Read KO E TOH TAPU KATOA TONGA KO SĒNESI 44 Bible Online

KO SĒNESI 44 - KO E TOH TAPU KATOA TONGA bible

KO SĒNESI 44

¹PEA ne fekau ki he matāpule ‘o hono fale, ‘o pehē, Fakafonu me‘akai ‘a e ngaahi tangai ‘a e kau tangata ki he ngata‘anga ‘o ‘enau mafai ke ‘ave, pea ‘ai ‘a e pa‘anga ‘a e tangata takitaha ki he‘ene ngutu‘i tangai.

²Pea ko ‘eku ipu, ‘a e ipu siliva, ‘ai ia ki he ngutu‘i tangai ‘a e kimui, fakataha mo ‘ene pa‘anga koane. Pea na‘a ne fai ‘o hangē ko ia kuo me‘a mai ki ai ‘e Siosifa.

³Pea pongipongi hake na‘e ‘alu ‘a e kau tangata, ‘a kinautolu mo ‘enau fanga ‘asi.

⁴Pea kuo ‘alu kinautolu mei he kolo, ka kuo te‘eki ke nau loko mama‘o, pea pehē ‘e Siosifa ki he matāpule ‘o hono fale, Tu‘u ‘o tuli ki he kau tangata; pea ‘i ho‘o ma‘u atu, ke ke lea ki ai ‘o pehē, Ko e hā kuo mou totongi ai ‘a e lelei ‘aki ‘a e kovi?

⁵‘Ikai ko ia ia ‘oku inu ai ‘a hoku ‘eiki, pea mo ia ‘oku ne mātu‘aki fai ai ‘ene tonga-fisi? ‘Oku kovi ‘a e me‘a kuo mou fai.

⁶Pea ne ma‘u atu kinautolu, pea ne fai ‘a e ngaahi lea ko ia kiate kinautolu.

⁷Pea nau tali, Ko e hā ‘oku lea pehē ai ‘a e Feitu‘u na? molekemama‘o ‘a e fai ‘e ho‘o kau tamaio‘eiki ha me‘a pehē;

⁸Vakai, ko e pa‘anga na‘a mau ‘ilo ‘i he‘emau ngaahi ngutu‘i tangai, na‘a mau toe ‘omi kiate koe mei he fonua ko Kēnani: pea fēfē ai ha‘amau kaiha‘asi mei he fale ‘o ho ‘eiki ha siliva pe ha koula?

⁹‘Ilonga ‘a ia ‘i ho‘o kau tamaio‘eiki ‘oku ‘ilo ki ai ‘a e me‘a, ke ne mate, pea ko kimautolu foki te mau nofo ko e kau tamaio‘eiki ‘a e ‘eiki na.

¹⁰Pea ne tali, ‘Āua, tau tuku ke pehē, ‘o hangē ko ho‘omou lea: ‘ilonga ‘a ia ‘e ‘ilo ki ai ‘a e me‘a, te ne nofo ko ‘eku tamaio‘eiki; kae ‘atā pē kimoutolu.

¹¹Pea nau fakavave, ‘o takitaha ‘ohifo ki lalo ‘ene tangai, ‘o vete.

¹²Pea ne kumi, ‘o kamata mei he ‘uluaki ‘o faka‘osi ki he kimui: pea na‘e ‘ilo ‘a e ipu ‘i he tangai ‘a Penisimani.

¹³Pea nau hae honau kofu, pea nau takitaha fakaheka ‘a e me‘a ki he‘ene ‘asi, ‘o nau foki ki he kolo.

¹⁴Pea a‘u ‘a Siuta mo hono ngaahi tokoua ki he fale ‘o Siosifa; pea na‘a ne kei ‘i ai: pea nau tō ‘o fo‘ohifo ki he kelekele.

¹⁵Pea lea ‘a Siosifa kiate kinautolu, Ko e hā ‘a e ngāue ni kuo mou fai? Lau ‘e au te mau ‘ilo kuo pau ke fai tongafisi ha tokotaha hangē ko au.

¹⁶Pea tali ‘e Siuta, Ko e hā ha‘amau lea ‘e fai ki he Feitu‘u na? Ko e hā ha‘amau fakamatala? Pea te mau fakatonuhia fēfē kimautolu? Kuo fakae‘a ‘e he ‘Otua ‘a e kovi ‘a ho‘o kau tamaio‘eiki: ko kimautolu eni te mau nofo ki he ‘Afiona, ‘a kimautolu pea mo ia na‘e ‘ilo ki ai ‘a e ipu.

¹⁷Ka ka tali ‘e ia, Molekemama‘o ha‘aku fai ha me‘a pehē: ko e tangata pē na‘e ‘ilo ki ai ‘a e ipu, ko ia pē te ne nofo ko ‘eku tamaio‘eiki, ka ko kimoutolu, mou ‘alu fiemālie ki ho‘omou ‘eiki.

