule ‘o hangē ko e me‘a ‘a Siosifa: pea ne fakahū ‘a e kau tangata ki he fale ‘o Siosifa.

¹⁸Pea na‘a nau manavahē ‘i honau fakahū ki he fale ‘o Siosifa: ‘o nau, pehē, Ko hono ‘uhinga ko e pa‘anga na‘e fakafoki ‘i he‘etau ngaahi tangai ‘i he fua omi, ko ia ia ‘oku fakahū ai ‘a kitautolu; koe‘uhi ke ne ‘ohofia kitautolu, ‘o puke kitautolu mo ‘etau fanga ‘asi ke ngāue kiate ia.

¹⁹Pea na‘a nau ‘unu‘unu ki he matāpule ‘o e fale ‘o Siosifa, pea nau fakalea kiate ia ‘i he matapā ‘o e fale, ‘o nau pehē,

²⁰Fakamolemole, Tangata‘eiki, ka ‘oku mo‘oni na‘a mau omi mu‘a ke fakatau me‘akai:

²¹pea ‘i he‘emau a‘u ki he mālōlō‘anga, ‘o mau to‘o ‘emau ngaahi tangai, tā na‘e takitaha ‘ene pa‘anga ‘i he ngutu‘i tangai, ‘a e kotoa ‘o ‘emau pa‘anga: ka kuo mau toe ‘omi ia ‘i homau nima ni.

²²Pea kuo mau ‘omi mo ha pa‘anga kehe ke fakatau me‘akai ‘aki: ‘oku ‘ikai te mau ‘ilo pe ko hai na‘a ne ‘ai ‘emau pa‘anga ki he‘emau ngaahi tangai.

²³Pea ne pehē, Mou fiemālie pē, ‘oua te mou manavahē; ko homou ‘Otua pē, ‘a e ‘Otua ‘o homou ‘eiki, kuo ne tuku koloa ‘i ho‘omou ngaahi tangai: na‘e a‘u kiate au ho‘omou pa‘anga. Pea na‘a ne ‘omi kitu‘a ‘a Simione kiate kinautolu.

²⁴Pea na‘e fakahū ‘a e kau tangata ‘e he matāpule ki he fale ‘o Siosifa, ‘o ne ‘ange ha‘anau vai, ‘o nau fufulu honau va‘e: pea ne ‘ange ha me‘akai ki he‘enau fanga ‘asi.

²⁵Pea na‘a nau teuteu ‘a e me‘a‘ofa ki he ha‘u ‘a Siosifa ho‘atā: he kuo nau fanongo te nau kai me‘akai ‘i ai.

²⁶Pea ‘i he hū mai ‘a Siosifa ki fale, na‘a nau ‘atu kiate ia ‘a e me‘a‘ofa ‘a ia kuo nau ha‘u mo kinautolu ki fale, pea na‘a nau tulolo kiate ia, ‘o punou ki he kelekele.

²⁷Pea na‘a ne ‘eke kiate kinautolu pe ‘oku nau lelei; pea ne pehē, ‘Oku lelei ho‘omou ‘eiki, ‘a e motu‘a na‘a mou lau ki ai? ‘oku ne kei laumālie?

²⁸Pea nau tali, ‘Oku lelei ho‘o tamaio‘eiki ko ‘emau tamai, ‘oku ne kei laumālie. Pea nau punou ‘o hū.

²⁹Pea ne hanga atu ‘o ne vakai ‘a Penisimani ko hono tehina, ko e tama ‘a ‘ene fa‘ē, ‘o ne pehē, Ko ena homou tehina kimui, ‘a ia na‘a mou lau kiate au? Pea ne pehē, Nga‘ata, ke ‘ofa ‘a e ‘Otua kiate koe!

³⁰Pea fakavave ‘a Siosifa; he na‘e ngaue hono fatu ‘i he ‘ofa ki hono tehina: pea na‘a ne kumi ha potu ke ne tangi ai; pea ne hū ki hono loki ‘o tangi ai.

³¹Pea ne toki kaukau hono mata, ‘o ne hū atu ‘o ne fakama‘uma‘u, ‘o ne pehē, Teuteu ‘a e kai.

³²Pea na‘a nau teu kehe ma‘ana, pea kehe ma‘anautolu, pea kehe ma‘a e kau ‘Isipite na‘e keinanga mo ia: he na‘e ‘ikai lava ‘e he kau ‘Isipite ke kai fakataha mo e kau Hepelū; he na‘e tapu ia ki he kakai ‘Isipite.

³³Pea nau nofo hokohoko ‘i hono ‘ao, ‘o mu‘omu‘a ai pē ‘a e ta‘okete ‘i he tehina, pea nofo ‘i mui ‘a e kimui: pea na‘e tumu ai ‘a e kau tangata, ‘o nau fesiofaki.

³⁴Pea na‘e hiki ‘a e ngaahi ‘inasi mei hono ‘ao, ‘o ‘ave kiate kinautolu; pea ko e ‘inasi ‘o Penisimani na‘e hulu atu ‘i honau ‘inasi kotoa, ‘o lō nima. Pea na‘a nau inu, kae‘uma‘ā na‘e lahi ‘a e kava na‘e tufa meiate ia.