Read KO E TOH TAPU KATOA TONGA KO SĒNESI 45 Bible Online

KO SĒNESI 45 - KO E TOH TAPU KATOA TONGA bible

KO SĒNESI 45

¹PEA feinga ‘a Siosifa ke fakama‘uma‘u telia ‘a e kakai na‘e tutu‘u mo ia, ka na‘e ‘ikai te ne lava; ko ia na‘e ne kalanga, Fakahū kitua‘ā ‘a e kakai kotoa pē meiate au. Pea na‘e ‘ikai ha taha ‘e tu‘u mo Siosifa ‘i he‘ene faka‘ilo ia ki hono ngaahi tokoua.

²Pea na‘a ne fu‘u fākafoa; pea na‘e fanongo ai ‘a e kau ‘Isipite, pea fanongo mo e fale ‘o Felo.

³Pea pehē ‘e Siosifa ki hono ngaahi tokoua, Ko Siosifa au; ‘oku kei mo‘ui koā ‘eku tamai? Pea na‘e ‘ikai lava ‘e hono ngaahi tokoua ke tali ki ai; he kuo nau puputu‘u ‘i hono ‘ao.

⁴Pea pehē ‘e Siosifa ki hono ngaahi tokoua, ‘Unu‘unu mai mu‘a kiate au. Pea na‘a nau ‘unu‘unu atu. Pea ne pehē, Ko Siosifa au, ko homou tokoua, ‘a ia na‘a mou fakatau ki ‘Isipite.

⁵Pea ko eni, ‘oua te mou mamahi, pea ‘oua te mou tautea kimoutolu ‘i ho‘omou fakatau au ki heni: he na‘e tuku mai au ‘e he ‘Otua ke u mu‘omu‘a kiate kimoutolu ke fai ha fakamo‘ui.

⁶He ko e ta‘u eni ‘e ua mo e honge ‘a e fonua: pea ‘oku kei toe ha ta‘u ‘e nima, ‘a ia ‘e ‘ikai fai ai ha tōta‘u pe ha ututa‘u.

⁷Ko ia na‘e tuku mai au ‘e he ‘Otua ke mu‘omu‘a kiate kimoutolu, koe‘uhi ke fakaili ha toe ‘iate kimoutolu ‘i he fonua, pea ke fai ma‘amoutolu ha haofaki mo ha fakamo‘ui lahi.

⁸Pea ko ia na‘e ‘ikai ko kimoutolu na‘e ‘omi au ki heni, ka ko e ‘Otua: pea kuo ne fokotu‘u au ko e tamai kia Felo, pea ko e ‘eiki ki hono fale kotoa, mo e pule ki he fonua kotoa ko ‘Isipite.

⁹Mou fai vave, ‘o ‘alu ki he‘eku tamai, ‘o mou pehē kiate ia, Ko e lea eni ‘a ho foha ko Siosifa, Kuo fokotu‘u au ‘e he ‘Otua ko e ‘eiki ki ‘Isipite kātoa: ke ke ha‘u ange kiate au, ‘oua ‘e fakatotoka:

¹⁰pea te ke nofo ‘i he fonua ko Kōseni, pea te ke ofi kiate au, ‘a koe mo ho‘o fānau, mo e fānau ‘a ho‘o fānau, mo ho‘o fanga manu iiki, mo ho‘o fanga manu lalahi, mo e me‘a kotoa ‘oku ke ma‘u;

¹¹pea te u tauhi koe ‘i ai; he ‘oku kei toe ha ta‘u honge ‘e nima: na‘a fakatau koe mo ho fale mo ho‘o me‘a kotoa pē.

¹²Pea ko eni ‘oku vakai ‘e homou mata, kae‘uma‘ā ‘a e mata ‘o hoku tehina ko Penisimani, ko hoku ngutu ni ia ‘oku lea kiate kimoutolu.

¹³Pea ke mou fakamatala ki he‘eku tamai ‘a hoku fu‘u lāngilangi‘ia ‘i ‘Isipite, pea mo e ngaahi me‘a kehekehe kuo mou mamata ki ai; pea ke mou fai vave, ‘o ‘ohifo ‘eku tamai ki heni.