¹⁸Pea ‘unu‘unu kiate ia ‘a Siuta, ‘o ne pehē, Ke fakamolemole ‘a e Feitu‘u na, ko e fai atu ‘e ho‘o tamaio‘eiki ko au ha fo‘i lea ki ho fofonga, pea ke ‘oua na‘a ke tuputāmaki ki ho‘o tamaio‘eiki: he ‘oku ke tatau mo Felo.

¹⁹Na‘e fehu‘i ‘e he ‘Afiona ki ho‘o kau tamaio‘eiki, ‘o pehē, Pe ‘oku ‘i ai ha‘amou tamai, pe tokoua?

²⁰Pea na‘a mau tali ki he ‘Afiona, ‘Oku ‘i ai ‘emau tamai ko e motu‘a, pea mo ha foha na‘a ne ma‘u kuo ne motu‘a, ko e tamasi‘i, pea kuo pekia hono tokoua, pea ko ia pē toko taha ‘oku toe ‘i he‘ene fa‘ē, pea ‘oku ‘ofa ai ‘e he‘ene tamai.

²¹Pea na‘a ke me‘a mai ki ho‘o kau tamaio‘eiki, Ke mou ‘ohifo ia kiate au ke u mamata tonu ki ai.

²²Pea na‘a mau tali ki he ‘Afiona, ‘E ‘ikai lava ke māvae ‘a e tama mo ‘ene tamai: he ka māvae mo ‘ene tamai, ‘e pekia ‘ene motu‘a.

²³Pea na‘a ke me‘a mai ki ho‘o kau tamaio‘eiki, Kapau ‘e ‘ikai ‘alu hifo mo kimoutolu ‘a homou tehina kimui, ‘e ‘ikai te mou toe sio ki hoku mata.

²⁴Pea ko ia ‘i he‘emau a‘u atu ki ho‘o tamaio‘eiki ko ‘emau tamai, na‘a mau fakahā ki ai ho‘o ngaahi folofola.

²⁵Pea pehē mai ‘e he‘emau tamai, Mou toe ō, ‘o fakatau mai ha‘atau me‘i me‘akai.

²⁶Pea na‘a mau pehē, ‘E ‘ikai te mau lava ke ‘alu hifo: kapau te mau ō mo homau tehina kimui, pea te mau ‘alu hifo: ka ‘e ‘ikai te mau lava ke hanga ki he fofonga ‘o e matāpule, ‘o kapau ‘oku ‘ikai ‘iate kimautolu homau tehina kimui.

²⁷Pea pehē mai ‘e ho‘o tamaio‘eiki ko ‘emau tamai, ‘Oku mou ‘ilo na‘e fanau‘i kiate au ‘e hoku uaifi ha tamaiki ‘e toko ua:

²⁸pea ‘alu atu ‘a e taha meiate au, pea u pehē, Kuo pau kuo haehae ia; pea talu ai pē mo e ‘ikai te u mamata kiate ia:

²⁹Pea kapau te mou ‘ave mei hoku ‘ao ‘a e tokotaha ni foki, pea hoko ha tu‘utāmaki kiate ia, pea te mou ‘ohifo kovi hoku hinā ni ki fa‘itoka.

³⁰Pea ko ia, kapau te u ‘alu atu ki ho‘o tamaio‘eiki ko ‘emau tamai, ka ‘oku ‘ikai ‘iate au ‘a e tama — he ‘oku pikiua ‘ene mo‘ui mo e mo‘ui ‘a e tama;

³¹pea ka ‘iloange te ne vakai ‘oku ‘ikai ‘a e tama, te ne pekia: pea ‘e ‘ohifo ‘e ho‘o kau tamaio‘eiki ‘a e hinā ‘o ho‘o tamaio‘eiki ko ‘emau tamai ki fa‘itoka ‘i he mamahi.

³²Kae‘uma‘ā na‘e hoko ho‘o tamaio‘eiki ko au ko e talifaki ki he tama ki he‘eku ‘eiki, ‘o u pehē, Kapau ‘e ‘ikai te u ‘omi ia kiate koe, pea te u hia ki he‘eku tamai ‘o ta‘engata.

³³Pea ko ia ke ke tuku mu‘a ho‘o tamaio‘eiki ko au ke nofo ‘o fetongi ‘a e tama, ‘o tamaio‘eiki ki he ‘Afiona; kae ‘alu hake ‘a e tama mo hono ngaahi ta‘okete.

³⁴He te u ‘alu fēfē ki he‘eku tamai, ka ‘oku ‘ikai ‘iate au ‘a e tama? Na‘a ‘ilo ange te te mamata ki he kovi ‘e hoko ki he‘eku tamai.