Read KO E TOH TAPU KATOA TONGA KO SĒNESI 46 Bible Online

KO SĒNESI 46 - KO E TOH TAPU KATOA TONGA bible

KO SĒNESI 46

¹PEA hiki ‘a ‘Isileli mo ia kotoa pē na‘a ne ma‘u, ‘o ne a‘u ki Peasipa: pea ne fai feilaulau ki he ‘Otua ‘o ‘ene tamai ko ‘Aisake.

²Pea folofola ‘a e ‘Otua kia ‘Isileli ‘i ha vīsone, po‘uli, ‘o pehē, ‘E Sēkope, ‘e Sēkope, pea tali ‘e ia, Ko au eni.

³Pea ne folofola mai, Ko ‘ELA au, ko e ‘Otua ‘o ho‘o tamai: ‘oua te ke manavahē ke ‘alu hifo ki ‘Isipite, he te u ngaohi koe ‘i ai ko e kakai lahi:

⁴te u ‘alu hifo mo koe ‘e au ki ‘Isipite, pea te u mātu‘aki ‘ohake koe: pea ko Siosifa te ne pooki ho mata.

⁵Pea tu‘u ‘a Sēkope ke ‘alu mei Peasipa: pea ko ha‘a ‘Isileli na‘a nau ‘ave ‘enau tamai ko Sēkope, mo ‘enau tamaiki, mo honau ngaahi uaifi, ‘i he ngaahi sāliote ne ‘omi ‘e Felo ke ‘ave ia.

⁶Pea nau ‘ave ‘enau fanga manu, mo e koloa kuo nau ma‘u ‘i he fonua ko Kēnani, pea nau a‘u ki ‘Isipite, ‘a Sēkope mo hono hako kotoa:

⁷ko hono ngaahi foha mo e ngaahi foha ‘o hono ngaahi foha na‘e ha‘u mo ia, ko hono ngaahi ‘ōfefine mo e ngaahi ‘ōfefine ‘o hono ngaahi foha; ‘io, ko hono hako kotoa na‘a ne ha‘u mo ia ki ‘Isipite.

⁸Ko eni ‘a e ngaahi hingoa ‘o ha‘a ‘Isileli na‘e ha‘u ki ‘Isipite, ko Sēkope mo hono ngaahi foha: ko e ‘uluaki foha ‘o Sēkope ko Lūpeni.

⁹Pea ko e ngaahi foha ‘o Lūpeni: ko ‘Īnoke, mo Falu, mo Heseloni, mo Kālimi.

¹⁰Pea ko e ngaahi foha ‘o Simione; ko ‘Iemueli, mo Siamini, mo ‘Ōhati, mo Siakini, mo Soha‘a, pea mo Saula ‘a ia ko e tama ‘a ha fefine Kēnani.

¹¹Pea ko e ngaahi foha ‘o Līvai; ko Kēsoni, Kōhati, mo Mēlali.

¹²Pea ko e ngaahi foha ‘o Siuta; ko ‘Ea, mo ‘Ōnani, mo Sela, mo Felesi mo Sala: ka na‘e pekia ‘a ‘Ea mo ‘Ōnani ‘i he fonua ko Kēnani, ka na‘e ai ha fānau ‘a Felesi, ko Heseloni mo Hāmuli.

¹³Pea ko e ngaahi foha ‘o ‘Īsaka; ko Tola, mo Puva, mo Siope, mo Similoni.

¹⁴Pea ko e ngaahi foha ‘o Sepulone; ko Sēleti, mo ‘Ēlone, mo ‘Iakaleli.

¹⁵Ko e hako ia ‘o Lia, ‘a ia na‘a ne fā‘ele‘i kia Sēkope ‘i Mesopotēmia, pea mo Taina ko hono ‘ōfefine; lau fakataha ‘ene fānau tangata mo fānau fefine ko e toko tolungofulu mā toko tolu.

¹⁶Pea ko e ngaahi foha ‘o Kata; ko Sifioni mo Haki, ko Suni mo ‘Esiponi, ko ‘Eli mo ‘Āloti pea mo ‘Āleli.

¹⁷Pea ko e ngaahi foha ‘o ‘Āseli; ko Sīmina, mo Sisua, mo Sisui, mo Pēli‘a, pea mo Sela ko honau tuofefine: pea ko e ongo foha ‘o Pēli‘a; ko Hepa mo Malakieli.