¹⁴Pea ne tāupe ‘i he u‘a ‘o hono tehina ko Penisimani, ‘o ne tangi; pea tangi foki ‘a Penisimani, ‘o ne tāupe ‘i he u‘a ‘o‘ona.

¹⁵Pea na‘a ne ‘uma ki hono ngaahi tokoua kotoa pē, ‘o ne tāupe ‘i honau u‘a ‘o tangi: pea hili ia na‘e talanoa mo ia ‘a hono ngaahi tokoua.

¹⁶Pea na‘e pā atu hono tala ki he fale ‘o Felo, tokua kuo ha‘u ‘a ngaahi tokoua ‘o Siosifa; pea na‘e lelei‘ia ai ‘a Felo, mo ‘ene kau tamaio‘eiki.

¹⁷Pea me‘a ‘a Felo kia Siosifa, Tala ki ho ngaahi tokoua, Mou fai ‘eni; mou fakaheka ho‘omau fanga manu, ‘o mou ‘alu ‘atu ki he fonua ko Kēnani,

¹⁸pea mou ‘omi ho‘omou ‘eiki, mo homou ngaahi fāmili, ‘o mou ha‘u kiate au: pea te u ‘atu kiate kimoutolu ‘a e lelei ‘o e fonua ko ‘Isipite, pea te mou kai ‘a e momona ‘o e fonua.

¹⁹Pea ko eni kuo ke ma‘u ‘a e fekau, pea mou fai eni; to‘o ma‘amoutolu ‘i he fonua ko ‘Isipite ‘a e ngaahi sāliote mo‘amou tamaiki, pea mo‘amou ngaahi ‘unoho, pea mou fakaheka ho‘omou ‘eiki, ‘o mou ha‘u.

²⁰Pea ‘oua te mou sio ki ho‘omou nga‘oto‘ota ‘o mamae ki ai; he ko e lelei ‘o e fonua ‘o ‘Isipite kātoa ‘oku ‘amoutolu ia.

²¹Pea fai pehē ‘e he fānau ‘a ‘Isileli; pea na‘e ‘ange ‘e Siosifa kiate kinautolu ‘a e ngaahi sāliote, ‘o hangē ko e fekau ‘a Felo, pea ne ‘ange hanau ‘oho ki he ‘alu.

²²Na‘a ne foaki kiate kinautolu takitaha ha ‘ū kofu fetongitongi; ka ko Penisimani na‘a ne ‘ange ki ai ha pa‘anga ‘e tolungeau mo ha ‘ū kofu ‘e nima.

²³Pea ko eni ‘a e me‘a na‘a ne tuku atu ki he‘ene tamai; ko e ‘asi ‘e toko hongofulu kuo fakaheka ki ai ‘a e ngaahi me‘a ngako ‘o ‘Isipite, pea mo e ‘asi fefine ‘e hongofulu kuo fakaheka ki ai ‘a e koane mo e mā mo e me‘akai ma‘a ‘ene ‘eiki ki he fononga.

²⁴Ko ia na‘a ne tuku atu hono ngaahi tokoua, pea na‘a nau ‘alu; pea na‘a ne pehē kiate kinautolu, ‘Oua te mou kē ‘i he hala.

²⁵Pea na‘a nau ‘alu hake mei ‘Isipite, ‘o nau a‘u ki Kēnani ki he‘enau tamai ko Sēkope,

²⁶pea nau tala kiate ia ‘o pehē, ‘Oku kei mo‘ui ‘a Siosifa, kae‘uma‘ā ko e pule ia ‘o ‘Isipite kotoa. Pea na‘e lele ‘ene mo‘ui, he na‘e ‘ikai te ne tui kiate kinautolu.

²⁷Pea na‘a nau fakamatala kiate ia ‘a e ngaahi lea kehekehe kuo fai ‘e Siosifa kiate kinautolu; pea ‘i he‘ene mamata ki he ngaahi sāliote ‘a ia kuo tuku mai ‘e Siosifa ke ‘ave ia, na‘e toki mo‘ui hake ‘a e laumālie ‘o ‘enau tamai ko Sēkope.

²⁸Pea pehē ‘e ‘Isileli, Kuo lahi pē, tā ‘oku kei mo‘ui si‘oku foha ko Siosifa; te u ‘alu hifo ‘o sio kiate ia ‘i he te‘eki te u mate.