¹⁸Ko e hako eni ‘o Sīlipa, ‘a ia na‘e foaki ‘e Lēpani ki hono ‘ōfefine ko Lia, pea na‘a ne fā‘ele‘i ‘a kinautolu ni kia Sēkope, ko e toko hongofulu mā toko ono.

¹⁹Ko e hako ‘o Lesieli ko e uaifi ‘o Sēkope; ko Siosifa mo Penisimani.

²⁰Pea na‘e fā‘ele‘i kia Siosifa ‘i ‘Isipite ‘a Manase mo ‘Ifalemi, ‘a ia na‘e fā‘ele‘i kiate ia ‘e ‘Asinate ko e ‘ōfefine ‘o Potifela ko e taula‘eiki ‘o ‘Oni.

²¹Pea ko e ngaahi foha ‘o Penisimani; ko Pela mo Pēkeli mo ‘Asipeli, ko Kela mo Neamani, ko ‘Ehi mo Losi, ko Mūpimi mo Hūpimi mo ‘Āliti.

²²Ko e hako eni ‘o Lesieli, ‘a ia na‘e fanau‘i kia Sēkope: lau fakataha ko e toko hongofulu mā toko fā.

²³Pea ko e hako ‘o Tani; ko Hūsimi.

²⁴Pea ko e hako ‘o Nafitalai ko ‘Iakasili, mo Kuni, mo ‘Ieseli, mo Sīlemi.

²⁵Ko e hako eni ‘o Pila ‘a ia na‘e foaki ‘e Lēpani ki hono ‘ōfefine ko Lesieli, pea na‘a ne fā‘ele‘i ‘a kinautolu ni kia Sēkope: lau fakataha ko e toko fitu.

²⁶Ko e lau fakataha ‘o e kakai na‘e ha‘u mo Sēkope ki ‘Isipite, ko e kakano ‘o hono manava, ko honau lau ko e toko onongofulu ma toko ono, ‘o ta‘ekau ai ‘a e ngaahi uaifi ‘o ‘ene fānau.

²⁷Pea ko e hako ‘o Siosifa ‘a ia na‘e fanau‘i kiate ia ‘i ‘Isipite, ko e ongo me‘a ‘e toko ua: ko e lau fakataha ‘o e fāmili ‘o Sēkope na‘e ha‘u ki ‘Isipite ko e toko fitungofulu.

²⁸Pea na‘a ne fekau atu ‘a Siuta ke fakamelomelo kiate ia kia Siosifa, ke fakahinohino hono hala ki Kōseni; pea na‘a nau a‘u ki he fonua ko Kōseni.

²⁹Pea na‘e teuteu ‘e Siosifa ‘ene sāliote, ‘o ne ‘alu ke fakafetaulaki ki he‘ene tamai ko ‘Isileli ki Kōseni, ‘o ne hā kiate ia, ‘o ne tāupe ‘i hono kia, mo tangi fuoloa.

³⁰Pea lea ‘a ‘Isileli kia Siosifa, Ka u mate ‘eni, he kuo u sio ki ho mata, pea ‘oku ke kei mo‘ui.

³¹Pea lea ‘e Siosifa ki hono ngaahi tokoua, pea ki he fale ‘o ‘ene ‘eiki, Te u ‘alu hake ‘o fakapā kia Felo, pea te u tala kiate ia, Kuo ha‘u kiate au hoku ngaahi tokoua, pea mo e fale ‘o ‘eku ‘eiki, ‘a ia na‘a nau nofo ‘i Kēnani;

³²pea ko e kau tauhi sipi ‘a e tu‘unga me‘a, he ko honau faiva ‘a e fanga manu; pea kuo nau ha‘u mo kinautolu ‘enau fanga manu iiki mo ‘enau fanga manu lalahi, mo ‘enau me‘a kotoa.

³³Pea ko eni, ka ui kimoutolu ‘e Felo, ‘o ne pehē, Ko e hā ho‘omou ngāue?

³⁴Pea te mou tali, ko e faiva ‘o ho‘o kau tamaio‘eiki, ‘a kimautolu mo ‘emau mātu‘a foki, ko e fanga manu, talu ‘emau tamaiki ‘o a‘u mai; koe‘uhi ā ke mou nofo ‘i he fonua ko Kōseni; he ko e fakalili‘a‘anga ‘o e kau ‘Isipite ‘a e tauhi sipi kotoa pē.